ဌာန်ပရိုၚ်ဗၠးၜးမန် – လောန်ကၠုၚ် နူကဵုအခိၚ် ကၠာသၞာံ ၂၀၁၀ (ဂိတုဖဝ်ရဂိုန် သက္ကရာဇ်ဍုၚ် ၁၃၇၂) တေံရ ဒပ်ပၞာန်ဍာ်ဗၟာ လၟိဟ်ဂၞန် (၄၃) သီကေတ်ထောံ ကၠအ်ထၜိုတ် ကဵု တိညးဍုၚ်ကွာန် ဗၞတ် (၁၀၀၀) ဨကရောၚ် နူကဵု ဂကောံဒက်ပတန်အခေါၚ်အရာမၞိဟ်ပ္ဍဲဍုၚ်မန် ချူဓမံက်လဝ် ပ္ဍဲကဵုလိက်ဒုၚ်စဳရေၚ် ညးတအ်ရ။
အတိုၚ်ညးတာလျိုၚ် နူကဵုဂကောံဒက်ပတန်အခေါၚ်အရာမၞိဟ် ‘နာဲအဲမန်’ ဟီုမဂး “တိဗၞတ် (၁၀၀၀) ဨကဂှ် ဒပ်ဍာ်တအ် ကေတ်လဝ်တုဲတုဲမံၚ်ရ၊ လၟုဟ်ပြဟ်ဟ်ဏအ် သှေ်ဒၟံၚ် (၃၀၀၀) ဨက ဂှ်တှေ် ဍေံၜတ်လဝ်တုဲ ဟတီလဝ်ဖိုဟ်၊ ဆလအ် သီရောဂှ် ဟွံတီပုဟ်” သာ်ဝွံ လဴထၜးစရ။
ပ္ဍဲလိက်ဒုၚ်စဳရေၚ်ဂှ်မဂး ဒဒှ်ဗီုလဵု ဒပ်ပၞာန်ဍာ် သီကေတ်လဝ် တိကၠအ်ညးဍုၚ်ကွာန်တအ်ရော ဂွံတီကေတ်မာန် နူကဵုဂကောံအခေါၚ်အရာမၞိဟ် ဗလးမၞိဟ်တုဲ ကဵုအာကေတ်ပရိုၚ်သၟးဟွံသေၚ် သီုကဵုဆဵုဂဗကုညးဇၞော်ဍုၚ်ကွာန် ကေုာံ သၟာဂူသၟာဗ္ၚ လၟိဟ်မၞိဟ် (၄၀) တၠတအ်တုဲ တက်ကျာ သၟာန်သၟုက်ညးတအ်ရ။
ကွာန်ကအ်ပြေၚ်မွဲဝွံ သ္ၚိနွံ လၟိဟ်ဗၞတ် (၃၅၀) မ ပြၚ်ၚ်တုဲ ကောန်ကွာန်တအ် ဗွဲမဂၠိုၚ်ဂှ် ဂကူမန် ကြဴနူဏအ် ဂကူဗၟာ ဗက်စှေ်ကၠုၚ်မွဲစွံ ကုဒပ်ပၞာန်ဗၟာတအ် စိုပ်ကၠုၚ်တုဲ ဖျေံလဝ်သဇိုၚ် သ္ၚိညိည နွံရ။ ကမၠောန်ကောန်ကွာန်တအ်ဂှ် ကၠောန်ကၠအ် ကၠောန်ဗ္ၚ အာတမ္ၚာရ။ ဘာလကျာ်မန် နွံမွဲဘာတုဲ ကောန်ကွာန်ဂမၠိုၚ် သီုကဵုဗတောန်မံၚ်ကဵု လိက်ပတ်ကညၚ်ရောၚ် ပ္ဍဲကဵုလိက်ဒုၚ်စဳရေၚ်ဏအ် ဓမံက်လဝ်ရ။
ဒပ်ပၞာန်ဍာ်တအ် ထၜးဟိုတ် သီကေတ်တိဂှ် သွက်ဂွံသိုၚ်ခၞံ ဖလာတ်ပကတ်ပကေၚ်ဘာပၞာန် ကဵု ဗဒမ်သွက်ကောန်ပၞာန်တအ်ရ။ ဆဂး သီကေတ်လဝ်တိဂှ် ဂၠိုၚ်ကဵုဆ ဖလာတ်ဘာပၞာန်တုဲ ပရူဒပ်ပၞာန်ဍာ်တအ် ထၜးဟိုတ် သာ်ဏအ်ဂှ် ကောန်ကွာန်တအ် ဟွံပတှေ်ရ။
ညးမဒးဒုၚ်သီတိမွဲတၠ နာဲဟတေ ဟီုမဂး ”သကိုပ်တံဒပ်ဂှ် သောၚ်ကလးကဵုပိုဲတအ် သီကေတ်တိဏအ်ဂှ် သွက်ဘာပၞာန်ဍေံတအ် သွက်ဗဒမ်ကောန်ကွာန် သွက်သ္ၚိကၠအ်ကောန်ပၞာန်တအ် ဟီုတှေ် အလဵုဂွံဂၠိုၚ်ကွေံကွေံရော။ သီတိလၟုဟ်ဂှ်တှေ် ဗီုကဵုသီတိ ပ္ဍဲကဵုတွဵုရးဍုၚ်မန်တေံရ ဒၞာဲအလဵုကၠအ်ဂှ် သတ်တိတ် ခွာတ်ရဝ်ဗါ ဂွံဂှ်ဟေၚ် ဍေံဗက်သီမံၚ်ဏောၚ်၊ ဗီုဏအ် တိတအ်ဏအ်ဂှ် သွက်ကောန်ဗြဴဍေံတအ် သွက်သြန်ဒပ်ပၞာန်ဍေံ ဂှ် ကၠးဒံၟံၚ်ဏောၚ်”။
အတိုၚ်လိက်ဒုၚ်စဳရေၚ်ဂှ်မဂး ညးတအ်ပကောံပကေဝ်လဝ်တၚ်နၚ် အိန်ထံၚ်သ္ၚိဌာန် မဒးဆောံလေၚ်အာ တိဂမၠိုၚ်တုဲ သာ်လဵုဒပ်ပၞာန်တအ် ဂရတ်ဒၟံၚ်ညးဍုၚ်ကွာန်တအ်ဂှ် ဓမံက်ထၜးလဝ်ရ။
လက္ကရဴ နူကဵုဂကောံအခေါၚ်အရာမၞိဟ် အာတ်မိက် အလဵုအသဳတၟိ သၟဝ်ပရေၚ်အာက္ဍိုပ် ဥူတိၚ်သိၚ် သွက်ဂွံဗဒေါံ ဒပ်ပၞာန်ဒဵု ဒပ်ပၞာန်ဍာ် ဒပ်ပၞာန်အိုဿီုတအ် သီဒၟံၚ်တိ ညးဍုၚ်ကွာန်တအ်ရ။ လတုဲ ဆက်အာတ်မိက်လဝ် ဗော်အလုံရးမည် သွက်ဂွံရီုဗၚ် ရံၚ်စံၚ်အာ သွက်ညးမဆောံလေၚ်အာတိကၠအ်တအ် သွက်ဂွံဂၠာဲကဵု ပရေၚ်ဓရ်ဍာံရ။