ရာၚ်မြဟ် – စၞးဍုၚ်အမေရိကာန် ဆေၚ်စပ်ကဵုအရာပညဳပညပ်မူဝါဒ Mr. Derek Mitchell ပ္ဍဲဂိတုသိပ်တေန်ပါ ၁၃ လောန်ကၠုၚ်ဏံ ကာလဆဵုဂဗလဝ်ကဵု ဗော်ကောန်ဍုၚ်အရၚ်ဂမၠိုၚ်တံဂှ် အဓိကပ္တိုန်ထ္ၜးလဝ် ကိစ္စသွက်ဂွံကလေၚ်ဒက်ပ္တန်ပရေၚ်ဆာန်ကၟိန်ကောန်ဂကူဂမၠိုၚ်ရောၚ် သာ်ဝွံညးစၞးဗော်ချေၚ် ဟီုရ။
ညးစၞးအလဵုအသဳအမေရိကာန် Derek Mitchell
အပ္ဍဲဆဵုဂဗကၠုၚ်လဝ်ညးသ္ကံဏံဂှ် Mr. Derek Mitchell အဓိကသၟာန်လဝ် ပရေၚ် သွက်ဂွံကလေၚ်ဒက်ပ္တန်ပရေၚ်ဆာန်ကၟိန်ကောန်ဂကူဂမၠိုၚ်ဒှ်တုဲ နကဵုအခန်ကဏ္ဍကောန်ဍုၚ်အရၚ်တံဂှ် ကိစ္စဇၞော်ဒၟံၚ်ရောၚ် သာ်ဝွံကလေၚ်ဟီုဏာ သာ်ဏံရ။
“သွက်ဂွံကလေၚ်ဒက်ပ္တန်ပရေၚ်ဆာန်ကၟိန်ကောန်ဂကူဟီုမ္ဂး အဓိကကောန်ဍုၚ်အရၚ်၊ အလဵုအသဳ၊ ဗော်ပရေၚ်ဍုၚ်ကွာန်တံဒှ်တုဲ ကောန်ဍုၚ်အရၚ်တံဟွံပါလုပ်၊ ဟွံဗက်ဗပေၚ်ကဵုတၚ်နၚ်ကောန်ဍုၚ်အရၚ်တံ အာတ်မိက်လဝ်ဂှ်မ္ဂး ဗီုလဵုမှက္တဵုဒှ်ကၠုၚ်ဟွံမာန်” သာ်ဝွံ ဥက္ကဌဗော်ကောန်ဂကူချေၚ် ဥူဇြိုဝ်ဇြာန် ဟီုရ။
နကဵု Derek Mitchell ပၠန်လေဝ် တၚ်နၚ်ဗော်ကောန်အရၚ်တံပ္တိုန်ထ္ၜးကၠုၚ်လဝ်ဏံဂှ် ဒုၚ်တဲသဳကၠဳတုဲ ဟိုတ်နူဂွံဆဵုဂဗကဵုဗော်ကောန်ဍုၚ်အရၚ်တံသာ်ဏံဂှ် မိပ်စိုတ်အိုဟ်တၟိုဟ်ဗွဲမလောန်ကီု သာ်ဝွံညးဟီုလဴရ။
“ပရေၚ်ကောန်ဍုၚ်အရၚ်ပိုဲတံဂှ် Derek Mitchell အကာဲအရာၜိုတ်ညးတေံတီလဝ်လေဝ်နွံမံၚ်ကီုရဂး၊ တုဲပၠန် တိုက်ရိုက်ဟိုတ်နူဂွံဆဵုဂဗ တီကၠိုဟ်လညာတ်ဆန္ဒဗော်ကောန်ဍုၚ်အရၚ်တံသာ်ဏံကီုတုဲ မိပ်စိုပ်ကွေံကွေံ” သာ်ဝွံ ဥူဇြိုဝ်ဇြာန် ဟီုရ။
အပ္ဍဲကဵုပေါဲဆဵုဂဗဏံဂှ် ဗော်တဴတက်ကောန်ဂကူချေၚ်၊ ဗော်ဒီမဝ်ကရေဇြဳအလုံဒေသရးမန်၊ ဗော်တဴတက်ကောန်ဍုၚ်အရၚ်ရခေၚ်ဂမၠိုၚ်၊ ဗော်ညးဍုၚ်ကွာန်ကရေၚ် ကေုာံ ဗော်ဖၠုၚ်-သဝဝ်(ကရေၚ်)တံ တိုန်စိုပ်လဝ် ဂွံတီရ။
အကြာညးစၞးအမေရိကာန်ကဵု ဗော်ပရေၚ်ဍုၚ်ကွန်တံ ဟိုတ်နူသ္ဂောံဆဵုဂဗသဳကၠဳသာ်ဏံဂှ် အခေါၚ်အရာခိုဟ်မွဲသာ်ကီုရောၚ် သာ်ဝွံ ဥက္ကဌဗော်ဒီမဝ်ကရေဇြဳအလုံဒေသရးမန် နာဲဇၞူမန် ဟီုရ။
“ဒှ်မံၚ်ပေါဲဗတိုက်တံ၊ ပရေၚ်အေၚ်ကၠောဝ်ဒှ်မံၚ်တၞောဝ်တံ တုဲပၠန် ပြသၞာပရေၚ်ပိုန်ဒြပ်၊ ပရေၚ်ပညာတံက္တဵုဒှ်မံၚ်ဂှ် ဒှ်မံၚ်ပ္ဍဲဒေသဌာန်ဒၞာဲကောန်ဍုၚ်အရၚ်တံရောၚ်၊ ညးတံ ဟိုတ်နူဂွံဆဵုညာတ်အာကဵုကောန်ဍုၚ်အရၚ်တံဗီုဏံဂှ် ပဵုတုဲခိုဟ်ဂၠိုၚ်” သာ်ဝွံ နာဲဇၞူမန်ဟီုရ။
ပ္ဍဲသိပ်တေန်ပါ ၁၂ ဂှ် Mr. Derek Mitchell ဗွဲတၟေၚ်တၞဟ်ခြာဆဵုဂဗကု ဒဝ်အံၚ်သာန်သုကျဳတုဲ မွဲအဆက်ဓဝ်က္ဍိုပ်သ္ကိုပ်ဗော် NLD တံကီု သီုကဵုကမ္မတဳညးစၞးစၠတ်ထဝ် CRPP တံဂှ်လေဝ် ဆဵုဂဗကၠုၚ်လဝ်နွံရ။
ညးစၞးအမေရိကာန်ဝွံ နူသိပ်တေန်ပါ ၉ ဏံစစိုပ်ကၠုၚ်ဍုၚ်ဗၟာတုဲ အာစိုပ်နေဗျဳတဝ် ဆဵုဂဗကၠုၚ်လဝ် ညးတာလျိုၚ်အလဵုအသဳဗၟာတံဂှ်လေဝ် ဌာန်ပရိုၚ်ဂမၠိုၚ်တံ ပတိတ်လဝ်ပရိုၚ်နွံရ။ တရဴညးတေံဂှ် သိပ်တေန်ပါ ၁၄ ဏံမ္ဂး ဒှ်တ္ၚဲလက်ကရဴအိုတ်ရောၚ် ဂွံတီကေတ်ရ။
နကဵုမူဝါဒအလဵုအသဳအမေရိကာန် စုက်က်လုက်က်သွက်သ္ဂောံဆက်ဆောံကဵုအလဵုအသဳဗၟာဂးတုဲ ပ္ဍဲကဵု ၂၀၁၁ သၞာံ၊ ဂိတုဂျောန် ရုဲစှ်ခါန်ကၞက်လဝ်ညးစၞးဏံဂှ် လၟုဟ်ကၠုၚ်စိုပ်ဍုၚ်ဗၟာအလန်ကိုပ်ကၠာအိုတ် ဒှ်ရ။
