အပ္ဍဲကၟိန်ဍုၚ်သေံဝွံ ကောန်ၚာ်မစိုပ်ကၠုၚ်သီုဖအိုတ်တံ မၞုံကဵုအခေါၚ်ဗ္တောန်ပညာ ဟွံသ္ဒးကဵုၚုဟ်မးရောၚ် နူကဵုအလဵုအသဳသေံ စၞောန်ပျးလဝ်သၞောဝ်ဥပဒေ ဗဗွဲဓဝ်ကီုလေဝ် ကောန်ၚာ်သၟာကမၠောန်ဆုဲပြံၚ်ဗၟာလ္ၚဵုတံဂှ် ဒးဒုၚ်မတၟာတ်စဵုဒၞာလဝ် အခေါၚ်ဗ္တောန်ပညာ ဟွံသ္ဒးကဵုၚုဟ်မးဂှ်ဖိုဟ်ရောၚ် ညးရေၚ်တၠုၚ်ဒၟံၚ် ကေၚ်ကာသၟာကမၠောန်ဆုဲပြံၚ်တံ ဟီုရ။
သၞောဝ်ဥပဒေ ဌာနဝန်ဇၞော်ပရေၚ်ပညာသေံဂှ်ဝွံ သက်သဳကာဒ်ကောန်ဍုၚ်ဗဗွဲဓဝ် ဟွံမွဲကီုဒှ်၊ ကောန်ဍုၚ်သေံဟွံသေၚ်ကီုဒှ် ကောန်ၚာ်နူဍုၚ်သၟာၚ် မစိုပ်ဒၟံၚ်ကၟိန်ဍုၚ်သေံ သီုဖအိုတ်တံဂှ် မၞုံကဵုအခေါၚ်ဗ္တောန်ပညာ ဟွံသ္ဒးကဵုၚုဟ်မးရောၚ် စၞောန်ပျးလဝ် ပ္ဍဲဂိတုဂျာန္နဝါရဳ (၃၀) ဂှ်ရ။
ယၚ်သၞောဝ်ဥပဒေဂှ်ဝွံ ဘာဗ္တောန်လိက် မၞုံသၟဝ်တဲဌာနဝန်ဇၞော်ပရေၚ်ပညာ အပ္ဍဲကၟိန်ဍုၚ်သေံ သီုဖအိုတ်ဂှ် သ္ဂောံဒုၚ်စသိုၚ်ရောၚ် ဂးလဝ်ရ။
ၜိုန်ဂှ်ကီုလေဝ် ပ္ဍဲကဵုအကာဲအရာ ပအပ်ဘာနတဲဂှ်ဝွံ သၞာဲဒဴပရေၚ်ပညာလ္ၚဵုတံ တန်တဴ လ္တူနွံပၟိက်လၟိဟ်ကွးဘာ ပအပ်ဘာဂှ်ရ ဒုၚ်မံၚ်တဲ ကောန်ၚာ်သၟာကမၠောန်ဆုဲပြံၚ်ဗၟာတုဲ ဟိုတ်နူလိက်စၟတ်သမ္တီသက်သဳဟွံဍိုက်ပေၚ်ဂှ်ရ ပရူဒဒှ်ဒးဒုၚ်တးပဲါ အခေါၚ်ပအပ်ဂှ်လေဝ် ဒးဆဵုဂဗမံၚ်ရောၚ် မိမသၟာကမၠောန်ဆုဲပြံၚ်တံ ဟီုရ။
“ပ္ဍဲကဵုတန်မွဲတန်ဂှ်တှေ် ကွးဘာ အကြာ (၃၅ – ၄၀) ရ ညးတံဒုၚ်တဲ။ ဂိတု (၂) ဂှ်တှေ် အ္စာ/အ္စာၝောံတံ စခါတ်ကာဲ လၟိဟ်ကွးဘာတံရ။ ယဝ်ရ နွံပၟိက်မံၚ်လၟိဟ်ကွးဘာဏီတှေ် ကောန်ၚာ်သၟာကမၠောန်ဆုဲပြံၚ်တံ ဂွံအခေါၚ်လုပ်ဘာလောဲလောဲရ။ လၟိဟ်ကွးဘာပေၚ်မံၚ်ဏောၚ်ဟီုတှေ် ကိစ္စလိက်စၟတ်သမ္တီသက်သဳတံဂှ် လ္ပာ်ဘာတံ ဟီုကၠုၚ်ပြဿနာပြးဇးတုဲတှေ် ပဲါတးထောံ အခေါၚ်ပအပ်ဘာရ” သာ်ဝွံ ညးတံဟီုရ။
တုဲပၠန် ကောန်ၚာ်သၟာကမၠောန်ဆုဲပြံၚ် လိက်သက်သဳဟွံမွဲတံဂှ်လေဝ် ပ္တိုန်ထ္ၜး လိက်စၟတ်သမ္တီသက်သဳ ကုညးတာလျိုၚ်ဘာဟွံမာန်ဂှ်ရ ကောန်ၚာ်ဒးဆောံလေၚ်အာ အခေါၚ်ဗ္တောန်ပညာ နွံဗွဲမဂၠိုၚ်ရောၚ် ညးတာလျိုၚ် နူကဵုဖံၚ်ဒေယှေန် ပရေၚ်ပညာ ကေုာံ ပရေၚ်ဖောအ်ဗြေဝ်တောတက် (FED) တံ ဟီုရ။
“ကောန်ၚာ်တံဂှ် ဟိုတ်နူပရူနာနာတုဲ ပြံၚ်စိုပ်ကၠုၚ်လ္ပာ်ဍုၚ်ဏံ မွဲကရောံကဵုမိမဟီုတှေ် အခေါၚ်ဗ္တောန်ပညာကောန်ၚာ်တံ ပ္ဍဲကဵုမုက်လိက်ဍုၚ်သၟာၚ်ဂှ်တှေ် မိမသက်သဳဟွံမွဲကီု၊ ကောန်ၚာ်သက်သဳဟွံမွဲကီုဂှ် ဒုၚ်တၠုၚ်ကၠုၚ်ပအပ်ဘာမာန်ဏောၚ် ဓမံက်ထ္ၜးလဝ်ကီုလေဝ် ပ္ဍဲကဵုဗလးတိဇေတ်ဇေတ်ဂှ် ဒးဆဵုဂဗမံၚ်ခက်ခုဲဖိုဟ်ဏောၚ်” သာ်ဝွံ ညးတာလျိုၚ် နူ (FED) မွဲတၠ ဟီုရ။
ပရေၚ်ပအပ်ဘာ သွက်သၞာံဗ္တောန်ပညာဂတဏံဂှ်ဝွံ စပ္တံနူဂိတုမာတ်တုဲကၠုၚ်ဏံ ဘာအလဵုအသဳသေံဂမၠိုၚ် စဒုၚ်တဲပအပ်မံၚ်ဘာယျဂှ် ဂွံတီကေတ်ရ။
အပ္ဍဲကၟိန်ဍုၚ်သေံဝွံ သၟာကမၠောန်ဗၟာလုပ်သၞောဝ် (၂) ပြကောတိကိုဋ်ပြၚ် ကေုာံ ညးဟွံ လုပ်သၞောဝ်ဏီ (၂) ပြကောတိကိုဋ်ပြၚ် နွံမာန်ရောၚ် ညးချဳဓရာၚ်ကေၚ်ကာသၟာက မၠောန်တံ တော်ခယျလဝ်ရ။
