မာံသုတ – သွက်ဂွံဗှ်ရံၚ်ဗဵုလိက်အုပ်ဆေၚ်စပ်ကဵုဝၚ်ကောန်ဂကူမန်ဂမၠိုၚ် ဗွဲမလောဲသွာမာန်ဂးတုဲ သိုၚ်ခၞံပတိုန်လဝ်တိုက်ရံၚ်လိက်ကောန်ဂကူမန် လ္တူအေန်တာနိတ် www.monnationallibrary.org ဂှ် စနူကဵုတ္ၚဲဘတ်ပေၚ်ဏံ အာပံက်ဗှ်ကေတ်မာန်ရ သာ်ဝွံညးမပါလုပ်ဂကောံဖန်ဇန် နာဲသုန်ဓုန် ဟီုရ။

“ပိုဲသ္ပဒတန်ကဵု တ္ၚဲမဟာထေရ်ဗုဒ္ဓဃောသ ကၠာဲလဝ်လိက်ပိဋကတ်မန် ပ္ဍဲဍုၚ်သၚ်ဃဵု စိုပ်ဒတုဲအာ ပ္ဍဲတ္ၚဲသဳဗပေၚ်ဘတ်ဂှ် မဒှ်တ္ၚဲပရဲသွက်ကောန်ဂကူပိုဲမွဲတ္ၚဲတုဲ ပိုဲတံစပံက်ဏာမုခ်လိခ်အေန်တာနိတ်ဏံ” သာ်ဝွံ နာဲသုန်ဓုန်ဟီုရ။

ဇၟာပ်ပ်သၞာံစိုပ်ဂိတုဘတ်ပေၚ်မ္ဂး သ္ပအဲပရဲစၟတ်သမ္တီကု တ္ၚဲမဟာထေရ်ဗုဒ္ဓဃောသ ကၠာဲလဝ်ပိဋကတ်မန် အာစိုပ်ဒတုဲလဝ်ဂှ်တုဲ ပ္ဍဲဘာလကျာ်မန်ဗွဲမဂၠိုၚ်တံ ကၠောန်သ္ပဒၟံၚ် သ္ဘၚ်ဗဝ်ထၟတ်က္ၜၚ်ရရောၚ် နာဲသုန်ဓုန် ဟီုရ။

ပ္ဍဲကဵု Website ဏံဝွံ လိက်ပတ်ဆေၚ်စပ်ကဵုကောန်ဂကူမန် နကဵုဘာသာ မန်၊ ဗၟာ၊ အၚ်္ဂလိက် ပိဘာသာ ချူပတိုန်လဝ်တံဂှ် ဗှ်ကေတ်မာန်ရ။

“ဂွံပံက်လဝ်တိုက်ရံၚ်လိက်မန်မာန်ဗီုဏံဂှ် ပိုဲတံကေတ်မံၚ်ဂုဏ်စရာဲကွေံကွေံ” သာ်ဝွံ အစာချူလိခ်ကောန်ဂကူအၚ်္ဂလိက် ညးကေၚ်ချူလဝ်ဝၚ်မန် Ashley south ပတိုန်ကၠုၚ်ဂုဏ်စရာဲဂှ် ဂွံဆဵုကေတ် ပ္ဍဲ Monnet ရ။

အဓိကတၚ်ရန်တၟံဂမၠိုၚ် စွံလဝ်(၅) တၚ်တုဲ လိက်ပတ်မန်တြေံတြဟ်ဂမၠိုၚ်၊ ပရေၚ်ဍုၚ်ကွာန်၊ ပရေၚ်ဘာသာ၊ ပရေၚ်ယေန်သၞာၚ်အခိုက်ကၞာ၊ အနုပညာ၊ ဝၚ်ပရူပရာဂမၠိုၚ်တံဂှ် ဇၟာပ်ညးမစိုတ်လုပ်စတံ ညးကၠောန်သုတေသန ကေုာံကွးဘာလ္ၚတ်ဝၚ်မန်တံ ဗွဲမလောဲသွာကေတ်ပ္ဍဲကဵု Website တိုက်လိက်ဂကူမန်ဏံမာန်ရောၚ် နကဵုဘာသာမန် ချူပတိတ်လဝ်လိခ်လလေၚ်တြးနွံရ။

ပြဟ်ဟ်ဏံ ပ္တိုန်လဝ်လ္တူမုခ်လိက်အေန်တာနိတ် တိုက်လိက်ဂကူမန်ဏံ လိခ်ဝၚ်မန်တြေံဂၠိုက်ဂၠာဲဝါတ်တ် (၃၁) ကၞပ်ဂှ် ဂွံဗှ်ကေတ်မာန်ရ။