မာံသုတ – ပ္ဍဲဂိတုဝှ်ပေၚ် (ဂိတုအံက်တဝ်ဗာ ၁၂) ဂှ် အလဵုအသဳဗၟာ သၠးဒုဟ်ဒဏ် ကုကောန်ထံၚ် ၆၃၅၉ တၠကီုလေဝ် ကောန်ထံၚ် သၟာပရေၚ်ဍုၚ်ကွာန်မန် ယၟုပြာကဋ်တံ ဟွံကလေၚ်ဗၠးတိတ်ကၠုၚ်ဏီရောၚ် ဂွံတီကေတ်ရ။ 

ကောန်ထံၚ်သၟာပရေၚ်ဍုၚ်ကွာန် ဂကူမန် မသုန်တၠ ( ဗီု - ဌာန်ပရိုၚ်ဗၠးၜးမန် ကေုာံ အၚ်တာနက် )

“နာဲယက္ခ ဟွံကလေၚ်ဗၠးတိတ်ဏီဂှ် ချိုတ်ပၠိုတ်မံၚ်” သာ်ဝွံ နာဲၝောဂျဳ ဖက်ဆောညးအုပ်ကာ နူဂကောံရီုဗၚ်ထံက်ပၚ်မၚ်မွဲ ကောန်ထံၚ်ပရေၚ်ဍုၚ်ကွာန် (ဍုၚ်ဗၟာ) AAPP ဟီုရ။

မာံနေဝေန် (ကော်) နာဲယက္ခဂှ် ဒးဒုၚ်မံၚ် ထံၚ်မွဲအာယုက် ပ္ဍဲထံၚ်အၚ်စိၚ် ဍုၚ်လ္ဂုၚ်ရ။

တုပ်တဴသာ်ဂှ်ကီု နာဲဆီဂကူ ပါလုပ်ကရောံအမှု နာဲယက္ခဂှ်လေဝ် သၞာံအာတေံ နူထံၚ်အၚ်စိန် ပြံၚ်ဏာ ထံၚ်သာယျာဝတဳတုဲ ဒးဒုၚ်မံၚ် ထံၚ်မွဲအာယုက်ကီုရ။

“ယဝ်နာဲဆီဂကူ ဗၠးတှေ် အလုံကွာန်မွဲ တီကေတ်ဏောၚ်။ စဵုကဵုလၟုဟ် မုလေဝ် ဟွံတၟေၚ်မွဲသာ်ဏီပုဟ်” သာ်ဝွံ မိမညးဍုၚ်ကွာန် ဇာတိညး နူကွာန်ပ္ၚဂှ် မွဲတၠ ဟီုရ။

ပ္ဍဲဂိတုဂျူလာၚ် ၁၇၊ သၞာံ ၂၀၀၃ ဂှ် ပ္ဍဲဍုၚ်လ္ဂုၚ်မွဲဒၞာဲ ထံၚ်ပရိုၚ်အလဵုအသဳပၞာန်ဗၟာတံ လီစၞာဲရပ်ဏာ ညးမၞုံကဆံၚ် ကမ္မတဳခရိုၚ် ဗော်ဍုၚ်မန်တၟိ မာံနေဝေန် (ကော်) နာဲယက္ခ ကေုာံ ဗိုလ်ဇၞော် နာဲဆီဂကူတံ ၜါတၠဂှ်တုဲ စောဲစပ် နကဵုအမှု ချပ်ဇန်ဖံက်ခတိုဟ်ဗမ်တုဲ ဖျေံကၠုၚ်ဒုဟ်ဒဏ်အမိၚ်ဂစိုတ်ရ။

သအာၚ်နူဂှ်ပၠန် သၚ်သၟတ်မန် တၠဂုဏ်ဥက္ကံသ (ကော်) တၠဂုဏ်ဇြဝ်လာတ် ဒးဒုၚ်မံၚ်ထံၚ်ဂှ်လေဝ် ဟွံကလေၚ်ဗၠးတိတ်ဏီရ။

တၠဂုဏ်ဇြဝ်လာတ်ဂှ် နကဵုအမှုချဳဒရာၚ် ဒစဵုဒစးပေဲါရုဲမာဲ ၂၀၁၀ (NO 2010) ဒးဒုၚ်ဖျေံဒုဟ်ဒဏ်ထံၚ် ၁၅ သၞာံတုဲ နူထံၚ်အၚ်စိန် ပြံၚ်ပဆုဲလဝ် ထံၚ်ဖာသီရ။

တုပ်တဴသာ်ဂှ်ကီု က္ဍိုပ်သကိုပ်တၞောဝ်ဒတောဝ်ကွးဘာ ၈၈ မေန်ကဝ်နာၚ် ကေုာံ မေန်ဇေယျတံလေဝ် ဒးထံၚ်မံၚ်ထံၚ် ပ္ဍဲထံၚ်ဇမ္ၚောဲဏီရ။

“အဝဵုဂှ် နွံမံၚ်ပ္ဍဲတဲ အလဵုအသဳဏောၚ်၊ ညးတံဗလးကဵုမှ ဗၠးဏောၚ်၊ အလန်ကၠာ ဗလးကဵု ကောန်ထံၚ် မွဲလက်ပြၚ်ကီုလေဝ် ကောန်ထံၚ်ပရေၚ်ဍုၚ်ကွာန် ပါညိညကီု” သာ်ဝွံ ဒေံဗြဴ နာဲမေန်ဇေယျ ပ္ဍဲကွာန်ကၟာဝက် ပွိုၚ်ဍုၚ်မုဟ်ဍုၚ်ဂှ် ဟီုရ။

ပ္ဍဲလက်ထက်အလဵုအသဳတၟိ ဥူတိၚ်သိၚ်ဂှ် လလောၚ်တြး အခေါၚ်သၠးဒုဟ်ဒဏ် ၂ ဝါတုဲ အတိုၚ်အခေါၚ်သၠးဒုဟ်ဒဏ် အလန်ပထမ ဂိတုမေ ၁၇၊ သၞာံ ၂၀၁၁ ဂှ်မ္ဂး ကောန်ထံၚ် (၁၄ ၆၀၀) တံ ဂွံအခေါၚ် ဗၠးဒုဟ်တုဲ ကောန်ထံၚ်ဒးအမိၚ်ဂစိုတ် (၃၄၈) တၠတံလေဝ် ဂွံအခေါၚ်ပြံၚ်လှာဲ ထံၚ်မွဲအာယုက်ရ။

အတိုၚ်အခေါၚ်သၠးဒုဟ်ဒဏ် အလန်ဒုတိယဏံမ္ဂး ဗလးကဵုကောန်ထံၚ် ၆၃၅၉ တၠတုဲ အပ္ဍဲဂှ်မ္ဂး ကောန်ထံၚ်ပရေၚ်ဍုၚ်ကွာန် ၂၀၀ တၠဟေၚ် ပါလုပ်ရောၚ်ဂှ် ဂကောံရီုဗၚ်ထံက်ပၚ်မၚ်မွဲ ကောန်ထံၚ်ပရေၚ်ဍုၚ်ကွာန် (ဍုၚ်ဗၟာ) AAPP လလောၚ်ပတိတ်လဝ်ပရိုၚ်ရ။