ပရေၚ်ဆဵုဂဗသဳကၠဳဂှ် ပတဝ်မံၚ်က္ဍိုပ်ကဵု ဂၠံၚ်တရဴပရေၚ်ၜိုဟ်လလမ် ဟွံသေၚ်ဏီ

by | Nov 29, 2011 | ပရိုၚ် | 0 comments

ဌာန်ပရိုၚ်ဗၠးၜးမန် – အလဵုအသဳဗၟာ ကေုာံ ဂကောံရပ်လွဟ် ကောန်ဍုၚ်အရၚ်တံဂှ် ဆဵုဂဗသဳကၠဳမံၚ် သွက်ဒေံါပန်ပှော်ကီုလေဝ် ပတဝ်မံၚ်က္ဍိုပ်ကဵု ပရေၚ်ၜိုဟ်လလမ် ဟွံသေၚ်ဏီရောၚ်ဂှ် UNFC ဟီုရ။

သွက်ပရေၚ်ဒေံါပန်ပှော်ဂှ် အလဵုအသဳဗၟာ ဗွဲပဏာမ ဆဵုဂဗသဳကၠဳကဵု ဂကောံရပ်လွဟ်ကောန်ဍုၚ်အရၚ်တံကီုလေဝ် မွဲလပါ်ဂှ် ထပက်မံၚ်ပၞာန် အပ္ဍဲတိဍာ်ကောန်ဍုၚ်အရၚ်တံဖိုဟ်ရောၚ်ဂှ် နာဲဟံသာ မဒှ်ညးအုပ်ကာနာနာ ကံၚ်ဇြဳဖိတ်ဒရေဝ်ညဳသၟဟ် ကောန်ဍုၚ်အရၚ် UNFC ဟီုရ။

“ဒးတီလဝ်မွဲထေက်ဂှ် အလဵုအသဳတံ ဒုၚ်တၠုၚ် သွက်သ္ဂောံဒေံါပန်ပှော်၊ ၜိုန်ရဂစာန်မံၚ် ဟီုကီုလေဝ် မွဲလပါ်ဂှ် ဆက်ထပက်မံၚ်ပၞာန်ဖိုဟ်၊ ရံၚ်ကဵုဟိုတ်ဏံတုဲ ပရေၚ်ဆဵုဂဗဏံဂှ် ပတဝ်မံၚ်က္ဍိုပ်ကဵု ပရေၚ်ၜိုဟ်လလမ်ဟာဂှ် ထေက်ကီုဒးဒှ်သံသယဏောၚ်” သာ်ဝွံ နာဲဟံသာ ဟီုရ။

ၜိုန်ဂှ်လေဝ် အလဵုအသဳဗၟာ ကေုာံ ဒပ်ပၞာန်ရပ်လွဟ် ကောန်ဍုၚ်အရၚ်တံ ဆဵုဂဗတုဲ ဂွံကလေၚ်ဟီုဂး သှ်ခၠေဝ်ၜါလပါ်ဂှ် ဒှ်အခေါၚ်အရာခိုဟ်မွဲရောၚ်ဂှ် ညးဆက်ဟီုရ။

အလဵုအသဳဗၟာဂှ် အပ္ဍဲဂိတုဏံ ဆဵုဂဗသဳကၠဳဆက်ဆက် ကုဗော်ဍုၚ်မန်တၟိ NMSP၊ ဂကောံသၠးပွးကောန်ဂကူကချေၚ် KIO၊ ဗော်သွးကောန်ဂကူကရေၚ် KNU၊ ဗော်တဴတက်ကောန်ဂကူကရေၚ်ဍာဲ KNPP၊ မုခ်ဒပ်ကောန်ဂကူချေၚ် CNF ကေုာံ ကံၚ်ဇြဳကလေၚ်ဒက်ပ္တန် ဍုၚ်သေံ (ဒပ်ပၞာန်သေံဇၞော် သၠုၚ်ကျာ) တံရ။

ၜိုန်ဂှ်လေဝ် ကုဂကောံဆက်စပ် UNFC မတွံဂး ဂကောံကောန်ဂကူပအိုဝ်ဗၠးၜး PNLO ၊ မုခ်ဒပ်ဗၠးၜးတွဵုရးပလံၚ် PSLF၊ ကံၚ်ဇြဳကောန်ဂကူဍုၚ်ရခေၚ် ANC၊ သမဂ္ဂဒဳမဝ်ကရိတ်တေတ်ဠာဟူ LDU၊ ဂကောံကောန်ဂကူ “ဝ” WNO ကေုာံ ဂကောံကောန်ဂကူကချေၚ် KNO တံဂှ် သွက်သ္ဂောံဆဵုဂဗတက်ကျာ အလဵုအသဳတံ ဟွံပြၚ်ဗစိုပ်အရေဝ်ဏီရ။

ဥူဃောန်သာၚ် ညးမတိုန်စိုပ်လဝ် ပေဲါသဳကၠဳတက်ကျာ ပရေၚ်ၜိုဟ်လလမ် အကြာဂကောံညးစၞး အလဵုအသဳဗၟာ ကေုာံ ဒပ်ပၞာန်သေံဇၞော် (သၠုၚ်ကျာ) ဂှ်လေဝ် “ပြဟ်ပြဟ်ဏံ လပါ်သေံလေဝ် ဆက်ဒှ်မံၚ် ပေဲါဗတိုက်ဖိုဟ်တှေ် ပရေၚ်ဒေံါပန်ပှော်ဏံဂှ် ဒှ်ဟွံမာန်ဏီပုဟ်” ဟီုသာ်ဝွံရ။

အလဵုအသဳဗၟာတံဂှ် ကာလဆဵုဂဗကဵု ဂကောံရပ်လွဟ် ကောန်ဍုၚ်အရၚ်တံဂှ် မပ္တံကဵု သွက်သ္ဂောံဒေံါပန်ပှော်၊ သွက်သ္ဂောံပံၚ်ရုၚ်ဆက်ဆောံ၊ ၜက်တိဍာ်တုဲ တတ်သြုၚ်အာကၠုၚ်မ္ဂး ဒးပရဟ်ပညဳပညပ် ဒပ်ၜါလပါ်တုဲ သွက်သ္ဂောံကေတ်တၚ်တုပ်စိုတ် ကေုာံ သွက်လၟေၚ်ကမၠောန် ပရေၚ်ၜိုဟ်လလမ်ထာဝရ ညးၜါလပါ်ကလိဂွံ တၚ်တုပ်စိုတ်တုဲမ္ဂး သွက်သ္ဂောံဆက်သဳကၠဳအာကဵု အလဵုအသဳဗဟဵုတံဂှ် သဳကၠဳလဝ်အိုတ်ရ။

နကဵုကောန်ဂကောံ UNFC ဂမၠိုၚ် ဒေံါပန်ပှော် အလုံကၟိန်ဍုၚ်မွဲတုဲ သဳကၠဳပရေၚ်ၜိုဟ်လလမ်ရောၚ်ဂှ် ဖျေံလဝ်မူရ။

ပ္ဍဲကံၚ်ဇြဳ ဖိတ်ဒရေဝ်ညဳသၟဟ်ကောန်ဍုၚ်အရၚ် UNFC ဒက်ပ္တန်လဝ် ပ္ဍဲဂိတုဖေဖဝ်ဝါရဳ သၞာံဏံဂှ် ဗော်သွးကောန်ဂကူကရေၚ် KNU၊ ဗော်ဍုၚ်မန်တၟိ NMSP၊ မုခ်ဒပ်ကောန်ဂကူချေၚ် CNF၊ ဂကောံသၠးပွးကောန်ဂကူကချေၚ် KIO၊ ဗော်တဴတက်ကောန်ဂကူကရေၚ်ဍာဲ KNPP ကေုာံ ဗော်တဴတက်ဍုၚ်သေံဇၞော် SSPP တံ ပါလုပ်အိုတ်ရ။

သအာၚ်နူဂှ်ပၠန် ပ္ဍဲဂကောံဆက်စပ်တံဂှ် ဂကောံကောန်ဂကူပအိုဝ်ဗၠးၜး PNLO ၊ မုခ်ဒပ်ဗၠးၜးတွဵုရးပလံၚ် PSLF၊ ကံၚ်ဇြဳကောန်ဂကူဍုၚ်ရခေၚ် ANC၊ သမဂ္ဂဒဳမဝ်ကရိတ်တေတ်ဠာဟူ LDU၊ ဂကောံကောန်ဂကူ “ဝ” WNO ကေုာံ ဂကောံကောန်ဂကူကချေၚ် KNO တံပါလုပ်ရ။

Written by

Related Posts

ပ္ဍဲကဵု “သ္ဘၚ်ကဝါ်ဇံၚ် ကေုာံ ထ္ၜးပျးအခိုက်ကၞာယေန်သၞာၚ်” လ္တူဍုၚ်ဖူကေတ်ဂှ် ဂကူမန်တအ် တိုန်စိုပ်ဂၠိုၚ်အိုတ်ရောၚ်ဂး

ပ္ဍဲကဵု “သ္ဘၚ်ကဝါ်ဇံၚ် ကေုာံ ထ္ၜးပျးအခိုက်ကၞာယေန်သၞာၚ်” လ္တူဍုၚ်ဖူကေတ်ဂှ် ဂကူမန်တအ် တိုန်စိုပ်ဂၠိုၚ်အိုတ်ရောၚ်ဂး

ပ္ဍဲကၟိန်ဍုၚ်သေံ လ္တူဍုၚ်ဖူကေတ်၊ ပ္ဍဲကဵုဘာမိုဝ်နေတ်ဂှ် ကျာ်ဇၞော်အ္စာဘာမိုဝ်နေတ် ကေုာံ ညးတာလျိုၚ် ကဆံၚ်ကဆံၚ်တအ် က္ဍိုက်က္ဍိုပ်ပၠတရဴတုဲ ကၠောန်ဗဒှ်ကၠုၚ်လဝ် ဘဘၚ်ကဝါ်ဇံၚ် ကေုာံ ထ္ၜးပျးအခိုက်ကၞာယေန်သၞာၚ်ဂကူဂှ်မ္ဂး ကောန်ဂကူမန်တအ် ပါလုပ်တိုန်စိုပ်လဝ်ဂၠိုၚ်အိုတ်ရောၚ် ဂွံတီကေတ်ရ။

ပ္ဍဲအခိၚ်လိုက်ဝှ်ဏံ တၠကၠအ်ထ္ၜိုတ်တအ် အကာဲအရာဟွံခိုဟ်ဂး

ပ္ဍဲအခိၚ်လိုက်ဝှ်ဏံ တၠကၠအ်ထ္ၜိုတ်တအ် အကာဲအရာဟွံခိုဟ်ဂး

ပ္ဍဲအခိၚ်လိုက်ဝှ်ဏံ ဟိုတ်နူဗြဲဟွံအိုတ်ဏီတုဲ ဂွံခွါတ်ထ္ၜိုတ်လဇုဲမံၚ်ကီု၊ ၚုဟ်ထ္ၜိုတ်သဝ်စှ်ေမံၚ် နူသၞာံတုဲကၠုၚ်တေံကီုဂှ်ရ အကာဲအရာ တၠကၠအ်ထ္ၜိုတ်တအ် ဟွံခိုဟ်ရောၚ် တၠကၠအ်ထ္ၜိုတ်တအ် ဟီုရ။

ဂကောံသၚ်မန် ကွးဘာတက္ကသိုလ်မဟာစူဠာလံၚ်ကန် ကၠောန်သ္ပအာသဘၚ်မ္ရဵု အယုက်ဂကောံပေၚ်(၁၀)သၞာံရောၚ်

ဂကောံသၚ်မန် ကွးဘာတက္ကသိုလ်မဟာစူဠာလံၚ်ကန် ကၠောန်သ္ပအာသဘၚ်မ္ရဵု အယုက်ဂကောံပေၚ်(၁၀)သၞာံရောၚ်

ဂကောံသၚ်မန်ကွးဘာတက္ကသိုလ်မဟာစူဠာလံၚ်ကန်ဝွံ ဒက်ပ္တန်လဝ် ပေၚ်ကၠုၚ်(၁၀)သၞာံရမဒှ်တုဲ သွက်ဂွံကၠောန်ဗဒှ်အာ သဘၚ်မ္ရဵုစၟတ်သမ္တီဂကောံပေၚ်(၁၀)သၞာံနွံရောၚ်ဂှ် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.