မာံသုတ၊ မိလျးထဝ် – ဗော်ဒဳမဝ်ကရေဇြဳကောန်ဂကူမန်MNDFတံ ကၠောန်သ္ပကောံဓရီုကလေၚ်ဒက်ပခိုၚ်ဗော်တုဲ ပ္ဍဲကဵုထပ်ထပေၚ်စုတ်ကောန်ဂကောံတံဂှ် ရဲဒေါံဇူလဝ်နူဗော်ဍုၚ်မန်တၟိတြေံတံလေဝ် ပါလုပ်ကၠုၚ်ရ။

ပ္ဍဲဂိတုနဝ်ဝေမ်ပါ ၂၁ ဂှ် ကၠောန်သ္ပကောံဓရီုလ္တူဍုၚ်မတ်မလီုမွဲဒၞာဲတုဲ ရုဲစှ်လဝ်ညးတာလျိုၚ် ကမ္မတဳဗဟဵု ၅၄ တၠ၊ ညးတာလျိုၚ်ကေၚ်ကာဗဟဵု ၂၁ တၠရဂှ် ဒုဥက္ကဌ(၂) ဗော်ဒဳမဝ်ကရေဇြဳကောန်ဂကူမန် နာဲတေန်အံၚ် ဟီုလဴကဵုရ။

“ကရောံအဲဂှ် ရဲဗော်ဍုၚ်မန်တၟိတြေံ မဒေါံဇူလဝ် ကာလဒေံါပန်ပှော်တံ ပါလုပ်ဒၟံၚ်တၟာဂလိုၚ်ရ” သာ်ဝွံ ညးဆက်ဟီုရ။

ပ္ဍဲဂကောံကေၚ်ကာဗဟဵု ဗော်ဒဳမဝ်ကရေဇြဳကောန်ဂကူမန် ဒက်ပတန်လဝ်တၟိဏံဂှ် ရဲဒေါံဇူလဝ်နူဗော်ဍုၚ်မန်တၟိ ၅ တၠတံပါလုပ်လဝ်ကီုတုဲ သၟာၚ်နူဂှ်ပၠန် ပ္ဍဲတာလျိုၚ်ဗဟဵုကမ္မတဳဂှ်လေဝ် ပါလုပ်ဒၟံၚ်ဗွဲမဂၠိုၚ်ကီုရ။

နာဲတေန်အံၚ် ဟီုဂှ် “ဗော် NLD ဒဝ်သုတံ ပတိုန်စရၚ်ဏောၚ်ဟီုဂှ် နကဵုအဲထံက်မံၚ်ဂလာန်ရ၊ ဆဂး နကဵုဒဳမဝ်ပိုဲဂှ်မ္ဂး ဒးကေတ်ပရေၚ်တုပ်စိုတ်ကဵု ဗော်ကောန်ဍုၚ်အရၚ်ဘဝတုပ် UNA တံကၠာရောၚ်၊ တုဲမှ ဗော်ပိုဲပတိုန်၊ ဟွံပတိုန်စရၚ်ဂှ် သ္ဂုတ်သွာတ်အာပၠန်” သာ်ဝွံ ညးဟီုရ။

စပ်ကဵုကိစ္စ ပတိုန်စရၚ်ဗော် ညံၚ်သ္ဂောံဒှ်ဗော်လုပ်ကဵုသၞောဝ်ဂှ် နကဵုကေၚ်ကာဗဟဵုတံ သွက်ဂွံဖျေံအာတၚ်သ္ဂုတ်သွာတ်တုဲ ညံၚ်သ္ဂောံသ္ပဒတန် ပ္ဍဲကောံဓရီုကမ္မတဳဗဟဵု၊ သွက်ဂွံဆက်ဆောံကဵု ဗော်ဗဟာမိတ် ကောန်ဍုၚ်အရၚ်မပါလုပ် ပ္ဍဲ (CRPP) ဂှ် ပအပ်လဝ်တာလျိုၚ်ကု နာဲတေန်အံၚ်၊ သွက်ပရေၚ်ညဳသၟဟ်ကောန်ဂကူ ညံၚ်သ္ဂောံ သဳကၠဳအာကဵု ဗော်ဒဳမဝ်ကရေဇြဳအလုံဒေသရးမန် သာ်ဝွံ ဖျေံလဝ်တၚ်သ္ဂုတ်သွာတ်ဂှ် ဂွံတီကေတ်ရ။

“သွက်ပရေၚ်ကောန်ဂကူမန်ဟီုဂှ်  နကဵုညးအာဒၟံၚ်က္ဍိုပ်ကောန်ဂကူမန်တံဂှ် တၚ်ရန်တၟံနွံဒၟံၚ်မွဲဓဝ်ရ၊ ဟိုတ်ဂှ်ရ သွက်ဂွံဒက်ပခိုၚ်ပရေၚ်ညဳသၟဟ်ကောန်ဂကူမန်မာန် နကဵုဗော်မန်အပ္ဍဲဍုၚ်ပိုဲတေံ ညံၚ်ဂွံဒှ်အာမွဲဗော်ဟေၚ်ဂှ် ညးတံဂစာန်ရေၚ်တၠုၚ်အာမာန်ဏောၚ် အဲပတေဟ်ကေတ်ဒၟံၚ်ရ” သာ်ဝွံ ဥက္ကဌဗော်ဍုၚ်မန်တၟိ နာဲထဝ်မန် ဟီုလဝ်ရ။

ပြဟ်ဟ်ဏံ ဗော်သ္ပစၞးကဵုကောန်ဂကူမန်မန် (၃) ဗော်တံဂှ် ဗော်ဍုၚ်မန်၊၊ ဗော်ဒဳမဝ်ကရေၚ်ဇြဳကောန်ဂကူမန် ပ္ဍဲသၞာံ ၁၉၉၀  လုပ်ကၠုၚ်ပေဲါရုဲမာဲတုဲ အလဵုအသဳပၞာန်နဝတပတိတ်အမိၚ် ကဵုပလီုထောံဗော်ဂှ် ဒှ်အာဗော်ဟွံလုပ်ကဵုသၞောဝ်၊ ဗော်ဒဳမဝ်ရေဇြဳအလုံဒေသရးမန်ဂှ် လုပ်ပြိုၚ်လဝ်ပေဲါရုဲစှ်မာဲသၞာံ ၂၀၁၀ ဏံရ။

ညးတာလျိုၚ်ကေၚ်ကာဗဟဵု ဗော်ဒဳမဝ်ကရေဇြဳကောန်ဂကူမန်-

၁။ နာဲထောန်တိၚ် – နာယကဂုဏ်တၟေၚ်-၂။ နာဲၚိုတိၚ်- ဥက္ကဌ-၃။ နာဲသိုက်လောန် – ဒုဥက္ကဌ (၁)  ၄။ နိုၚ်တေန်အံၚ် – ဒုက္ကဌ (၂) (ဒေါအ်ဇူနူဗော်ဍုၚ်မန်တၟိ) ၅။ ဒံက်တာစောန်တၟး-ညးအုပ်ကာနာနာ ၆။ ဒံက်တာဟံၚ်ဍုၚ် – ဖက်ဆော ညးအုပ်ကာ (၁)-၇။ နာဲမန်ရာဇာ- ဖက်ဆောညးအုပ်ကာ(၂)- ၈။ နာဲလျးတၟး (လျိုၚ်လလောၚ်ပရိုၚ်) (ဒေါအ်ဇူနူဗော်ဍုၚ်မန်တၟိ)-၉။ နာဲသဵုမျေတ်(ဒေါအ်ဇူနူဗော်ဍုၚ်မန်တၟိ)-၁၀။ မိမဵုမဵုအေ – ပရေၚ်ညးဗြဴ-၁၁။ မိကျေဝ်ကျေဝ်ညဳ – ပရေၚ်သၟတ် ၁၂။ နာဲမာန်ဂကူ (နာဲမျေအ်လောန်) ၁၃။ နာဲထဝ်အိန် – ပရေၚ်သၟာကမၠောန် (ဒေါအ်ဇူနူဗော်ဍုၚ်မန်တၟိ)-၁၄။ နာဲတာ (ဒေါအ်ဇူနူဗော်ဍုၚ်မန်တၟိ)-၁၅။ နာဲတိၚ်သိုဲ – ပရေၚ်ဘဏ္ဍာ၊ ၁၆။ နာဲမျမိုၚ် – ပရေၚ်သၞောဝ်ဥပဒေ- ၁၇။ နာဲသာဒေန် – ပရေၚ်သၟာဗ္ၚ-၁၈။ နာဲမေန်ကျဳ (ဗဂေါ) ၁၉။ နာဲမိုၚ်ညောအ် – ပရေၚ်မၞိဟ်- (ဒေါအ်ဇူနူဗော်ဍုၚ်မန်တၟိ)-၂၀။ နာဲထောန်ဖေ (နာဲသုဝဏ္ဏ)-၂၁။ နာဲကျဝ်တိၚ် (ပံၚ်)