ပ္ဍဲကဵုကံင်ဇြဳညးကဵုကသပ်ဂၞန်ကၟိန်ဍုင်ဂှ် ဗိုလ်ပၞာန်ဗၟာတြေံဂမိုင်ကီု သီုက္ဍိုပ်သ္ကိုပ်ဗော်ပရေင်ဍုင်ကွာန်တအ် ပါလုပ်တုဲ သမ္မတ မေန်အံင်လှာင် ခါန်ကၞက်ကဵုလဝ်ဒၞါဲ ကုဥူသဵုဝေန် နဒဒှ်ဥက္ကဌရောင် ဂွံတီကေတ်ရ။

ပ္ဍဲကံင်ဇြဳဝွံ ဥက္ကဌဂှ် ဥူသဵုဝေန်၊ ညးအုပ်ကာဂှ် မံင်မံင်အေတုဲ ဥူတာန်သိုဲ၊ ဥူကိုဝ်ကိုဝ်လှာင်၊ ဥူမိုဝ်အံင်၊ ဒံက်တာယေန်ယေန်နဲ၊ ဒဝ်ချူချူကျဝ်ညုင် (ဥက္ကဌ ဗော်ဖေဝ်ဒရေဝ်ဒဳမဝ်ကရေတ်တေတ်)၊ ဥူကိုဝ်ကိုဝ်ဂျဳ (ဥက္ကဌ ဗော်ညးဍုင်ကွာန် PP)၊ မာန်ညုင်မံင်၊ ဒဝ်ဒဲဗူ ကေုာံ ဥူဇြဝ်အေမံင်တအ် ပါလုပ်နဒဒှ်ကောန်ဂကောံ ဖ္အိုတ် ၁၁ တၠရ။

အခိင်ဥူမေန်အံင်လှာင် ကေတ်လဝ်တာလျိုင် နဒဒှ်က္ဍိုပ်သ္ကိုပ် ပ္ဍဲဒပ်ပၞာန်ဂှ် ဥူသဵုဝေန် နွံအဆံင်ဒုက္ဍိုပ်သ္ကိုပ် တုဲ လၟုဟ်လေဝ် ကာလမေန်အံင်လှာင် တိုန်သ္ပသမ္မတဂှ် ဥူသဵုဝေန် က္လေင်ဂွံဒၞါဲ ပ္ဍဲကံင်ဇြဳညးကဵုကသပ်ဂၞန် ကၟိန်ဍုင်ပၠန်ရ။

ညးပါလုပ် ပ္ဍဲကံင်ဇြဳညးကဵုကသပ်ဂၞန်ကၟိန်ဍုင်တအ်ဝွံ မ္ဒးကဵုကသပ်၊ ပညဳပညပ်အာ ဆေင်စပ်ကဵုပရေင်ဂီုကၠီု၊ ပရေင်အုပ်လဒံသၞောဝ်၊ ပရေင်ဆက်ဆောံဍုင်သ္အာင်၊ ပရေင်ၜိုဟ်လလမ် ကေုာံ ပရေင်သၞောဝ်ဥပဒေတအ် ရောင် ဂးရ။

ပ္ဍဲအရာခါန်ကၞက်ကဵုတာလျိုင် သမ္မတ၊ ဥက္ကဌတအ်ဂှ် ဟွံစကာလဝ်အဆံင်အလံင်နူဒပ်ပၞာန်တုဲ ချူဓမံက်လဝ်ယၟု ဗီုပြင်ညးဍုင်ကွာန် ဥူမေန်အံင်လှာင်၊ ဥူသဵုဝေန်ဂှ်ရ သီုညးၜါတၠ ကေတ်အခိင်ဇူ (စပေန်ဇြေန်) နူဒပ်ပၞာန်ရောင် မ္ဒးကၠိုဟ်ကေတ်ရ။