မိလျးထဝ် – မၞိဟ်ဂစိုတ်လဝ် ကောန်ဂကူသေံ ၂ တၠ သီုပလံၚ်ကတ်ဏာလဝ် ကွဳစက် အကြာပယျဵုသေံကဵု ဗၟာ၊ ဒေသကျာ်ပိတံဂှ် နူဗော်ဍုၚ်မန်တၟိတံ ရပ်ဂွံလဝ်တုဲ ကလေၚ်ပအပ်ဏာကဵု ဗၠာဲသၟီသေံတံယျရောၚ် ဂွံတီကေတ်ရ။

ပ္ဍဲစၟတ်တ္ၚဲ ၉ ဂိတုဂျန္နာဝါရဳတုဲကၠုၚ်ဂှ် ကောန်ကဵုအပါၜါတၠ စဳဇန်လဝ် သွက်ဂွံပၠံၚ်ကေတ်ကွဳစက်ဂှ်နွံတုဲ အာလိၚ်ကေတ်ကွဳစက် နူဍုၚ်ၜၚ်ကံက် ကၠုၚ်ဍုၚ်သၚ်ခလပူရဳ နကဵုသြန်သေံ ၃၅၀၀ ၜါတ်ရ။

“ဟိုတ်နူမိက်သ္ဂောံဂွံ ကွဳစက်ဂှ်တုဲ လိၚ်နၚ်တၠကွဳစက်ဂှ်၊ စဳဇန်လဝ်ဂှ်တှေ် ကာလဂစိုတ် တၠကွဳစက် ၂ တၠဏံတုဲ ကေတ်ဏာကွဳစက်ဂှ် အာသွံ လ္ပာ်ဒေသပယျဵုကျာ်ပိတေံရ” သာ်ဏံ အတိုၚ်ညးဒးဒုၚ်ရပ်လဝ်လဴကဵုဂှ် ညးတာလျိုၚ် နူတမ်ဒပ် ၉ နာဲချတ် ကလေၚ်လဴကဵုရ။

ပ္ဍဲဂိတုဂျာန္နာဝါရဳ ၁၆ ဂှ် နူကဵုထံၚ်ပရိုၚ်မန်တံ ဂွံပရိုၚ် ညးတၠတဲမွဲတၠ နွံဒၟံၚ် လ္တူဍုၚ်ကျာ်ပိသၚ်ဗၟာတုဲ ဗလးကဵုဗၠာဲသၟီဗၟာတံ ရပ်ထိၚ်ကဵု ညးတၠတဲ နာဲခါန်ချေတ် အာယုက် ၄၂ တုဲ ပ္ဍဲစၟတ်တ္ၚဲ ၁၇ ဂှ် ထပ်ရပ်ဂွံ နာဲဟံၚ်ဆာန် အာယုက် ၁၇ သၞာံ ပ္ဍဲဒေသတိဍာ်ဗော်ရ။ ညးၜါဂှ်ဝွံ ကောန်ဂကူမန်တုဲ မဒှ်ကောန်ကဵုအပါရ။

မၞိဟ်ဒးဒုၚ်ဂစိုတ်ၜါတၠဂှ်ဝွံ မဒှ်တၠသ္ၚိသမ္ဘာ ကောန်ဂကူသေံ မၞုံယၟု နာဲဝိချေတ် အဖိရဖောၚ် အာယုက် ၄၉ သၞာံ ကေုာံ မိဓံၚ်ဖုန် မဟာခါမ် အာယုက် ၄၆ သၞာံရတုဲ ညးတံဂှ် ကၠောန်စမံၚ်ကမၠောန် လိၚ်ဒဳကွဳစက် ပလံၚ်စမၞိဟ်တံရ။

ညးတံဒဳစှေ်ကၠုၚ်ကွဳစက် နူဍုၚ်ၜၚ်ကံက် အကြာဂၠံၚ် ကၠာဟွံဂွံစိုပ် ဒေသပယျဵုကျာ်ပိက္ဋၚ်ဂှ် ဂစိုတ်ထောံ တၠကွဳစက်ၜါတၠဂှ်တုဲ ကေတ်ဏာကွဳစက်ဂှ် ဂြိပ်အာပါဲဒၟံၚ် လ္တူဍုၚ်ကျာ်ပိသၚ်ဗၟာရ။

ကာလရပ်ဂွံ နာဲဟံၚ်ဆာန်ဂှ် အပ္ဍဲညး သီုသက်သဳ မပ္တံ ဗဠောံမဒးလဝ်ဆီ၊ ဖုၚ် ၂ မ၊ ဂတဵုမဂၞန်ကွဳစက်၊ လိက်စၟတ်သမ္တီ (ဝါ) ၜါတ်သေံ ညးမချိုတ်အာဂှ် ကေုာံ သြန်ညိည သီဂွံနၚ် နူညးတၠတဲဂှ်ရ။