ဗော်ဍုၚ်မန်တၟိ ထပ်တက်ကျာကဵုအလဵုအသဳရောၚ်

by | Jan 26, 2012 | ပရိုၚ် | 0 comments

ဂျူရဳဆာဲ – ညးစၞးဗော်ဍုၚ်မန်တၟိကဵု အလဵုအသဳဗၟာတံၜါလပါ် သွက်ဂွံဆဵုဂဗတက်ကျာပရေၚ်ဒေါအ်ပန်ပှော်ဂှ် ချိၚ်လဝ်ပ္ဍဲဍုၚ်မတ်မလီု ဂိတုဖေဖဝ်ဝါရဳ ၁ ဏံရ။

လပါ်ဗော်ဍုၚ်မန်တၟိမ္ဂး ဒုဥက္ကဌနာဲရဿက္ဍိုက်ပ်တုဲ လပါ်အလဵုအသဳတံဂှ် ညးက္ဍိုပ်ဝန်ဇၞော်ကွဳပၟတ်ဥူအံၚ်မေန် ကဵု ရဲဂကောံအလဵုအသဳဗၟာတံပါလုပ်ရောၚ် ဂွံတီရ။

“သွက်ဂွံတက်ကျာပရေၚ်ဒေါအ်ပန်ပှော်ဂှ် ဗော်ပိုဲရုဲစှ်လဝ်ညးစၞးတံတုဲရ၊ ပရေၚ်ဒေါအ်ပန်ပှော်ကဵု ပြဿနာပရေၚ်ဍုၚ်ကွာန်တံဂှ် စွံအဓိကတုဲသဳကၠဳအာဏောၚ်” သာ်ဝွံ ညးတာလျိုၚ်ဆက်ဆောံဍုၚ်သၟာၚ် နာဲဟံသာဗိုန်ခိုၚ် ဟီုရ။

ပ္ဍဲညးစၞးဗော်ဍုၚ်မန်တၟိ နာဲရဿက္ဍိုက်လဝ်က္ဍိုပ်ဂှ် ဒုသ္ကိုပ်ပၞာန်လျးဂကူ၊ ညးတာလျုိုၚ်ဂကောံက္ဍိုက်ပ်ပရေၚ်အုပ်ဓုပ်ဗဟဵု နာဲတၠညး၊ ညးလုပ်ဂကောံကမ္မတဳပၞာန်ဗဟဵု ဒုသ္ကိုပ်ဗဵုဇၞော်ဗညာဆာန်နန်၊ ဥက္ကဌခရိုၚ်မတ်မလီု နာဲအေမန်၊ ဥက္ကဌခရိုၚ်ထဝါဲ နာဲဗညာလဴ ကေုာံ ညးအုပ်ကာခရိုၚ်သထုံ နာဲဧကတံ သီုဖအိုတ်(၇) တၠပါလုပ်ဒၟံၚ်ရ။

အပ္ဍဲပရေၚ်တက်ကျာလၟုဟ်ဏံဂှ် ရန်တၟံကဵု သွက်ပရေၚ်ၜိုဟ်လလမ်အလုံဍုၚ်မွဲရောၚ်ဒှ်တုဲ သီုဂွံဗလးပတိတ်ကဵုကောန်ထံၚ် ရဲသၟာပရေၚ်ဍုၚ်ကွာန်မန်ဖအိုတ်တံဂှ်လေဝ် ထပ်အာတ်မိက်အာပၠန်ဏောၚ် နာဲဟံသာဗိုန်ခိုၚ် ဆက်ဟီုရ။

ပ္ဍဲဂိတုဒဳဇြေန်ပါ ၂၂ လောန်ကၠုၚ်တေံဂှ် ညးအုပ်ကာဗော်ဍုၚ်မန်တၟိ နာဲဟံသာ ကဵုအလဵုအသဳဗၟာ ဝန်ဇၞော်ဥူအံၚ်မေန်တံ ညးစၞးဂကောံၜါလပါ် အလန်ပထမ ကေၚ်ဆဵုဂဗတက်ကျာသဳကၠဳလဝ် မွဲဝါတုဲကၠုၚ်ရ။

သၞာံ ၂၀၁၂ အပ္ဍဲ ဂိတုဂျာန်နဝါရဳမ္ဂး မိက်ဂွံထပ်တက်ကျာသဳကၠဳကဵု ဗော်ဍုၚ်မန်တၟိမွဲဝါပၠန်ဂှ်လေဝ် နကဵုညးစၞးအလဵုအသဳတံဂှ် အာတ်မိက်ကၠုၚ်လဝ်နွံရ။

နကဵုဗော်ဍုၚ်မန်တၟိဝွံ ပ္ဍဲသၞာံ ၂၀၁၁ ဂိတုအံက်တဝ်ပါဂှ် ပ္ဍဲကဵုဍုၚ်ရေဝ် ဆဵုဂဗကုညးစၞးအလဵုအသဳတွဵုရးဍုၚ်မန်မွဲဝါ၊ ပ္ဍဲဂိတုနဝ်ဝေမ်ပါဂှ်ပၠန် ဆဵုဂဗကုဂကောံညးရေၚ်တၠုၚ်ဖဵုပရေၚ်ဓရ်ၜိုဟ်လလမ် ဒၞာဲဌာန်ဂအုပ်ဗဟဵုဗော်ဍုၚ်မန်တၟိလေဝ် တုဲကၠုၚ်ရ။

စနူ ၁၉၉၅ သၞာံတေံ ဗော်ဍုၚ်မန်တၟိကဵု အလဵုအသဳပၞာန်ဗၟာတံ ဂွံကၠုၚ်တၚ်တိပ်စိုတ်ပရေၚ်ဒေါအ်ပန်ပှော်ကီုလေဝ် ဟိုတ်နူမူဝါဒ ပြံၚ်သၠာဲဒပ်မၚ်ပယျဵုတုဲ သၞာံ ၂၀၁၀ ဂိတုသိတ်တေမ်ပါဂှ် ပရေၚ်ဒေါအ်ပန်ပှော်အကြာၜါလပါ် လီုလာ်အာရ။

Written by

Related Posts

သွက်ဂွံထ္ၜုတ်ပ္တန် တ္ရဲစၟတ်သမ္တီ ဆေင်ကဵုပရေင်တိဍာ်ဂှ် ပြဝါတိဍာ်မန် ကေတ်မံင်လညာတ် အကြာညးဍုင်ကွာန်

သွက်ဂွံထ္ၜုတ်ပ္တန် တ္ရဲစၟတ်သမ္တီ ဆေင်ကဵုပရေင်တိဍာ်ဂှ် ပြဝါတိဍာ်မန် ကေတ်မံင်လညာတ် အကြာညးဍုင်ကွာန်

ရန်ကဵု သ္ဂောံထ္ၜုတ်ပ္တန် တ္ရဲစၟတ်သမ္တီမန် မဆေင်စပ်ပရေင်တိဍာ် ကေုာံ အဂႅလကျှဏ်ဂကူမန် ဂးတုဲ နူကဵုဂကောံ ပြဝါတိဍာ်မန်တအ် ဗက်ကံက်ကေတ်မံင်လညာတ် အကြာညးဍုင်ကွာန်မန်တအ်နွံရ။

အသိင်သၟတ်တအ် ဂြိပ်ပါဲဒဴပရေင်ဒးသ္ပကောန်ပၞာန်ဂှ်တုဲ အခိင်သွံရာန်ကွဳလိုန်ဓာတ်ခိုဟ်ဂှ် သွံဟွံဂြိပ်

အသိင်သၟတ်တအ် ဂြိပ်ပါဲဒဴပရေင်ဒးသ္ပကောန်ပၞာန်ဂှ်တုဲ အခိင်သွံရာန်ကွဳလိုန်ဓာတ်ခိုဟ်ဂှ် သွံဟွံဂြိပ်

လၟေင်အရိုဟ်ဟ်သၞာံ စိုပ်ကၠုင်ဂိတုမာ်၊ ဖဝ်ရဂိုန်မ္ဂး ဒှ်အခိင်သွံကွဳလိုန်ဓာတ်ခိုဟ်ကီုလေဝ် သၞာံဏံဂှ် ဟိုတ်နူသၟတ်တအ် ဂြိပ်ပါဲဒဴ နကဵုအသိင်ဘဲဒးသ္ပကောန်ပၞာန်ဂှ်တုဲ သၟတ်ဒၟံင်တန်တဴ ပ္ဍဲဍုင်ကွာန်တအ် အောန်ဂှ်ရ သွံရာန်ကွဳလိုန်ဓာတ် လေဝ် ပရေံမံင်ရောၚ် တၠဆေင်သွံရာန်ကွဳလိုန်ဓာတ် လတူဍုင်ဇြပ်ဗုမွဲတၠ ဟီုရ။

တိကၠအ်ဝါ ဇိုင်ကွာန်တအ်ဂှ် ကၟာတ်လဝ် အခေါင်သွံရာန် ပါ်ဂအာင်သ္ၚိကီုလေဝ် ပါ်သွံရာန်မံၚ်အတိုင်သၞောတ်တြေံ

တိကၠအ်ဝါ ဇိုင်ကွာန်တအ်ဂှ် ကၟာတ်လဝ် အခေါင်သွံရာန် ပါ်ဂအာင်သ္ၚိကီုလေဝ် ပါ်သွံရာန်မံၚ်အတိုင်သၞောတ်တြေံ

တိကၠအ်ဝါ မၞုံဇိုင်ဍုင် ကရပ်ကွာန်တအ်ဂှ် ကံင်ဇြဳပၞာန်တအ် ပ္တိတ်လဝ်ပၟိင်စၞောန် အခေါင်သွံဂအာင်သ္ရိ ကၟာတ်လဝ်ကီု လေဝ် ပ္ဍဲတွဵုရးဍုင်မန် ဇၟာပ်ပွိုင်ဍုင်ဂှ် ပညဳပညပ်ကဵုကေတ်ဩန်တုဲ ပါ်သွံဒၟံင်ဂအာၚ်သ္ၚိ အတိုင်သၞောတ်တြေံရောင် သ္ဂောံတီကေတ် နူဗွိုင်ညးမရေင်တၠုင်သွံရာန်ဂအာင်သ္ၚိဂမၠိုင်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.