နာဲမာန် – ပညဳပညပ်ပရေၚ်ဂွံပံၚ်ဗစပ်ဗော်မန်ၜါဗော်ဂှ် ပြဟ်ဟ်ဏံ ဟွံဒှ်ပံၚ်ဗစပ်ဒှ်မွဲဗော်ကၠာလေဝ် လ္တူကလိဂွံတၚ်တုပ်စိုတ် ပန်တၚ်ဂှ် ဒုၚ်ထ္ပက်စၟတ်တဲ သီုၜါလ္ပာ် ပ္ဍဲပေဲါကောံဓရီုနူတနေံတေံ ဧပြဳ ၂၂ ဏံရ။

ကိစ္စဗော်ၜါဂွံဒှ်ပံၚ်ဗစပ်ပြဟ်ဟ်ဏံဂှ် ဂကောံကျာ်ဇၞော်အ္စာဂမၠိုၚ်ကီု ညးဍုၚ်ကွာန်စိုတ်လုပ်စကဵု ပရေၚ်ဗော်မန်ဂမၠိုၚ်တံဂှ်ကီု ၜိုန်ရနွံပၟိက်ကၠာလေဝ် သွက်ဂွံပံၚ်ဗစပ်ဂှ် သီုၜါဗော်ဒှ်မံၚ်အခက်ခုဲနွံတုဲ လ္တူတၚ်ဂွံနၚ် နူဂကောံခၟဳသၚ်ဂမၠိုၚ် ကဵု ညးဍုၚ်ကွာန်ဂမၠိုၚ်တံပ္ဍဲကဵု ပေဲါကောံဓရီုဂှ်ဟေၚ် ဒုၚ်တုပ်စိုတ်ထ္ပက်စၟတ်တဲ ဂတမုက်ခၟဳသၚ် ကေုာံ ညးဍုၚ်ကွာန်တံရ။

အတိုၚ်ဂကောံခၟဳသၚ် ကေုာံ ညးဍုၚ်ကွာန်တိုန်စိုပ် ပ္ဍဲပေဲါကောံဓရီုဂမၠိုၚ် ကဵုလဝ်တၚ်နၚ်ပန်တၚ်ဂှ် (၁)ဗော်ဒဳမဝ်ကရေဇြဳ ကောန်ဂကူမန် ကေုာံ ဗော်ဒဳမဝ်ကရေဇြဳအလုံရးမန်ဝွံ ပံၚ်ဟေၚ်တုပ်စိုတ်ရ၊(၂) စၟတ်တ္ၚဲသွက်ဂွံပံၚ်ဂှ် လက္ကရဴအိုတ် ဂိတုဒဳဇြေန်ဗါ ၂၀၁၄ တေံမ္ဂး ဒးပံၚ်ဒှ်မွဲဗော်ဟေၚ်၊ (၃) သွက်ဂွံသဳကၠဳအာလၟေၚ်ၚ်ဂှ် မွဲဂိတုမွဲဝါ ပ္ဍဲကဵုဇၟာပ်တ္ၚဲသဳဂိတုအိုတ်ရောၚ် ဌာနဂှ် တန်တဴကဵုခၟဳသၚ်တံကော်ဘိက်ရောၚ်၊ (၄) နကဵုယၟုဗော်တၟိမွဲဟေၚ် ဒးဆက်သဳကၠဳအာရောၚ် သာ်ဝွံ ဗော်သီုၜါလ္ပာ် တုပ်စိုတ်တုဲ ဒုၚ်ထ္ပက်စၟတ်တဲ ဂတမုက်ပ္ဍဲပေဲါကောံဓရီုနူတနေံဂှ်ရ။

စပ်ကဵုဒုၚ်ထ္ပက်စၟတ်တဲ စၞးဗော်ဒဳမဝ်ကရေဇြဳကောန်ဂကူမန်ဂှ် ဒုဥက္ကဌလၟိဟ်(၂)နာဲတၠနန် ကော် နာဲတေန်အံၚ်၊ ညးအုပ်ကာနာနာ အ္စာသဝ်မာံစောန်တၟး၊ ဖက်ဆောညးအုပ်ကာ အ္စာသဝ်မာံဟံၚ်ဍုၚ်၊ ဖက်ဆော(၁)နာဲမန်ရာဇာ၊ ဂကာံကမ္မတဳရေၚ်တၠုၚ်ကေၚ်ကာ သ္ကိုပ်ပရေၚ်စန္ဒက် နာဲပါန်အံၚ်၊ ကမ္မတဳရေၚ်တၠုၚ်ကေၚ်ကာ နာဲသဵုမျေအ်၊ ကမ္မ တဳရေၚ်တၠုၚ်ကေၚ်ကာ နာဲလျးတၟး တံပါလုပ်ရ။

လ္ပာ်ဗော်ဒဳမဝ်ကရေဇြဳအလုံရးမန်ဂှ် ဝန်ဇၞော်မန်စၞးဒေသရးကရေၚ် ကမ္မတဳရေၚ်တၠုၚ်ကေၚ်ကာ နာဲချေတ်ဥူ၊ ကမ္မတဳရေၚ်တၠုၚ်ကေၚ်ကာ နာဲစာ၊ နာဲလှခိုၚ်၊ နာဲလျးဟံၚ်မန်၊ နာဲကောန်ဆာန် ကေုာံ နာဲအံက်သာ တံပါလုပ်ရ။

လ္တူတၚ်ပန်တၚ်ဂှ် ဒုၚ်တုပ်စိုတ်ထ္ပက်စၟတ်တဲတုဲ ညးစၞးဗော်သီုၜါဗော်ဂှ် ညးမွဲကေုာံညးမွဲ ပအပ်တၞးလိက်ထ္ပက်လဝ်စၟတ်တဲဂှ်ကီု ရပ်တဲဆက်မိတ်ရေၚ်သ္ကံ ဂတမုက်ပ္ဍဲဝိုၚ်ပ္ဍဲပေဲါကောံဓရီုဂှ်တုဲ ညးဂမၠိုၚ်ကဵုဇြ ဟတ်တက်တဲ ထံက်ဂလာန်အိုတ်ရ။
စပ်ကဵုပရေၚ်ကလိဂွံတၚ်တုပ်စိုတ် ပ္ဍဲပေဲါကောံဓရီုနူတနေံဂှ် “ဂွံနၚ်သွဟ်ၜိုတ်ဏံဂှ်တှေ် ဍေံစှေ်မံၚ်အဒေါဝ်ရလေဝ် ၜိုတ်ဏံတှေ် ညးဂမၠိုၚ်လေဝ် ပြေစိုတ် အာဂတဏံဏေါဝ်ဟီုတှေ် ပဵုတုဲ ဆက်သဳကၠဳအာလောဲဏေါဝ် ဂွံဏါတၚ်တုပ် စိုတ် သီုၜါလ္ပာ်ဗီုဏံဂှ်တှေ် ခိုဟ်ကွေံကွေံရောၚ်” ကျာ်ဇၞော်အ္စာဘာကံပလိုၚ် ဟီုရ။
ပေဲါကောံဓရီုပရေၚ်ပညဳပညပ် ကိစ္စဗော်မန်ၜါနူတနေံဂှ်ဝွံ ဆန္ဒညးဍုၚ်ကွာန်ဂမၠိုၚ်ကီု ပၟိက်ဆန္ဒခၟဳသၚ်ကျာ်ဇၞော်အ္စာ ဂမၠိုၚ်ကီု ဂကောံသၚ်သၟတ် ဂကောံသၟတ်ဂမၠိုၚ်ကီုဂှ် သ္ၚဳဂၠိပ်ကေတ်ပေဲါရုဲမာဲအကြာ တုဲကၠုၚ် ဧပြဳ ၁ ဂှ်တုဲ ပၟိက်ဆန္ဒ ပရေၚ်ပံၚ်ဗစပ်ဂှ် ပဵုတုဲ ဇြဟတ်ဓရိုဟ်တေၚ်ကၠုၚ်နွံရ။

ပြဟ်ဟ်ဏံ သဳကၠဳပညဳပညပ်ဟွံဒှ်မွဲဗော်ဂှ်တုဲ ၂၃ တ္ၚဲဏံမ္ဂး ဗော်ဒဳမဝ်ကရေဇြဳကောန်ဂကူမန်ဝွံ စဓမံက်ရုပ်ရဴ သွက်ဂွံ ပ္တိုန်လိက်အခေါၚ်ပံက်ရောၚ်ဂှ်လေဝ် ညးက္ဍိုက်ပ်စၞးဗော်ဒဳမဝ်ကရေဇြဳကောန်ဂကူမန် ဒုဥက္ကဌလၟိဟ်(၂)နာဲတၠနန် သောၚ်ကလးလဝ်ကဵု ညးစၞးတိုန်စိုပ်ပ္ဍဲပေဲါကောံဓရီုဂှ် ဟတုဲနွံရ။

စပ်ကဵု ဗော်မန်ဒဳမဝ် ပ္တိုန်လိက်အခေါၚ်ပံက်ဗော်ဂှ် ညးလျိုၚ်သဘၚ်ကၞာပေဲါကောံဓရီု တၠဂုဏ်ပုပ္ဖဟံသာဟီု “ ဗော် မန်ဒဳပံက်ဗော်ပရေၚ်ဍုၚ်ကွာန်တုဲ ပ္တိုန်လိက်ဂှ် လ္ပပ္တိုန်ဂှ် ပိုဲပဒိုအ်ဟွံဂွိုအ်ပုဟ်၊ ဆဂး ကၠာဟွံစိုပ်ပေဲါရုဲမာဲ ၂၀၁၅ တေံ ဗော်ၜါဏံ ဒးဒှ်မွဲဗော်ဟေၚ်ဂှ် ဒုၚ်ဝန်ထ္ပက်စၟတ်တဲ ဂတမုက်ညးဍုၚ်ကွာန်ပိုဲ မိက်ဂွံဂွံ၊ ပိုဲကရေပ်ဓရတ်ညးကံဟွံ သေၚ်ပုဟ် ဍာံဍာံဂှ် ဖေက်ဟွံဒှ်ဏေါဝ် ဒးကဵုထ္ပက်စၟတ်တဲ ဂတမုက်ကောန်ဂကူပိုဲ”သာ်ဏံ တၠဂုဏ်ပုပ္ဖဟံသာဟီုရ။

ဗော်မန်ၜါဗော်ဂှ် ဂွံဏါတၚ်တုပ်စိုတ်ပန်တၚ်တုဲ ထ္ပက်လဝ်စၟတ်တဲသွက်ဂွံပံၚ်ကီု ကၠာပေဲါရုဲမာဲ ၂၀၁၅ တေံ ဒးပံၚ်ဗစပ် ဒးဒှ်မွဲဗော်ဟေၚ် တုပ်စိုတ်ကီုလေဝ် ပြဟ်ဟ်ဏံ ပရေၚ်ချဳဓရာၚ်ကီု ပရေၚ်စန္ဒက်ကောန်ဂကူကီု ဒှ်အာ ၜါလွး ၜါဗီုပြၚ်တုဲ ဗော်ပရေၚ်ဍုၚ်ကွာန်မန်အပ္ဍဲသၞောဝ် ဒှ်အာၜါဗော်ရ။