စၠန်ထဝ် – သွက်ညးအာတရဴတံ ယဝ်ရယဲဒိုက်မံၚ်စဟွံခိုဟ်မ္ဂး ရန်ကဵုဂွံဝီဝတ်ယဲဂှ် သကိုပ်ဗျူဟာပၞာန်ဗၟာ အံၚ်နာဲဥူ က္ဍိုက်ဍိုက်တုဲ သတ္တဟတုဲကၠုၚ်ဏံ ပံက်ကဵုရုၚ်ဂဥုဲစေတနာ ပ္ဍဲကွာန်ဝါကနေၚ် အကြာဂၠံၚ်ကျာ်ပိ-ဇြပ်ဗုတေံရ။
ဂၠံၚ်ဟွံခိုဟ်တုဲ အဃောအာမံၚ်တရဴ မၞိဟ်ဂွံအာဘဲအန္တရာယ်တံကီု၊ ဗၜူကွဳစက်တံကီုဂှ် ဗွဲမဂတာပ်ခိၚ် ညံၚ်သ္ဂောံဝီဝတ်ကဵုမာန် ရန်တၟံသာ်ဝွံတုဲ ပံက်လဝ် ရုၚ်ဂဥုဲစေတနာရောၚ် အတိုၚ်သကိုပ်ဗျူဟာဟီုဂှ် ညးမဝဳဝတ်ကဵုမံၚ် အာစာဂဥုဲပၞာန် ဇေယျာလောန်ဟီုရ။
ညးအာတရဴတံ ပ္ဍဲဂၠံၚ်တရဴ ဂွံအာဘဲအန္တရာယ်ယဲဝေဒနာတံဂှ် ဗွဲမဂတာပ်ခိၚ် ဝီဝတ်ကဵုမာန်ရောၚ် အစာဂဥုဲဂှ် ဟီုရ။
“မၞိဟ်အာမံၚ်တရဴတံ လ္ၚဵုဂှ် ဇိုၚ်တဲဒကးအာကီု၊ ဗၜူ၊ မံၚ်ဟွံမိပ်တံဂှ်တှေ် နကဵုစေတနာ ၜိုတ်ရီုဗၚ်မာန်ဂှ် ပိုဲရီုဗၚ်ၜီကဵုရ” သာ်ဝွံ အစာဂဥုဲဂှ် ဟီုရ။
ကွာန်ဝါကနေၚ်ဂှ်ဝွံ နွံဒၟံၚ်လတူဂၠံၚ်ကွဳစက်ကာဇၞော် ဍုၚ်ဇြပ်ဗု အာဒေသပယျဵုသေံ ဍုၚ်ကျာ်ပိရ။
သွက်ဂွံလုပ်ဍုၚ်သေံ ညးအာတရဴ နူဍုၚ်ဇြပ်ဗုမွဲတၠဂှ် အဃောအာမံၚ်တရဴ ဒးအာဘဲဒါဏ်ဇၞော်ကဵုဇြဟတ်ဂှ် အစာဂဥုဲဇေယျာလောန် ဝီကဵုဗွဲမပြဟ်ရောၚ်ဂှ် တၠဆေၚ်ဖျာ ဗဒဴရုၚ်ဂဥုဲဂှ် မွဲတၠ ဟီုလဴကဵုရ။
အကာဲအရာလၟုဟ် ပ္ဍဲကွာန်ဝါကနေၚ်ဂှ် ဒပ်ပၞာန်ဗၟာ လၟိတ် (၅) သၟူတဲ စကခ (၅) ဗျူဟာ (၁) တံ ဖျေံလဝ်သဇိုၚ်ကီုရ။
တုဲကၠုၚ် ဂိတုဂျာန်နဝါရီ ရ၊ ပ္ဍဲဂိတုပုဟ်ပေၚ် အခိၚ်ပေဲါသဘၚ်ကွာန်ဝါကနေၚ်ဂှ် ဗုမ်ဗတိုဟ်အာတုဲ မၞိဟ် (၅၁) ဒးအာဝပ်တုဲ (၄) တၠ ချိုတ်အာရ။
အပ္ဍဲကဵုအကြာဂၠံၚ်ဂှ် ဒပ်ပၞာန်နာနာတံ ဖျေံလဝ်ဗဒိုပ်တုဲ ကေတ်မံၚ်အကံက်နာနာသာ်နွံရောၚ် ညးမအာတရဴ ဟီုထ္ၜးရ။
မွဲဒမြိပ်ဂၠံၚ်ကွဳစက်ကာဇၞော် ဍုၚ်ဇြပ်ဗု- ကွာန်ဝါကနေၚ်- ဍုၚ်ကျာ်ပိ ၜိုတ် ၃ ဂအုံ ၂ ဂအုံဂှ် ဒှ်တိဍာ် ဗော်ကရေၚ် ကေအဲန်ယူ တံဒပ်မဟာ (၆) တံ အုပ်ဓုပ်ရ။
