မာံအဲ – ကောံဓရီုပရေၚ်ဂကူမန်မၞုံလတူရးလ္ဂုၚ်ဂှ် ကၠောန်သ္ပဏာကောံဓရီု ဒၞာဲတိုက်ပိဋိကတ်မန်၊ ဍုၚ်လ္ဂုၚ် ပ္ဍဲစၟတ်တ္ၚဲ၂၈ ဂိတုအံက်တဝ်ပါ အခိၚ် တ္ၚဲစေၚ် (၁)နာဍဳ စပံက်ဏာသ္ဘၚ်ကၞာကောံဓရီုရ။

ပေဲါကောံဓရီုဂှ် ကမ္မတဳလိက်ပတ်ယေန်သၞာၚ်မန်ဍုၚ်လ္ဂုၚ်၊ ဂကောံမိစဴဗု၊ ဂကောံစရာဲညးဗြဴမန်၊ ဂကောံရီုဗၚ်ပရေၚ်ဂိယဲချိူတ်ဂျိုၚ်၊ အာစာနာဲထဝ်သောန်၊ ညးစၠတ်ထဝ်ၜါတၠ ဒံက်တာဗညာအံၚ်မိုဝ်၊ နာဲလှမိုၚ် ကေုံာဂကောံကမ္မတဳဂမၠိုၚ် အပံၚ်မၞိဟ်ဖအိုတ်ၜိုတ် ၄၀ တၠပြၚ်ပြၚ် တိုန်စိုပ် သ္ဘၚ်ကၞာပေဲါကောံဓရီုဂှ်ရ။

ကောန်ဂကူမန်မၞုံတန်တဴမံၚ် လ္တူဍုၚ်လ္ဂုၚ်ဂမၠိုၚ်တအ်ဂှ် စရၚ်ကၟိန်သ္ၚိအိန်ထံၚ် မကၠေံမံၚ်တအ်ဂှ်ကီု၊ စရၚ် ကောန်ဂကူ မဗၠေတ်မံၚ် ပ္ဍဲတၞးစၟတ်သမ္တီ ကောန်ဍုၚ်တအ်ကီု သွက်ဂွံပလေဝ်အာ စရၚ်သတီုလၟိဟ်ကောန်ဂကူမန် မၞုံတန်တဴမံၚ်လတူဍုၚ်လ္ဂုၚ်ကဵု ရးဒေသလ္ဂုၚ်တအ် ဂွံတီစရၚ်ချိုတ်တ်ပၠိုတ်တ်မာန်ဂှ် ကောံဓရီုချပ်သဳကၠဳအာရ။

“ ပ္ဍဲလိက်စၞးစၟတ်သမ္တီကောန်ဍုၚ် ဒၞာဲယၟုကောန်ဂကူဂှ်လ္ၚဵုဂှ်ဒှ်မံၚ် မန်-မျာန်မာ၊ လ္ၚဵုဂှ်ဂကူမန်ကီုလေဝ် ချူလဝ်ဂကူဗမာ၊ စရၚ်ကၟိန်သ္ၚိအိန်ထံၚ် ကောန်ဂကူမန် မၞုံပ္ဍဲဍုၚ်လ္ဂုၚ်တအ်ဗွဲမဂၠိုၚ်ဂှ်လေဝ် လ္ၚဵုဂှ်ဒှ်မံၚ်စရၚ် ကၟိန်အိန်ထံၚ်သ္ၚိဗၟာ၊ ဣဏအ်ဂှ် ဒှ်ဝါဒကလက်ဂကူပိုဲဏောၚ်” ဒံက်တာဗညာအံၚ်မိုဝ် ဟီုပ္ဍဲကောံဓရီုဂှ်ရ။

မွဲသာ်ပၠန် ကောန်ဂကူမန်တအ် မကၠုၚ်ဖျေံဒၟံၚ်သဇိုၚ် ပ္ဍဲလ္တူဍုၚ်လ္ဂုၚ်၊ ဒေသရးလ္ဂုၚ်တံဂှ် လ္ၚဵုကၠောန်ကၠအ် ကၠောန်ဝါဗ္ၚ ကေုာံပရေၚ်ကမၠောန် နာနာသာ်တအ်ကီုလေဝ် ဟွံဂွံပြံၚ်နၚ် စရၚ်သ္ၚိကၟိန်အိန်ထံၚ်တုဲ စရၚ်လၟိဟ်ကောန်ဂကူမန် ဟွံပါလုပ်ပ္ဍဲစရၚ်မၞိဟ်ဒေသရးလ္ဂုၚ်မ္ဂး စိုပ်ကာလပေဲါရုဲမာဲဂှ် လၟိဟ်ကောန်ဂကူမန်ဟွံဂွံပေၚ်ရ။

ဒံက်တာဗညာအံၚ်မိုဝ်ဂှ် “စရၚ်လၟိဟ်ကောန်ဂကူမန်အောန်မံၚ်တုဲ အတိုၚ်သ္ဇိုၚ်သၞောဝ်ဥပဒေဒက်ပတန်လဝ်မ္ဂး လၟိဟ်ကောန်ဂကူမန်ဟွံပေၚ်ဒှ်အာတုဲ သွက်ဂွံလုပ်ဒုၚ်ရုဲမၞိဟ်စၞးအမာတ်မန်မွဲတၠ သွက်ကောန်ဂကူမန် ပ္ဍဲရးလ္ဂုၚ်ဂှ် ဟွံလောဲရ၊ ကိစ္စဏအ်ဂှ် ဂကောံကမ္မတဳကောန်ဂကူမန် မၞုံလ္တူဍုၚ်လ္ဂုၚ်တံ ဒးဘိုၚ်ရေၚ်တၠုၚ်ကၠောန်သ္ပအာအိုတ်ညိ။” သာ်ဝွံ ဟီုရ။]

သွက်ဂွံကံက်စရၚ်ကောန်ဂကူမန်၊ ဂွံဘိုၚ်ပလေဝ်အာတၚ်နၚ် စရၚ်ကောန်ဂကူမန်မဒှ်မံၚ် မန်-မျာန်မာပ္ဍဲတၞးစၟတ်သမ္တီကောန်ဍုၚ် မမၞုံတန်တဴဒၟံၚ်လတူဍုၚ်လ္ဂုၚ်တံဂှ် နူကဵုပေဲါကောံဓရီုသဳကၠဳ ဖျေံဗီုပြၚ်ဗီုကမ္မတဳတုဲ နူဂကောံမိစဴဗုကေတ်တာလျိုၚ် ကမ္မတဳကံက်စရၚ်ကောန်ဂကူမန်ရောၚ် ဂွံတီရ။

“သွက်ဂွံကံက်စရၚ် သတီုလၟိဟ်ကောန်ဂကူမန် မၞုံဒၟံၚ်လတူဍုၚ်လ္ဂုၚ်ကီု ပ္ဍဲရးဒေသလ္ဂုၚ်ကီု သွက်ဂွံပလေဝ်အာတၚ်နၚ်မဗၠေတ်ဗၠေၚ်မံၚ် ပ္ဍဲကောန်ဂကူမန်ပိုဲကီု၊ စရၚ်ကောန်ဂကူမန်မစုတ်လဝ် မန်မျာန်မာ မန်ဗမာပ္ဍဲတၞးစၟတ်သမ္တီကောန်ဍုၚ် နူကဵုဂကောံမိစဴဗုပိုဲကေတ်တာလျိုၚ်တုဲ ဘိုၚ်ရေၚ်တၠုၚ်အာကဵုဏောၚ်” သာ်ဝွံ နူညးတာလျိုၚ်ဂကောံမိစဴဗု မိကောန်ချေတ်ချေတ် ဟီုရ။

အပ္ဍဲပေါဲရုဲမာဲ ၂၀၁၀ တေံဂှ် အပ္ဍဲဒေသရလ္ဂုၚ်ဂှ် ကောန်ဂကူကရေၚ် ကေုာံကောန်ဂကူ ရခေၚ်တံ ဂွံကၠုၚ်ညးစၞးအမာတ်ကောန်ဂကူညးတံကီုလေဝ် ကောန်ဂကူမန်တံဂှ် ဟိုတ်နူလၟိဟ်မၞိဟ်ဟွံပေၚ် ၅၇၀၀၀- တၠဂှ် ဟွံဂွံဒၞာဲအမာတ်ကောန်ဂကူမန်မွဲတၠ ဒှ်ကၠုၚ်လဝ်နွံရ။