သၟတ် (၄၀) တၠပြင် ဒးဒုင်ရပ် နူက္ၜင်မဂြိပ်ဒၟင်ပ္ဍဲဍာန်ဍာ် ဂကောံတ္ကံ-ဗိက်၊ ရးဒေသ ဇၞော်တၞင်သဳဂှ်ဝွံ သွက်သ္ဂောံကၠုင်နုက်ကေတ်နကဵုသြန်ဂှ် နူကဵုဗဒိုပ်ဒပ်ဂကောံတ္ကံဍုင်မွဲ ဟီုဂးကၠုင်လဝ်ရောင် ဂွံတီကေတ် နူညးစုက်လုက်ကဵု တၠခန္ဓတံရ။

ပ္ဍဲဂိတုမာတ် စၟတ်တ္ငဲ (၁၆) တုဲကၠုင်ဏံ ညးအာတရဴ ၜိုတ် (၁၀၀) တၠ ပါဗက်ကၠုင် ပ္ဍဲက္ၜင် “၉၉၉” နူကွာန်ဂါန်မဝ်၊ ပွိုင်ဍုင်ဂကောံတ္ကံ အာဇရေင်ဍုင်ဗိက်ဂှ်ဝွံ ကာလစိုပ်တ္ကံမွဲ ဗဒဲါဂကောံကွာန်မအိုင်၊ ဒၞာဲလုပ်ဍုင်ဗိက်ဂှ် ဒပ်ကမ္မယှေန်ပၞာန် ဂေတ်မင်ကင်နကဵုက္ၜင်တံ ဗဒေံါစၟဳစၟတ်တုဲ ရပ်ကော်ဏာသၟတ် (၄၀) တၠပြင် နူလ္တူက္ၜင်ဂှ်ရ။

ညးဒးဒုင်ရပ်ကော်ဏာ နူလ္တူက္ၜင်ဂမၠိုင်တံဂှ်ဝွံ ရပ်ထိင်ဒဝ်လဝ် ပ္ဍဲဗဒိုပ်ဒပ်ကမ္မယှေန်ပၞာန်မွဲတုဲ ညးမွဲတၠမ္ဂး ကၠုင်နုက်ကေတ်နကဵုသြန် (၁၃၀) ကိုဋ်တုဲ ညးကဵုဟွံမာန်တံဂှ် ကော်ဏာ ဇရေင်တန်ဗ္တောန်ပၞာန်ရောင် ဟီုဂးဘပဠလဝ်နွံရဂှ် ညးစုက်လုက်ကဵု ညးဒးဒုင်ရပ်မွဲတၠဂှ် ဟီုရ။

“စကၠာဂှ်တှ်ေ စၟဳစၟတ်ကာဒ်ကောန်ဍုင်ဏောင်ဂးတုဲ ကော်ဖျေံနူလ္တူက္ၜင်ရ။ အပ္ဍဲဂှ်တှ်ေ ရုဲဏာ သၟတ်အာယုက် (၂၀) ပြင်တံရ။ ကွးဘာတံလေဝ် ပါအာကီုရ။ သမာတ်ကာဒ်ဟွံမွဲ ကၠောန်ကဵုဏောင်ဂးတုဲ ကော်ဏာရ။ ကာလစိုပ်တေံဂှ် ဒးကၠုင်နုက်ဏောင်ဂး။ ဟွံနုက်တှ်ေ ဒးတိုန်တန်ဗ္တောန်ပၞာန်ဏောင်။ ဂလိုင်လဵုရောသၟာန်ဂှ်တှ်ေ ညးမွဲတၠ ဒးကၠုင်နုက် (၁၃၀) ကိုဋ်ဏောင်။ ကွးဘာတံတှ်ေ ညးမွဲတၠ (၃) ကိုဋ်” သာ်ဝွံ ညးစုက်လုက်ဂှ် ဟီုရ။

ဂိတုမာတ် (၁၈)၊ နူတနေံဏံဝွံ မိမ/ညးထိင်ဒဝ်တံ ကၠုင်စိုပ်ကဵုလဝ်သြန် သၟတ် ၜိုတ် (၆) တၠဂှ် က္လေင်ဗၠးကၠုင်ကီုလေဝ် ညးဒးဒုင်ထိင်ဒဝ်လဝ် နွံဗွဲမဂၠိုင်ဏီရောင် ဂွံတီကေတ်ရ။

ညးဟွံဂွံအဆက်စၠောံကဵု ဂကောံသ္ငိကၟိန်တံဂှ် နူဍာန်ဍာ်မွဲတဆင် ဒးဒုင်ပလံင်ဏာ ဇရေင်ဒပ်ပကတ်ပကေတ်ဗိက်တေံရောင် ညးတြုံ နူဒေသဗိက်မွဲတၠ ဟီုဂးသ္ငဳဂၠိပ်လဝ်ရ။

“ပြဟ်ပြဟ်ဏံ နွံမင်လ္ပာ်ဂကောံတ္ကံဏီရ။ ညးကၠုင်နုက်ဟွံမာန်တံဂှ်တှ်ေ ခြာဟွံလအ်ဏံ နူကဵုဍာန်ဍာ်ဂှ် ပလံင်ဏာ ဗဒိုပ်ပကတ်ပကေတ်ဗိက်တေံမာန်ရ။ ဂကောံသ္ငိကၟိန်တံဂှ်တှ်ေ ညံင်ဟွံဂွံစိုပ်တန်ဗ္တောန်ပၞာန်ဂှ် ဗက်ပ္တိတ်မင်အိုတ်ရ။ အပ္ဍဲဂှ်တှ်ေ ညးလ္ၚဵုတံ ကဵုသြန်ဟွံမာန်ပုဟ်။ မၞိဟ်ဗီုဂှ်တှ်ေ ပ္တိတ်ဟွံဂွံရပုဟ်” သာ်ဝွံ ညးတြုံဂှ် ဟီုရ။

သ္ကုတ်ဂၠံင်ဍာန်ဗလးတိ နူဗိက် – ပွိုင်ဍုင်ဂကောံတ္ကံဂှ်ဝွံ ဟိုတ်နူအကာဲအရာ ပရေင်ဂီုကၠီုတုဲ နကဵုဂၠံင်ဍာန်ဍာ်ဟေင် ညးဒေသတံ အဓိကအာကၠုင်ဒၟင်ရ။

ညးဍုင်ကွာန်အာကၠုင်ဒၟင် နကဵုက္ၜင် နူကဵုဂၠံင်ဍာန်ဍာ်ဂှ်ဝွံ ကမ္မယှေန်ပၞာန်တံ စၟဳစၟတ်၊ ရပ်စပ် ကေုာံ ပန်ဘပဠဒၟင် နွံရဂှ်လေဝ် ဂွံတီကေတ်ရ။

သၟတ်အလုံမွဲဍုင်တံဂှ်ဝွံ နူကမ္မယှေန်ပၞာန်တံ သကဵုတိုန်တန်ဗ္တောန်ယိုက်ဂၠေင်ပၞာန် ဗွဲအဓမ္မတုဲ စဵုကဵုလၟေင် (၂၂) ဂိတုဖေဖဝ်ဝါရဳတုဲကၠုင်ဏံမ္ဂး ပကောံဂွံဇြဟတ်ညးယိုက်ဂၠေင်ပၞာန် စဵုကဵုမွဲကိုဋ် နွံရဂှ်လေဝ် ဂကောံလ္ၚတ်ဆေင်ကဵုဂီုကၠီု ကေုာံ ကေင်ကာလ္ပာ်ပၞာန်ဗၟာ MDSI ဟီုရ။

နဒဒှ်အဆက်ဖဵုသၞောဝ်ဥပဒေ ဒးယိုက်ဂၠေင်ပၞာန်ဂှ်တုဲ သၟတ်ဂၠိုင်ကဵုလ္ၚီ ဒးဒုင်ရပ်ပကောံ ဟွံဗဗွဲဓဝ်၊ ပ္ဍဲကဵုမုက်ပၞာန်ဂှ်လေဝ် ဒးဘဲဇီုကပိုက်ချိုတ်ဂျိုင်ဗွဲမဂၠိုင်တုဲ အနာဂတ်သၟတ်တံ သကဵုဒးဘဲဇီုကပိုက်ဇၞော်ကဵုဇြဟတ်ရဂှ်လေဝ် ဓမံက်ထ္ၜးလဝ် ပ္ဍဲလိက်ဒုင်စဳရေင် MDSI ရ။