ပ္ဍဲကဵုဒေသကၞောတ်ၜဳရေဝ်၊ ပွိုင်ဍုင်ရေဝ်ဂှ် ဟွံဒှ်ပေဲါဗ္တိုက်မွဲသာ်ကီုလေဝ် ဂိတုအံက်တဝ်ဗာ စၟတ်တ္ၚဲ (၁၄) ၊ နူတနေံဏံ အခိင်သ္ဂာဗ္တံဂှ် ဒပ်ကမ္မယှေန်ပၞာန်တံ ပန်ဗ္တိုက် ဂြာတ်ထောံဖျေံလဝ်ဗမ်ကဵု က္ၜင်ကျာပၠန်ရောင် တမ်ရိုဟ်ပရိုင်အပ္ဍဲဒေသတံ ဟီုရ။
ဒပ်ကမ္မယှေန်ပၞာန်တံဝွံ အကြာကွာန်ခၟောံ(ကင်းမွန်း) ကေုာံ ဒါပျာ၊ ဒေသကၞောတ်ၜဳရေဝ်ဂှ် ဂြာတ်ထောံဖျေံဗမ် ပံင် (၅၀၀) ၜါမရဂှ် ဂွံတီကေတ် ဗွဲကိုပ်ကၠာရ။
“ဒၞာဲဂှ်ဂှ် ကၠာတေံတှ်ေ ဒၞာဲသၠာတ်တန်ဗ္တောန်တြေံ တမ်ဒပ် (၂၇) KNLA ရ။ မၞိဟ်ဂှ်တှ်ေ ဟွံဒးဘဲဇီုကပိုက်ပုဟ်။ လ္ပာ်ဂှ်ဂှ် ညးမွဲမှ ဟွံမံင်ပုဟ်လေ” သာ်ဝွံ တမ်ရိုဟ်ပရိုင်ကၞောတ်ၜဳရေဝ်မွဲတၠ ဟီုရ။
ဟိုတ်နူပန်ဗ္တိုက်ထောံဖျေံဗမ်ဂှ်တုဲ မၞိဟ်ဒးဘဲဇီုကပိုက်ချိုတ်ဂျိုင် ဟွံမွဲကီုလေဝ် ကၠအ်ဂူယာလ္ၚဵု လီုလာ်အာနွံ ဂးရ။
အပ္ဍဲဒေသကၞောတ်ၜဳရေဝ်ဝွံ အကြာဒပ်ကမ္မယှေန်ပၞာန်ကဵု ဒပ်ပံင်ကောံပၠန်ဂတးတံ က္တဵုဒှ်ပေဲါဗ္တိုက်ကီု၊ ပရေင်ထ္ပက်ကရောင်ပၞာန် ဟွံမွဲကီုလေဝ် ပန်ဗ္တိုက်ထောံဖျေံဗမ်မံင်ကဵု က္ၜင်ကျာကြာန်ကြာန်ကီုနွံရောင် တမ်ရိုဟ်ပရိုင်ပၠန်ဂတးမွဲတၠ ဟီုရ။
“ကရောင်ပၞာန်လုပ်ကၠုင်လေဝ် ဟွံမွဲပုဟ်၊ ဗီုကဵုဟွံထေင်လဝ်မွဲသာ် ထောံဖျေံမံင်ဗမ်ကဵုၜင်ကျာရ” သာ်ဝွံ ဟီုရ။
ဒေသကၞောတ်ၜဳရေဝ်ဂှ် အပ္ဍဲဂိတုမေကဵု ဂိတုဂျောန်တုဲကၠုင်တေံ ဒပ်ကမ္မယှေန်ပၞာန်တံ ပန်ဗ္တိုက်ထောံဖျေံဗမ်ကဵုက္ၜင်ကျာ အဆက်ဆက်တုဲ မၞိဟ်ဒးဘဲချိုတ်ဂျိုင်လေဝ် နွံဗွဲမဂၠိုင်ကီုရ။
ပပ္တံနူအခိင်ဝွံတုဲ နူကဵုဒေံါဇူလဝ် ပရေင်စကာဗ္တိုက်ကဵုက္ၜင်ကျာဂှ် လၟုဟ်ဏံ က္လေင်စကၠုင်ပၠန်ရောင် ဂကောံဒပ်ပၠန်ဂတးတံ ဟီုရ။
စနူကဵုဒပ်ပၞာန်သီအဝဵု ဂိတုဂျာန္နဝါရဳ၊ သၞာံ (၂၀၂၄) စဵုကဵုဂိတုဂျူလာင်၊ သၞာံ (၂၀၂၆) ဏံဝွံ ပရူဒဒှ်ဂကောံကမ္မယှေန်ပၞာန် ပန်ဗ္တိုက်ကဵုက္ၜင်ကျာ နွံကၠုင် (၂၄၄၉) ဝါတုဲ ကောန်ညးဍုင်ကွာန်တံ ဒးဒုင်စွံကၠုင်ပွန် ကြပ် (၇၀) တၟံကၠံ ပါလုပ်မံင်ရောင် ဂွံတီကေတ် နူတင်နင်စၟတ်သမ္တီ ဂကောံမင်ရံင်လၟေင်ကမၠောန်ပရေင်ၜိုဟ်လလမ် – BNI “MPM” ရ။