သၞေဟ်ကင်စၟဳစၟတ်ဒဒန်ရေဝ်၊ ပွိုင်ဍုင်ရေဝ်၊ တွဵုရးဍုင်မန်ဂှ် တမ်ဒပ်လကိုဟ်ရေဝ်တံ ပန်ဗ္တိုက်လဝ်တုဲ လ္ပာ်ဒပ်ပၞာန်တံ ပြဟ်လလုဲအာ (၂) တၠရဂှ် ဂွံတီကေတ်ရ။
ဂိတုနဝ်ဝေမ်ဗာ စၟတ်တ္ၚဲ (၂) ၊ နူတနေံဏံ အခိင်တ္ၚဲစေင် ၜိုတ် (၂း၃၀) နာဍဳ၊ ကောန်သဂံင်ယိုက်ဂၠေင်မံင်တာလျိုင် ပ္ဍဲသၞေဟ်ကင်စၟဳစၟတ်ဒဒန်ရေဝ် (၂) တၠ အဃောတိတ်ကၠုင်ကဵုကွဳလိုန်ဓာတ်ဂှ် ဂကောံလကိုဟ်ရေဝ်တံ ပန်ဗ္တိုက်ဏာလဝ်ရ။
ပ္ဍဲကဵုပန်ဗ္တိုက်သၞေဟ်ကင်စၟဳစၟတ်ဒဒန်ရေဝ်ဂှ်ဝွံ “မောင်ဝေဟင်ပိုင်” အဆံင်ဗိုလ်ဍောတ် (ဗိုလ်လေး) ကဵု ကောန်သဂံင်ယိုက်ဂၠေင်ပၞာန် ဟွံတီယၟုမွဲတၠ ပြဟ်လလုဲအာလဝ်ရောင် ဂကောံလကိုဟ်ရေဝ်တံ လလောင်ပ္တိတ်လဝ်ရ။
“မောင်ဝေဟင်ပိုင်” အဆံင်ဗိုလ်ဍောတ်ဂှ်ကဵု ကောန်သဂံင်ယိုက်ဂၠေင်ပၞာန်ဟွံတီယၟုတံ တိတ်ကၠုင် သွက်ဂွံသွံတြး ဂဥုဲၜူမာဲအပ္ဍဲဒေသဂှ် ပန်ဗ္တိုက်လဝ်ရောင် ဂကောံလကိုဟ်ရေဝ် ဂးရ။
“ကောန်သဂံင်ဒးမံင်တာလျိုင် ပ္ဍဲသၞေဟ်ကင်စၟဳစၟတ်ဒဒန်ရေဝ် (၂) တၠ အဃောတိတ်ကၠုင်ကဵုကွဳလိုန်ဓာတ် နူသၞေဟ်ကင်ဂှ် လကိုဟ်ရေဝ်တံ ဗ္တိုက်ဏာရ။ ချိုတ်အာသီုၜါတၠရဂှ် ဂွံတီကေတ်ရ” သာ်ဝွံ တမ်ရိုဟ်ပရိုင်ပရေင်ပၞာန်မွဲတၠ ဟီုရ။
နူကဵုကောန်သဂံင်ဒပ်ပၞာန် ပြဟ်လလုဲအာ (၂) တၠဂှ် သီဂွံဏာ ဂဥုဲၜူမာဲ WY (၆) မ၊ သြန် (၂၀၀၀၀) ဒကေဝ်ပြင်ကဵု ဖုင် နွံရဂှ်လေဝ် ဂကောံလကိုဟ်ရေဝ် လလောင်ပ္တိတ်လဝ်ရ။
ဗဒိုပ်ကင်၊ သၞေဟ်ကင်၊ ဗဒိုပ်ဒပ် ကမ္မယှေန်ပၞာန် မနွံအပ္ဍဲပွိုင်ဍုင်ရေဝ်ဂှ် ဂကောံလကိုဟ်ရေဝ်ကီု သီုဂကောံပၠန်ဂတး ချဳဓရာင်မံင်အပ္ဍဲဒေသတံ လုပ်စိုပ်ပန်ဗ္တိုက်ဒၟံင် မွဲနှေံမွဲနှေံတုဲ လ္ပာ်ဒပ်ပၞာန်တံ ဒးဘဲဝပ်ချိုတ်ဂျိုင်လေဝ်နွံရ။