ကရောင်ပၞာန်ကမ္မယှေန်ပၞာန် မလုပ်စိုပ်ကၠုင် လ္ပာ်ကွာန်ဒူရာ၊ ဒေသဖာလိန်၊ ပွိုင်ဍုင်ရေဝ်၊ တွဵုရးဍုင်မန်ဂှ် ဒပ်မန်ရာမည RMA တံ ဗ္တိုက်တဝ်စၞေဟ်ဏာလဝ် နကဵုမာင်ရဂှ် ဂွံတီကေတ် နူကဵုလိက်လလောင်ပ္တိတ်ဂှ်ကီုရ။
ကရောင်ပၞာန်ကမ္မယှေန်ပၞာန် မနွံဇြဟတ် (၅၀) ပြင်တံဂှ်ဝွံ ပ္ဍဲဂိတုအံက်တဝ်ဗာ စၟတ်တ္ၚဲ (၃၀) တုဲကၠုင်ဏံ အခိင်ဗ္တံ ၜိုတ် (၈) နာဍဳဂှ် မလုပ်စိုပ်ကၠုင် လ္ပာ်ကွာန်ဒူရာ နကဵုကွဳစက်ပၞာန် (၂) ဖ္ဍိုက်ရ။
တုဲပၠန် ဂိတုအံက်တဝ်ဗာ (၃၁) ၊ အခိင်နူဂယး အကြာ (၆) နာဍဳဂှ်မ္ဂး ကရောင်ပၞာန်ဂှ် တရးလဝ်ဇြဟတ် ပ္ဍဲဇြပ်မ္ၚးကွာန်ကဵု ဂၠံင်ဍာန်လုပ်တိတ်ကွာန်ဂှ်ရောင် ညးဒေသ ဟွံမိက်ဓမံက်ယၟုမွဲတၠဂှ် ဟီုရ။
“တ္ၚဲတၟးဗက်ဂှ် ဂွံဆဵုကေတ်ဍေံတံ ဒၞာဲဇဳ အလုံမွဲကွာန်ရ။ တုဲတှ်ေ ဟွံလအ်မွဲသာ် ပ္ဍဲကဵုဇြပ်မ္ၚးကွာန် ဍေံတံနွံမံင်ဂှ် ဂွံမိင်ကေတ် ဗမ်ဟတိုဟ်ရ။ ဆဂး ဒးအာဟာ၊ ဟွံဒးပုဟ်ဟာဟီုဂှ် ဟွံတီချိုတ်ပုဟ်။ ဆဂး လီုလာ်အာရ” သာ်ဝွံ ညးဟီုရ။
ယင်ကရောင်ပၞာန်ဂှ်ဝွံ ဒှ်ကရောင်ပၞာန်မတိတ်ကၠုင်နူ (ခမရ ၅၈၆ ကဵု ၂၉၉) ဖျေံသဇိုင်ပွိုင်ဍုင်ရေဝ်ဂှ်ရောင် ဂွံတီကေတ် နူလိက်လလောင် RMA ရ။
ဗွဲကြဴနူဗ္တိုက်တဝ်စၞေဟ်ကဵုမာင်တုဲဂှ် ဒပ်မန်ရာမည RMA ဟွံဒးဘဲဇီုကပိုက်မွဲသာ် က္လေင်ဆုတ်တိတ်မာန်တုဲ လ္ပာ်ဒပ်ကမ္မယှေန်ပၞာန်တံ အကြာပ်ဒပ်ဇၞော် (၁) တၠပါလုပ်ကီု သီုဖအိုတ် ဒးအာဘဲဝပ် (၃) တၠနွံရဂှ် ဓမံက်ထ္ၜးလဝ် ပ္ဍဲလိက်လလောင်ရ။
ပ္ဍဲဂိတုအံက်တဝ်ဗာ စၟတ်တ္ၚဲ (၂၆) တုဲကၠုင်တေံ ဟိုတ်နူဗဒိုပ်သၞေဟ်ကင်ဍုင်တြေံ ဒပ်ကမ္မယှေန်ပၞာန် ဒးဒုင်ဗ္တိုက်တဝ်စၞေဟ်လဝ်ဂှ်ရ ထ္ပက်ကၠုင်ကရောင်ပၞာန် လ္ပာ်ကွာန်ဒူရာရောင် ညးဒေသဂမၠိုင်တံ ဟီုရ။