မိက်ဂွံဆဵုကဵု UNFC ဗွဲမပြဟ်ရောၚ်ဂှ် ဝန်ဇၞော် ဥူအံၚ်မေန် ကဵုနၚ်ပရိုၚ်

by | Oct 24, 2012 | ပရိုၚ် | 0 comments

ဌာန်ပရိုၚ်ဗၠးၜးမန် – ကမ္မတဳ ဓမံက်ပရေၚ်ၜိုဟ်လလမ် ဝန်ဇၞော် ဥူအံၚ်မေန် နူရုၚ်သမတ ဍိုက်က္ဍိုပ်ဂှ် မိက်ဂွံဆဵုကဵု ကံၚ်ဇြဳဖက်ဒရေဝ် ဂကူကောန်ဍုၚ်အရၚ် ညဳသၟဟ် UNFC ဗွဲမပြဟ်ရောၚ်ဂှ် ကဵုနၚ်လဝ်ပရိုၚ်ရောၚ် ညးအုပ်ကာနာနာ UNFC နာဲဟံသာ ဟီုရ။

“ဥူအံၚ်မေန် မိက်ဂွံဆဵုပြဟ်ပြဟ် အကြာတ္ၚဲဏံဏောၚ်ဂှ် ကဵုနၚ်ပရိုၚ်ကဵု ဥူညဵုအုၚ်မျေတ် မွဲကဆံၚ်။ ဂိတုဏံ လက္ကရဴ ၂၅ တုဲမှ ဆဵုမာန်ဏောၚ်ဂှ်လေဝ် အဲကလေၚ်ကဵုဏာပရိုၚ်” သာ်ဝွံ နာဲဟံသာ ဟီုရ။

ဆဵုဂဗ ဗွဲပလးဟေၚ် မဒှ်တုဲ ပရူပရာလဵု သဳကၠဳဂှ် နကဵု UNFC ဟွံဂွံဖျေံသ္ဂုတ်သွာတ်ဏီရောၚ်ဂှ်လေဝ် ညးဟီုရ။

နာဲဟံသာသောၚ်ကလးကဵုဌာန်ပရိုၚ်ဗၠးမန်

ညးစၞးဂကောံ UNFC ၁၉ တၠ စိုပ်မံၚ် ဍုၚ်ဂျပါန်တုဲ အကြာတ္ၚဲဏံ သွက်ဂွံကလေၚ်စိုပ်ကၠုၚ် ဍုၚ်သေံ နွံဂှ်ရ ကာလဂှ်မှ ဗီုပြၚ်လဵု ဆဵုဂဗသဳကၠဳကဵု ဥူအံၚ်မေန်ဂှ် အကြာဂကောံ သဳကၠဳအာ သောဲသောဲဗြောဲဗြောဲရောၚ် ဂွံတီကေတ်ရ။

ဟိုတ်နူ နိပန်ဖံၚ်ဒေရှေန် Nippon Foundation နူဍုၚ်ဂျပါန် ဘိက်ပၟိၚ်လဝ်ဂှ်ရ ညးစၞး UNFC တံဂှ် တိတ်အာဍုၚ်ဂျပါန် နူဂိတုအံက်တဝ်ပါ ၁၇ တုဲ လအ်ပွိုၚ်မွဲသတ္တဟရောၚ် ဂွံတီကေတ်ရ။

နိပန်ဖံၚ်ဒေရှေန်ဂှ် သွက်သ္ဂောံကဵုအရီုအဗၚ် ညးဒှ်ဒဒိုက် ပ္ဍဲဒေသပယျဵုကေုာံ တိဍာ်ကောန်ဍုၚ်အရၚ်တုဲ ထံက်ပၚ်အာ အရီုအဗၚ် မညဳသၟဟ်ကဵု ဒဝ်ဠာအမေရိကာန် ၃ ပြကောဋိကိုဋ်ရောၚ်ဂှ်လေဝ် တုပ်လဝ်စိုတ်ကဵု UNFC တုဲရ။

“ရံၚ်ကဵုအကာဲအရာဗီုပြၚ်ပထဝီတုဲ အရီုအဗၚ်လ္ၚဵုတံဂှ် သွက်ဂွံပလံၚ်ကဵု နူဂကောံမျာန်မာအဳဂရက် မွဲကဆံၚ်ဂှ် အလဵုအသဳတံ ကဵုလဝ်အခေါၚ်တုဲရောၚ် ဥက္ကဋ္ဌ နိပန်ဖံၚ်ဒေရှေန် ဟီုလဴလဝ်ကဵုပိုဲကီု။ နူကဵုပယျဵုဍုၚ်သေံဏံလေဝ် ပလံၚ်ဏောၚ်။ ပ္ဍဲတိဍာ်ကောန်ဍုၚ်အရၚ် ကောန်ဂကောံ UNFC ဟွံသေၚ် တွဵုရးသေံကဵု ယခေၚ်ဂှ်လေဝ် စဳဇန်လဝ် သွက်ဂွံကဵုအရီုအဗၚ်ကီု” သာ်ဝွံ နာဲဟံသာ ဟီုရ။

နိပန်ဖံၚ်ဒေရှေန်ဝွံ ကဵုမံၚ်အရီုအဗၚ် သွက်ပရေၚ်မၞိဟ်သၟးဟွံသေၚ် သွက်ဂွံလုပ်ပ္ညဳပ္ညပ် အကြာကမၠောန်ဓမံက်ပရေၚ်ၜိုဟ်လလမ် အလဵုအသဳဗၟာကဵု ဒပ်ပၞာန်ရပ်လွဟ် ကောန်ဍုၚ်အရၚ်တံဂှ်လေဝ် ဖျေံလဝ်အစဳအဇန် နွံရောၚ် ဂွံတီကေတ်ရ။

ဝန်ဇၞော်ဥူအံၚ်မေန်ဂှ် ၜိုန်ရဂွံတၚ်တုပ်စိုတ် ဒေံါပန်ပှော် ကုဂကောံရပ်လွဟ် ကောန်ဍုၚ်အရၚ် ၁၀ ဂကောံကီုလေဝ် ပ္ဍဲအရာသဳကၠဳ ပရေၚ်ဒေံါပန်ပှော် ကုဂကောံဗၠးၜးကချေၚ် KIO မဒှ်ကောန်ဂကောံ UNFC ဂှ် ဟွံအံၚ်ဇၞးဏီရ။

ပ္ဍဲဂကောံ UNFC ဗော်ရပ်လွဟ် ကောန်ဍုၚ်အရၚ် ၁၁ ဂကောံဂှ် ဒပ်ပၠတရဴကောန်ဂကူချေၚ် CNF၊ ဗော်ဂဥုပ်ဗၠးၜးကချေၚ် KIO၊ ဗော်ဂဥုပ်ကောန်ဂကူကရေၚ် KNO၊ ဗော်တဴတက်ကရေၚ်ဍာဲ KNPP၊ ဗော်သွးကောန်ဂကူကရေၚ် KNU၊ ဂကောံဒဳမဵုကရက်တေတ်ဠာဟူ LDU၊ ဗော်ညဳသၟဟ်ကောန်ဂကူယခေၚ် NUPA၊ ဗော်ဍုၚ်မန်တၟိ NMSP၊ ဒပ်ပၠတရဴ ဗၠးၜး ဍုၚ်ပလံၚ် PSLF၊ ဗော်ဂဥုပ်ဗၠးၜး ကောန်ဂကူပအိုဝ် PNLO၊ ဗော်တဴတက်ဍုၚ်သေံ SSPP-SSA ကေုာံ ဗော်ဂဥုပ်ကောန်ဂကူ ဝ WNO တံ ပါလုပ်အိုတ်ရ။

Written by

Related Posts

ပ္ဍဲသခႅဠဗူရဳ (ဝင်က) ဂှ် ကၠောန်သၠုင်ပ္တိုန်ကဵုအဆံင်ၝာတ် စဵုသၞာံဏံအိုတ်ဏောင် ဂး

ပ္ဍဲသခႅဠဗူရဳ (ဝင်က) ဂှ် ကၠောန်သၠုင်ပ္တိုန်ကဵုအဆံင်ၝာတ် စဵုသၞာံဏံအိုတ်ဏောင် ဂး

ပ္ဍဲကဵုရုင်ပွိုင်ဍုင် (ရုင်အာမ်ဖေ) သင်ခႅဠဗူရဳ (ဝင်က) မၞုံခရိုၚ်ကမ္မရဳ ကၟိန်ဍုၚ်သေံဂှ်ဝွံ သၞာံဏအ် စနူဂိတုဂျောန်မံက် ဓမံက်ရုပ်ရဴ ကၠောန်သၠုင်ပတိုန်အဆံင်ၝာတ် ကဵု ညးဍုင်ကွာန်တံတုဲ စဵုကဵုသၞာံဏံအိုတ် ကၠောန်ကဵုညံင်ဂွံတုဲဒှ်အာရောင် ဂွံတီကေတ် နူသၞာဲဒဴကၠောန်ဒၟံင်ကမၠောန် (ပ္ဍဲရုင်အာမ်ဖေ) မွဲတၠဂှ် ဟီုရ။

ကောန်ဂကူမန် စိုပ်ယူရောပ်တအ် ကၠောန်ဗဒှ်လဝ်သဘင်ဥတုကညင် ပ္ဍဲဍုင်နေဝ်တာလာန်

ကောန်ဂကူမန် စိုပ်ယူရောပ်တအ် ကၠောန်ဗဒှ်လဝ်သဘင်ဥတုကညင် ပ္ဍဲဍုင်နေဝ်တာလာန်

နူကဵုဂကောံညဳသၟဟ်မန်ယူရောပ် က္ဍိုက်ပ်တုဲ သွက်သၞာံ ၂၀၂၅ ဏအ် ကၠောန်ဗဒှ်လဝ်သဘင်ဥတုကညင် မရနုက်ကဵု ၄ ဝါ ပ္ဍဲကဵုဍုင်နေဝ်တာလာန် တုဲဒှ်အာရ။

ပ္ဍဲဍုၚ်ကျာ်ပိဂှ် ဂကောံရပ်လွဟ်တံ ဟွံကဵုအခေါၚ်သွံရာန် ဍာ်တၞးၝာဲကထီု (တၞးဘိင်) ရ ဂး

ပ္ဍဲဍုၚ်ကျာ်ပိဂှ် ဂကောံရပ်လွဟ်တံ ဟွံကဵုအခေါၚ်သွံရာန် ဍာ်တၞးၝာဲကထီု (တၞးဘိင်) ရ ဂး

နူကဵုဂကောံရပ်လွဟ်ဒဳကေဗဳအေ ကေုာံ ဗော်ကေအေန်ယူ မထိၚ်ဒဝ်လဝ် ပ္ဍဲဍုၚ်ကျာ်ပိတအ်ဂှ် စနူဂိတုဂျူလာၚ် စၟတ်တ္ၚဲ (၂၅) ဂှ်တုဲ ကၟာတ်ကၠေံလဝ်အခေါင် သွံရာန် ဍာ်တၞးၝာဲကထီု ကော်ဂး ဍာ်တၞးဘိင်ဂမၠိုင်ရောင် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.