ဌာန်ပရိုၚ်ဗၠးၜးမန် – ပ္ဍဲပယျဵုသေံ-ဗၟာဂှ် ဗော်ဍုၚ်မန်တၟိ ကၠောန်သ္ပမံၚ် ပေဲါဆဵုဂဗသောၚ်ကလး ကုညးဍုၚ်ကွာန်တံတုဲ ပ္ဍဲမူပရေၚ်ၜိုဟ်လလမ် အလဵုအသဳ ၈ တၚ်ဂှ် ဗော်ဍုၚ်မန်တၟိ ဟွံဒုၚ်တဲ ၄ တၚ်ရောၚ် ဂွံတီကေတ် နူတၚ်သၟာန်သၟုက်သဳကၠဳတံဂှ်ရ။
ပ္ဍဲတၚ် ၈ တၚ် မပါလုပ် ပ္ဍဲတၚ်သဳကၠဳပရေၚ်ၜိုဟ်လလမ် ကဆံၚ်ကၟိန်ဍုၚ် အလဵုအသဳဂှ် ကဆံၚ် (၅) ဒက်ပ္တန်ဗော်တုဲ ပွမလုပ်ပေဲါရုဲမာဲ၊ (၆) သၞောဝ် ၂၀၀၈ ဂှ် ကေတ်တၚ်တုပ်စိုတ် လုပ်ပလေဝ် အပ္ဍဲကၠတ်ထဝ်၊ (၇) သွက်ပရေၚ်ၜိုဟ်လလမ် ထာဝရဂှ် လုပ်အပ္ဍဲသၞောဝ်ပေၚ်ပေၚ်တုဲ ဗွဲမကိတ်ညဳကဵုသၞောဝ် မံၚ်စံၚ်စသုၚ်အာကၠုၚ် ကဆံၚ်တုပ် (၈) ဗွဲမကိတ်ညဳကဵုသၞောဝ်ဒက်ပ္တန်ဍုၚ် သွက်ဂွံပြံၚ်လှာဲ နဒဒှ်ဒပ်ပၞာန်ရပ်လွဟ်မွဲဓဝ်ဟေၚ်ဂှ် ပွမပ္ညဳပ္ညပ်အာ – တၚ်ဂမၠိုၚ်တံဂှ် ဒုၚ်တဲဟွံမာန်ရောၚ် ညးမတိုန်စိုပ် ပေဲါဆဵုဂဗသောၚ်ကလးတံ သဳကၠဳအိုတ်ရ။
ပေါဲသောၚ်ကလးဆဵုဂဗဗော်ဍုၚ်မန်တၟိ(IMNA)
ပ္ဍဲပယျဵုသေံ-ဗၟာ ဒေသကျာ်ပိဂှ် ပ္ဍဲဂိတုအံက်တဝ်ပါ ၂၀ ဏံ ကုဂကောံမဟာဇန်မန်တံကီု၊ ပ္ဍဲကွာန်ပလိုၚ်ဂျပါန်ဂှ် ပ္ဍဲဂိတုအံက်တဝ်ပါ ၂၁ ဏံ ကုကောန်သ္ဂံၚ်ဗော်ဍုၚ်မန်တၟိကေုာံ ညးဒုၚ်ကာကဆံၚ်သၟဝ်တံကီု ဗော်ဍုၚ်မန်တၟိ သ္ပကၠုၚ်ပေဲါဆဵုဂဗသောၚ်ကလးအိုတ်ရ။
“ဂွံဓမံက် ပေန်လုၚ်ဒုတိယဂှ် လလောၚ်တြးကၠုၚ် ပ္ဍဲဍုၚ်ကလေတုဲ ဒဝ်အံၚ်သာန်သုကျဳလေဝ် ဟီုကၠုၚ် ပေန်လုၚ် ၂၁ ဗွဝ်ကၠံ။ ဆဂး အခိၚ်လၟုဟ် ဒဝ်သုကဵု UNA တံဂှ် ပရူပေန်လုၚ်ဏံ ရမျာၚ်သ္ၚိတ်အာယျ။ ဟိုတ်ဂှ်ရ နူသဘၚ်သဳကၠဳကောန်ဍုၚ်အရၚ် ချူဓဇက်လဝ် ဂၠံၚ်ပ္ညုၚ် ပ္ဍဲကဆံၚ် ၅ ကိစ္စကော်သဘၚ်သဳကၠဳပေန်လုၚ်ဒုတိယဂှ် ဟွံလောဲကွေံကွေံပုဟ်” သာ်ဝွံ သကိုပ်ဗိုလ်ဇၞော်တြေံ နူဒပ်ပၞာန်ဗၠးၜး ကောန်ဂကူမန် နာဲကောရတ် ဟီုရ။
ပ္ဍဲသဘၚ်ကၞာ ဒက်ပ္တန်ကောန်ဂရက်ကောန်ဂကူဇြဵုမဳ ပေၚ် ၂၂ သၞာံ ပ္ဍဲဂိတုအံက်တဝ်ပါ ၂၄၊ သၞာံ ၂၀၁၀ ဂှ် လလောၚ်တြးပ္တိတ်ကၠုၚ် “လိက်လလောၚ်တြး တၚ်သ္ဂုတ်သွာတ် ဍုၚ်ကလေ” တုဲ ဒဝ်အံၚ်သာန်သုကျဳလေဝ် ဟီုဂးကော်ခဴကၠုၚ် “သဘၚ်သဳကၠဳပေန်လုၚ် ၂၁ ဗွဝ်ကၠံ” တုဲ ချဳဒရာၚ်ကၠုၚ်ကီုရ။
သအာၚ်နူဂှ်ပၠန် လတူအကာဲအရာ ကတဵုဒှ်မံၚ် ပ္ဍဲတွဵုရးယခေၚ် ကေုာံ ပေဲါဗတိုက်ကချေၚ်လၟုဟ်ဂှ်လေဝ် လပါ်ဒဝ်အံၚ်သာန်သုကျဳ ကဵုလညာတ် ဟီုဂးကၠုၚ် ဟွံမွဲမွဲသာ်ရောၚ်ဂှ်လေဝ် သၟတ်မတိုန်စိုပ် ပေဲါဆဵုဂဗသောၚ်ကလးတံ ထံက်ထ္ၜးအိုတ်ရ။
တုပ်တဴသာ်ဂှ်ကီု ပါ်ဒေသ ၄ ဒၞာဲတုဲ က္ဍိုပ်သကိုပ်ဗော်ဍုၚ်မန်တၟိတံဂှ် ပ္ဍဲဂိတုဂျုန်တုဲကၠုၚ်ဏံလေဝ် ကၠောန်သ္ပကၠုၚ် ပေဲါဆဵုဂဗသောၚ်ကလး ကုကောန်သ္ဂံၚ်ဗော်ဂမၠိုၚ်၊ ညးဍုၚ်ကွာန်ခမဳသၚ်ဂမၠိုၚ်၊ ဂကောံမဟာဇန်ဂမၠိုၚ်တုဲ လၟုဟ်ထပ်ကၠောန်သ္ပမွဲဝါပၠန်ရ။
