မာံသုတ – ကပေါတ်သကုတ်ဒါန် (သတ္တု) ဟွံတီယၟုမွဲဂကူ သီုရမျာၚ်ဖံက်ဗတိုဟ် ညံၚ်ရမျာၚ်ပ္ကဴပၟတ် ဗွဲတၟေၚ်တၟဟ် ဒတုံစှေ်ကၠုၚ် နူအာကာသ ပ္ဍဲဂိတုနဝ်ဝေမ်ပါ ၂၂ အခိၚ်နူဂယး ပ္ဍဲပွိုၚ်ဍုၚ်ဇြပ်ဗုရောၚ်ဂှ် ဂွံတီကေတ် နူညးဒေသတံရ။
ကပေါတ်တံဂှ် အခိၚ်နူဂယး ၜိုတ် ၆ နာဍဳဂှ် နူအာကာသ ဒတုံစှေ်ကၠုၚ် သီုရမျာၚ်ဖံက်ဗတိုဟ်တုဲ အပ်ပြာပ်ဏာကဵု ဂကောံဂီုကၠီုပၞာန် (စရဖ) ပွိုၚ်ဍုၚ်ဇြပ်ဗုရောၚ် ဂွံတီကေတ်ရ။
ကပေါတ်မဒါန်ခ္ဍမ်ခ္ဍမ် ဒတုံနူအာကာသ(Facebook-ဇြပ်ဗု)
ပ္ဍဲလိက်ပရိုၚ် မပ္တိတ်နူတနေံတေံဂှ် ကပေါတ်မကလိဂွံ နူကွာန်ပ္ၚဝွံ မၞုံဇမၠိၚ် ၂.၈ ပေ၊ ဗွိုက် ၈ ၝောံတဲတုဲ မၞုံလျိုၚ် ၜိုတ် ၄ ပံၚ်ရောၚ် ဓမံက်ထ္ၜးလဝ်ရ။
ပ္ဍဲကွာန်အၚ်ခေဝ် မၞုံဇမ္ၚောဲ နူကွာန်ပ္ၚ လပါ်သၠုၚ်ကျာ ၜိုတ် ၄ တိုၚ်တေံဂှ်လေဝ် ကောန်ကွာ်လ္ၚဵုတံ ဂွံမိၚ်ကေတ်ရမျာၚ်ညံၚ်ဂဂဵုဓရိၚ်၊ ညံၚ်ရမျာၚ်ဖံက်ခတိုဟ်ပ္ကဴပၟတ်ကီုတုဲ မုရဴကပေါတ်မွဲလေဝ် ဂၠာဲဟွံဆဵုဏီရ။
တုပ်တဴသာ်ဂှ်ကီု ဇရေၚ်ကွာန်ဝါကလဳ မၞုံလပါ်ဗၟံက်ကွာန်ပ္ၚ ၜိုတ် ၅ တိုၚ်ဂှ်လေဝ် ဟံၚ်ဂွံကပေါတ်မဒါန်ခ္ဍမ်ခ္ဍမ် အရံၚ်သာ်ယက် မၞုံဗွိုက် ၄၃ ၝောံတဲ၊ ဇုက်ပၞောန်လဒေါဝ် ၄၇ ၝောံတဲ ပ္ဍဲကြုၚ်ဇရေၚ်ကွာန်ဂှ်ရောၚ်ဂှ် ဓမံက်ထ္ၜးလဝ် ပ္ဍဲလိက်ပရိုၚ်အလဵုအသဳပၠန်ရ။
စၟတ်တ္ၚဲ ၂၅ ဂှ်ပၠန် ပ္ဍဲကွာန်သခါန်ဂျဳ ဒၞာဲကၠအ်နာဲအံၚ်သာန်ဂှ်လေဝ် ထပ်ကပှ်ဂွံကပေါတ်မဒါန်ခ္ဍမ်ခ္ဍမ်ဂှ် ပအပ်ကဵုလဝ် ညးတာလျိုၚ်ဂီုကၠီုဍုၚ်ဇြပ်ဗုတံဂှ် လိခ်ပရိုၚ်အလဵုအသဳဗၟာ ချူထမံက်လဝ်နွံရ။
“လပါ်ဒိုဟ်အဂၞဲ ဍုၚ်ဇြပ်ဗု ပ္ဍဲကြုၚ်ခေါန်၊ ဖာဗြတံဂှ်လေဝ် ဂွံမိၚ်မံၚ်ရမျာၚ် ဗီုဏံကီုဏောၚ် ပိုဲမိၚ်ပရိုၚ်၊ ကၠာအိုတ်ဂှ် ပိုဲတံထေၚ် က္ၜၚ်ကျာခတိုဟ် ပ္ဍဲအကးဏောၚ်။ အုပ်ဓုပ်ကွာန် မဆေၚ်စပ်တံ နူတနေံဏံ အတိုၚ်မွဲတ္ၚဲ ဗက်ဂၠာဲသၟာန်သၟုက်မံၚ်။ မုဟိုတ်ရောဂှ် ဟွံတီဟိုတ်ဖဵုဍေံ ဒဵုကဵုလၟုဟ်ဏီပုဟ်” သာ်ဝွံ တခဳမွဲတၠ နူရုၚ်အုပ်ဓုပ်နာနာ ပွိုၚ်ဍုၚ်ဂှ် ဟီုရ။
စပ်ကဵုပရူဏံတုဲ ပရေၚ်ဒဒှ်ဍာံဂှ် နူဌာနမဆေၚ်စပ်တံ ဟီုသောၚ်ကလးကဵု ဟွံမာန်ဏီတုဲ ကောန်ဍုၚ်ပွိုၚ်ဍုၚ်ဇြပ်ဗုတံ ထေၚ်ခယျမံၚ် ကဝေက်ကပေါတ် နူဌာနစက်ယာန်အာကာသရောၚ် ဂွံတီကေတ်ရ။
