မာံတဵုလွဳ – ဝဲါဓါတ်၊ ဂဥုဲဂစိုတ်စၟ ကေုာံ သြောံမ စရာဲဍာ်ဒကေတ်ဟွံပေၚ်၊ ဟွံလုပ်အဝေါၚ်သၞောဝ်တံဂှ် ညံၚ်ဟွံဂွံရာန်ဒး နူညးလီဠာန်သွံစတံတုဲ နူဌာနဝန်ဇၞော်ဝါဗ္ၚ ဍာ်ကၟိုန် ကဵုလဝ်သတိကဵု သၟာဗ္ၚတံ နူလိက်ပရိုၚ်အလဵုအသဳ မွဲကဆံၚ် ပ္ဍဲဂိတုဒဳဇြေမ်ပါ ၄ ဏံရ။

သအာၚ်နူဂှ်ပၠန် ဓမံက်ဂၠိုက်ဂၠာဲအာ ညးမလီဠာန်သွံပရးမံၚ် ဝဲါဓါတ်၊ ဂဥုဲဂစိုတ်စၟ၊ သြောံမ၊ မသတ်ဆုသတ်ဒုန်တံဂှ်တုဲ နူပွိုၚ်ဍုၚ်မဆေၚ်စပ်တံ ညံၚ်သ္ဂောံကေတ်အာအရေဝ်ဂှ်လေဝ် ဗတိုက်ဖအောဝ်လဝ်ကီုရ။

“ကၠာတေံဂှ် နူဌာနပရေၚ်တဵုလွဳ သွံမံၚ်ကဵုဂဥုဲဂစိုတ်စၟတှေ် ပြေပြံၚ်မံၚ်။ လၟုဟ်ဟွံသွံကဵုရတှေ် ဒးရာန်ကေတ်မံၚ် နူမ္ၚးတုဲ စၟကဵု ဂဥုဲဂစိုတ်စၟ ဟွံကိတ်ညဳလေဝ် နွံမံၚ်ကီု” သာ်ဝွံ သၟာဗ္ၚ နူပွိုၚ်ဍုၚ်သဓီုမွဲတၠ ဟီုရ။

ဟိုတ်နူသုၚ်စောဲဒး ဝဲါဓါတ်၊ ဂဥုဲဂစိုတ်စၟ၊ သြောံမ၊ မသတ်ဆုသတ်ဒုန် စရာဲဍာ်ဒကေတ်ဟွံပေၚ်၊ ဂကူဟွံဇေတ်တံဂှ်ရ ဟွံဒှ်ဂုဏ်ဖဵု သွက်သၟာဗ္ၚတံတုဲ စရာဲဍာ်ဒကေဝ် သတ်ဆုသတ်ဒုန်လေဝ် ယုတ်သဝ်စှေ်အာမာန်ရောၚ်ဂှ် ညးဆက်ဟီုရ။

ခါလၟုဟ် လှာဲပြံၚ်ထောံ နဒဒှ်ဌာနဍိုက်က္ဍိုပ် ပရေၚ်တဵုလွဳတုဲ ဒးကဵုဖျုန်ကၠောန်ကၠုၚ် ပရေၚ်သုတေသန ကေုာံ ပရေၚ်ကဵုပညာတဵုလွဳဂှ်ရ ဆေၚ်သွံကပေါတ်ပုဂ္ဂလိကတံ သွံရာန်မံၚ် ကပေါတ်ကိရိယာ ရပ်စပ်စကာ အပ္ဍဲကမၠောန်ပရေၚ်တဵုလွဳတံရောၚ် သာ်ဝွံ ညးဒုၚ်ကာယိုက်ဝန် နူဌာနဍိုက်က္ဍိုပ် ပရေၚ်တဵုလွဳ ပွိုၚ်ဍုၚ်သဓီုမွဲတၠ ဟီုရ။

“လတူဍုၚ်သဓီုတှေ် ပတိတ်ကဵုလဝ်စၟတ်တဲ အခေါၚ်သွံရာန်လုပ်သၞောဝ် ကုဆေၚ်သွံကပေါတ် ပရေၚ်တဵုလွဳ ၁၃ ဆေၚ်တုဲယျ။ ဆေၚ်လ္ၚဵုတံဂှ်လေဝ် သှေ်မံၚ်ဏီ။ စၟဳစၟတ်တုဲ ကဵုဂရၚ်ပတိုန်လဝ် အခေါၚ်လုပ်သၞောဝ်” သာ်ဝွံ ညးဟီုရ။

နူဌာနစဵုဒၞာသတ်ဆုသတ်ဒုန် ရုၚ်ဂအုပ် ဌာနဍိုက်က္ဍိုပ်ပရေၚ်တဵုလွဳဂှ်လေဝ် ပလံၚ်ဗစိုပ်လဝ် တၚ်စၞောန်၊ နဲကဲကၠောန်၊ သၞောဝ် စပ်ကဵုသွံတြး ဝဲါဓါတ်၊ ဂဥုဲဂစိုတ်စၟနာနာ ကေုာံ မသတ်ဆုသတ်ဒုန်နာနာ ကုတွဵုရး၊ ရး၊ ခရိုၚ်၊ ပွိုၚ်ဍုၚ်တံ တုဲရောၚ်ဂှ်လေဝ် ညးဆက်ဟီုရ။

“ပြဟ်ပြဟ်ဏံ ဝဲါဓါတ်၊ ဂဥုဲဂစိုတ်စၟ စရာဲဍာ်ဒကေတ်ဟွံပေၚ်၊ ဂကူဟွံဇေတ်တံဂှ် ဒးကေတ်အရေဝ် ပိုတ်ပိုတ်သကုတ်သကုတ်ထေက်ဏောၚ်။ ဒှ်ဟဂှ်မှ ခိုဟ်သွက်ညးသွံမံၚ် ကပေါတ်ဍာံ၊ ၚုဟ်ဍာံတံဏောၚ်” သာ်ဝွံ ဆေၚ်သွံကပေါတ်ပရေၚ်တဵုလွဳ (ရတနာမြေ) လတူဍုၚ်ဗ္ဂေါဂှ် ဟီုရ။

ကပေါတ်ပရေၚ်တဵုလွဳ သွံတြးမံၚ် နကဵုအခေါၚ်တံဂှ် နူကုမ္ပဏဳမွဲကဆံၚ် ပလံၚ်ကဵုမံၚ် ဆေၚ်သွံတြးတံတုဲ ခါန်ကၞက်လဝ် ညးမဂွံလဝ်တဆိပ်ကြာ ပရေၚ်တဵုလွဳ နဒဒှ်ညးစၞးသွံတြးရောၚ်ဂှ်လေဝ် နူဆေၚ်ဂှ် ဟီုရ။

လၟုဟ် ဒှ်မံၚ်အခိၚ်ရတ်သြောံကသီု၊ တဵုဒၟံၚ်ခၞောဝ်ကေဝ် အခိၚ်မုဟ်ကျာတုဲ ပလေဝ်ပလေဝ်မံၚ် သွက်သ္ဂောံတဵုသြောံက္ညၚ်ဂှ်ရ ရန်ကဵုသၟာဗ္ၚတံ ဂွံရာန်ကေတ် ဝဲါဓါတ်၊ ဂဥုဲဂစိုတ်စၟ၊ မ လောဲလောဲသွာသွာမာန်တုဲ ညးဒုၚ်ကာယိုက်ဝန် ပရေၚ်စဵုဒၞာသတ်ဆုသတ်ဒုန်တံ ဗက်စၟဳစၟတ်မံၚ် ဆေၚ်သွံကပေါတ်ပရေၚ်တဵုလွဳအိုတ်ရ။