ဌာန်ပရိုၚ်ဗၠးၜးမန် – ကၠောန်ဗဒှ်ဏာ ကောံဓရီုကမ္မတဳဗဟဵု ကၠောန်ဗဒှ် တ္ၚဲကောန်ထံၚ်ပရေၚ်ဍုၚ်ကွာန်မန် မရနုက်ကဵု (၅) ဝါ ပ္ဍဲဂိတုဒဳဇြေမ်ပါ ၁၀၊ လ္တူဍုၚ်မတ်မလီု ပ္ဍဲဇြပ်မန်ဂှ် တုဲဒှ်အာတုဲ ဖျေံဏာလၟေၚ်ကမၠောန် သွက်ဂွံထံက်ပၚ် ကောန်ထံၚ်သၟာပရေၚ်ဍုၚ်ကွာန်မန် မသှ်ၜေက်ဒၟံၚ် ပ္ဍဲထံၚ်တံရောၚ် ဂွံတီကေတ် နူညးက္ဍိုက်ပ်သ္ဘၚ်ကၞာတံရ။
သွက်ဂွံထံက်ပၚ် ကောန်ထံၚ်ပရေၚ်ဍုၚ်ကွာန်မန် မသှ်ၜေက်ဒၟံၚ် ပ္ဍဲထံၚ်တံဂှ် အစဳဇန်ပ္တိတ်လိက်သ္ကုတ်ဒုၚ်ဒါန်ကီု ပရးလိက်စၠောံတဲ ကေုာံ သတေတ်ကာကီုဂှ် ဂိတုဏံအိုတ်မ္ဂး စဓမံက်အာရုပ်ရဴကမၠောန်ရောၚ် သာ်ဝွံ ညးက္ဍိုက်ပ်သ္ဘၚ်ကၞာ ကောန်ထံၚ်ပရေၚ်ဍုၚ်ကွာန်တြေံ နာဲယက္ခ ဟီုရ။
“အဓိက အစဳဇန် နွံမံၚ် ၜါတၚ်။ (၁) ဂှ် ဂၠာဲသြန်ဂအုံတုဲ ကောန်ထံၚ်ပရေၚ်ဍုၚ်ကွာန်မန် မသှ်ၜေက်ဒၟံၚ် ပ္ဍဲထံၚ်တံဂှ် ညံၚ်ဂွံထံက်ပၚ်အာမာန်။ (၂) ဂှ် ကောန်ထံၚ်ပရေၚ်ဍုၚ်ကွာန်မန် မဗၠးတိတ်ကၠုၚ်တုဲတံဂှ် ကံက်စရၚ်တုဲ ညံၚ်ဂွံပ္တိတ်ဝၚ်ပူဂိုလ်ညးတံ ဗွဲခမၞောန်မာန်ဂှ် ပိုဲတံစဳဇန်လဝ်နွံ” သာ်ဝွံ ညးဟီုထ္ၜးရ။
ပ္ဍဲသ္ဘၚ်ကၞာဂှ် ညးစၞးဗော်ဒဳမဝ်ကရေသဳမန် (MDP)၊ ဗော်ဒဳမဝ်ကရေဇြဳ အလုံရးမန် (AMDP)၊ ဗော်ဍုၚ်မန်တၟိ၊ ကောန်ထံၚ်ပရေၚ်ဍုၚ်ကွာန်မန်တြေံ ကေုာံ ခမဳသၚ်ဂမၠိုၚ် အပံၚ်လၟိဟ် (၃၀) တၠပြၚ် တိုန်စိုပ်ရောၚ် ညးဆက်ဟီုရ။
ပ္ဍဲသဘၚ်ကၞာဂှ်မ္ဂး ညံၚ်ဂွံရီုဗၚ် ထံက်ပၚ်အာ ကောန်ထံၚ်ပရေၚ်ဍုၚ်ကွာန်မန် မသှ်ၜေက်ဒၟံၚ် ပ္ဍဲထံၚ်တံမာန်ဂှ် သဘာပတိ ကျာ်ဇၞော်ကအ်ပလိုၚ် ဘဒ္ဒန္တကေတုမာလာ ကဵုသြဝါဒ ဗတိုက်ဖအောဝ်ဏာကီုရ။
သွက်ကမ္မတဳ ကၠောန်ဗဒှ် တ္ၚဲကောန်ထံၚ် သၟာပရေၚ်ဍုၚ်ကွာန်မန်ဂှ် ၃ ဂိတုမွဲဝါ သဳကၠဳအာတုဲ ကောံဓရီုကမ္မတဳဗဟဵုဂှ် ၆ ဂိတုမွဲဝါ ကၠောန်ဗဒှ်အာရောၚ် ဖျေံဏာသ္ဂုတ်သွာတ် ပ္ဍဲကောံဓရီုဂှ်ရ။
ပြဟ်ဟ်ဏံ ၜိုတ်ကံက်ဂွံလဝ်စရၚ် ကောန်ထံၚ်ပရေၚ်ဍုၚ်ကွာန်မန် (၆၀) တၠတုဲ အပံၚ်သီုဖအိုတ်မ္ဂး ၜိုတ် (၁၀၀) တၠ ပြၚ်ၚ်နွံမာန်ဏောၚ်ဂှ်လေဝ် နာဲယက္ခ ဆိၚ်ဆကေတ်ရ။
“ပိုဲပရး လိက်သ္ကုတ်ဒုၚ်ဒါန်သြန်တုဲ လှုဲၜိုတ်ပကောံဂွံဂှ်တှေ် ကောန်ထံၚ်ပရေၚ်ဍုၚ်ကွာန်မန် နွံပ္ဍဲထံၚ်တံ တၚ်ညးတံ နွံပၟိက်ဂှ်တှေ် ပိုဲဖ္ဍိုက်ဗပေၚ်ကဵုဏောၚ်။ တုဲပၠန် စပ်ကဵုပရေၚ်ဍုၚ်ကွာန်တုဲ ယဝ်ရဒးအာထံၚ် နွံတှေ်လေဝ် သွက်ဂွံထံက်ပၚ်အာဂှ် နူကဵုဂကောံဏံ စဳဇန်လဝ်နွံ” သာ်ဝွံ ညးဟီုထ္ၜးရ။
နာဲယက္ခဝွံ အဃောယိုက်ဂၠေၚ်မံၚ်တာလျိုၚ် အပ္ဍဲဗော်ဍုၚ်မန်တၟိဂှ် မွဲဟာန်ကေုာံ နာဲဆီဂကူဟေၚ် ဒးဒုၚ်ရပ် ကုထံၚ်ပရိုၚ်အလဵုအသဳကၠာတေံတုဲ ဒးဒုၚ်ဖျေံထံၚ် မွဲအာယုက်ရ။ ဟိုတ်နူသမတကၟိန်ဍုၚ် ကဵုအခေါၚ်သၠးဒုဟ်တုဲ ပ္ဍဲဂိတုအေဗရဴ ၃၀ ဂှ် ကလေၚ်ဗၠးတိတ်ကၠုၚ်ကီုရ။
ဗၠးတိတ်နူထံၚ်တုဲ သွက်ဂွံထံက်ပၚ်ရီုဗၚ်အာ ကောန်ထံၚ်ပရေၚ်ဍုၚ်ကွာန်မန် မသှ်ၜေက်ဒၟံၚ် ပ္ဍဲထံၚ်တံမာန်ဂှ် ဒက်ပ္တန် ကမ္မတဳကၠောန်ဗဒှ် တ္ၚဲကောန်ထံၚ် သၟာပရေၚ်ဍုၚ်ကွာန်မန် မွဲရ။
ပ္ဍဲကမ္မတဳဂှ်မ္ဂး မပ္တံ နာဲယက္ခ ဥက္ကဌ၊ ဒံက်တာ နာဲစောန်တၟး ဒုဥက္ကဌ (၁)၊ နာဲလှအံၚ် ဒုဥက္ကဌ (၂) ကမ္မတဳဗဟဵု (၂၁) တၠ ပါလုပ်တုဲ သီုဖအိုတ်ကောန်ဂကောံ မၞုံၜိုတ် ၆၀ တၠရ။