မာံတဵုလွဳ – ကြက်ကၠောန်ဗဒှ် တ္ၚဲကောန်ဂကူမန် (၆၆) ဝါ (ဗဟဵု) ပ္ဍဲဂိတုဖေဖဝ်ဝါရဳ ၂၆ တေံဂှ်တုဲ ပ္ဍဲစၟတ်တ္ၚဲ ဒဳဇြေန်ဗာ ၈ ဏံ ရုဲစှ်ကမ္မတဳဗဟဵု ကၠောန်ဗဒှ် ပ္ဍဲဇြပ်မန် လ္တူဍုၚ်မတ်မလီု တုဲဒှ်အာရောၚ် ဥက္ကဌ ကၠောန်ဗဒှ်ဂှ် ဟီုရ။
“သွက်ဂွံကၠောန်ဗဒှ် တ္ၚဲကောန်ဂကူမန် (၆၆) ဝါဂှ် ရုဲစှ်ပ္တိုန် ညးစၞးကၠာဏောၚ်။ တုဲတှေ် ဒၞာဲဂွံကၠောန်ဗဒှ် သိုၚ်ခၞံအသေအဟာန်ဂှ် ရုဲဏောၚ်။ ကိစ္စပဝ်သတာကဵု ဂတဵုမုက်ဗစူတိတံဂှ် အဃောချပ်မံၚ်ဖိုဟ်ရ” သာ်ဝွံ ညးလဴထ္ၜးရ။
ပ္ဍဲကောံဓရီု ရုဲစှ်ကမ္မတဳ ကၠောန်ဗဒှ်ဂှ်မ္ဂး ညးစၞး နူဗော်ပရေၚ်ဍုၚ်ကွာန်မန်ကီု ကမ္မတဳလိက်ပတ်ယေန်သၞာၚ်မန်ကီု ကမ္မတဳကၠောန်ဗဒှ် တ္ၚဲကောန်ဂကူမန် နူစှ်ပွိုၚ်ဍုၚ်တံကီု ဂကောံသၟတ်တံကီု ဂကောံမန်ဍုၚ်လ္ဂုၚ် ကေုာံ ဍုၚ်ဗဂေါတံ သီုဖအိုတ်မ္ဂး ၜိုတ် (၁၀၀) တၠပြၚ်ၚ် တိုန်စိုပ်ရောၚ် ညးဆက်ဟီုရ။
“သွက်ဂွံကၠောန် တ္ၚဲကောန်ဂကူမန် သၞာံဏံဂှ် ဒးအလန်ကၠောန် လ္ပာ်ခရိုၚ်သဓီုတေံဏောၚ်။ ညံၚ်ဂွံကၠောန်အာ မိပ်ပ်ဇြိပ်ပ်မာန်ဂှ် ညးဒေသ ပွိုၚ်ဍုၚ်ပံၚ်တံလေဝ် စိုတ်ထတ်မံၚ်ကွေံကွေံ” သာ်ဝွံ နူပွိုၚ်ဍုၚ်မုဟ်ဍုၚ် ညးမတိုန်စိုပ် ကောံဓရီုမွဲတၠ နာဲထဝ်ပိုၚ် ဟီုရ။
ဒၞာဲဂွံသိုၚ်ခၞံ အသေအဟာန် တ္ၚဲကောန်ဂကူမန် (ဗဟဵု) ဂှ် ရုဲစှ်ဏာ ပ္ဍဲဖလာတ်မခ္ဍမ်ကျာ အရာပ်ခ္ဍး ဍုၚ်ပံၚ်တုဲ ပေဲါပြိုၚ်ကီု ပေဲါထ္ၜးပျးကီု ပေဲါတိၚ်တိုက်တံကီုဂှ် ညံၚ်ရဴသၞာံတုဲကၠုၚ်တေံကီု ကၠောန်ဗဒှ်အာ မိပ်ပ်ဇြိပ်ပ်ရောၚ် နာဲတေန်အံၚ် ဆက်ဟီုရ။
အသေဟာန် တ္ၚဲကောန်ဂကူမန် ၆၅ ဝါဂှ် ကၠောန်ဗဒှ် ပ္ဍဲကွာန်ကအ်ဗိန် တွဵုရးကရေၚ်တုဲ မရနုက်ကဵု ၆၄ ဝါဂှ် ကၠောန်ဗဒှ် လ္တူဍုၚ်ဇြပ်ဗုရ။
ညံၚ်ရဴသာ်ဂှ်ကီု လ္တူဍုၚ်လ္ဂုၚ် သွက်ဂွံကၠောန် တ္ၚဲကောန်ဂကူမန် ၆၆ ဝါဂှ်လေဝ် ပ္ဍဲဂိတုနဝ်ဝေမ်ပါ ၁၁ ဏံ ရုဲစှ်ပ္တိုန် ညးစၞး ပ္ဍဲဇြပ်မန် ဍုၚ်လ္ဂုၚ် တုဲဒှ်အာကီုရ။
ပရေၚ်ကၠောန်ဗဒှ် တ္ၚဲကောန်ဂကူမန် (ဗဟဵု) ဝွံ နူသၞာံ ၁၉၉၅ စၟတ်သမ္တီ သ္ဘၚ်ရတုထဝ်တေံရ သွက်ဂွံကၠောန်အာ မွဲသၞာံ မွဲပွိုၚ်ဍုၚ်ဂှ် ဖျေံကၠုၚ်သ္ဂုတ်သွာတ်တုဲ ပ္ဍဲကဵုခရိုၚ်သထုံ ၄ ပွိုၚ်ဍုၚ် ကၠောန်ဗဒှ် ပ္ဍဲပွိုၚ်ဍုၚ်ပံၚ်အလန်ဏံဂှ် ဒှ်အလန်ကၠာအိုတ်ရ။
ပရေၚ်ကၠောန်ဗဒှ် တ္ၚဲကောန်ဂကူ ကောန်ဍုၚ်အရၚ်တံဝွံ ပ္ဍဲလက်ထက်သမ္မတ ဥူတိၚ်သိၚ်ဏံ ဂွံအခေါၚ်ကၠောန်ကၠုၚ် ဗၠးဗၠးၜးၜး၊ ဟွံမွဲကဵု ပရေၚ်ဒးဒုၚ်ကရေပ်ဓရတ် ညံၚ်ရဴကၠာတေံဂှ်ရ ကၠောန်ဗဒှ် မိပ်ပ်ဇြိပ်ပ်မာန်ကၠုၚ်ရ။