ဟိုတ်နူဂကောံဒပ်ပၞာန်ဗၟာ ပကီုပရာပ်ပန်ဗ္တိုက်ကဵုက္ၜင်ကျာတုဲ အပ္ဍဲပွိုင် (၃) ဂိတု ကောန်ကွာန်ချိုတ်အာ ၜိုတ် (၃၅၃) တၠနွံရောင် ဂွံတီကေတ် နူတင်နင်လိက်ဒုင်စဳရေင် မျာန်မာအေန်တာနိတ်ပရဝ်ဂျက် (MIP) လလောင်ပ္တိတ်လဝ်ရ။
ပ္ဍဲကဵုညးချိုတ်အာဂှ်ဝွံ ညးဗြဴ (၉၀) တၠ၊ ကောန်ၚာ် (၃၄) တၠကဵု ညးအာယုက်ဇၞော် (၄၃) တၠ ပါလုပ်တုဲ ပ္ဍဲကဵုဒေသ မဒးဆဵုဂဗဒၟံင် တင်ဝါတ်ဂါတ်ကဵု ပရေင်ဆက်စၠောံဂှ် အကာဲအရာဘဲအန္တရာဲ ဒးဒုင်ဗ္တိုက်ကဵုက္ၜင်ကျာ နွံဂၠိုင်အိုတ်ရောင် ဂးရ။
သၞာံ (၂၀၂၆) ၊ နူဂိတုဂျူလာင် စဵုကဵုဂိတုသေပ်တေမ်ဗာဂှ် ပရူဒဒှ်ဗ္တိုက်ကဵုက္ၜင်ကျာ (၅၈၁) ဝါနွံတုဲ ပွဗ္တိုက်ကဵုက္ၜင်ကျာ (၅၆၂) ဝါ (၉၆.၈၈%) ဂှ် ကတဵုဒှ်အာလဝ် ပ္ဍဲဒေသ ဒးဒုင်ထ္ပိုတ်လဝ်အေန်တာနိတ်ရောင် ဂးရ။
ယဝ်ၜတ်ကၞာတ်ကဵု အခိင်ကာလ (၃) ဂိတုတုဲကၠုင်တေံဂှ်မ္ဂး ပွဂကောံဒပ်ပၞာန် ဗ္တိုက်ကဵုက္ၜင်ကျာ သၠုင်တိုန်ကၠုင် (၁၁.၇၃%) ရောင် (MIP) ဂးရ။
တွဵုရးရခေင် ဒးဒုင်ဗ္တိုက်ကဵုက္ၜင်ကျာ (၁၅၁) ဝါဂှ် ဒှ်ဒေသ ဒးဘဲဇီုကပိုက်ပရေံအိုတ်တုဲ ရးဒေသဇၞော်သေတ်ဂိုင် (၁၀၇) ဝါ၊ ရးဒေသဇၞော်မဂွေ (၁၀၆) ဝါ ကတဵုဒှ်အာလဝ်နွံရ။
ပွဗ္တိုက်ကဵုက္ၜင်ကျာ ၜိုတ် (၆၂.၆၅%) ဂှ် ကတဵုဒှ်အာလဝ် ဒၞာဲဒေသ (၃) ဒေသ ပဋိပက္ခပရေင်ပၞာန်သ္ကာတ်မြဟ်ကဵု ဂကောံဒပ်ပၞာန်တံရ။
တုဲပၠန် ပ္ဍဲကဵုဒေသထ္ပက်မံင်ပၞာန် ဂကောံဒပ်ပၞာန်တံ ဆောံလေင်လဝ်ဂှ် စကာဇြဟတ်က္ၜင်ကျာ မလောန်ကာဲမံင်ရဂှ်လေဝ် (MIP) ဂးရ။
အပ္ဍဲကဵုဂကောံဒပ်ပၞာန်ဗၟာ ဗ္တိုက်ကဵုက္ၜင်ကျာ (၅၈၁) ဝါဂှ်မ္ဂး စမြိုင်ဘာလကျာ် ကေုာံ စမြိုင်ပရေင်ဘာသာ (၃၉) ဘာ၊ ဘာဗ္တောန်လိက် (၁၆) ဘာ၊ ရုင်ဂဥုဲ ကေုာံ ခဒမ်ဂဥုဲ (၄) မ၊ ဗဒိုပ်ပဲါဒဴဘဲပၞာန် (၂) ဗဒိုပ်၊ ဒဒန် (၃) တၞုင် ကေုာံ ဖျာ (၃) ဖျာ လီုလာ်အာရ။
ဂကောံဒပ်ပၞာန်ဗၟာတံဝွံ စမြိုင်ပရေင်ဘာသာ စကာနဒဒှ်ဒၞာဲဇူဒီုပဲါဒဴဘဲပၞာန်မာန်ဂှ်လေဝ် စွံပွန်ဗ္တိုက်တုဲ ဟိုတ်နူဖျာဟွံဆေင်စပ်ကဵု ပရေင်ပၞာန် ဒးဒုင်ဗ္တိုက်ဂှ်ရ ကောန်ကွာန်ချိုတ် ဗွဲမဂၠိုင်ဂၠင် (နကဵုဂကောံ) ရ။
ပ္ဍဲကဵုဒေသတိဍာ် ဂကောံဒပ်ပၞာန်ဗၟာတံ ဂိုတ်ဂ္စာန်ဒၟံင် သွက်သ္ဂောံက္လေင်အုပ်ဓလီုဂှ်မ္ဂး ဆက်စကာမံင်ဇြဟတ်က္ၜင်ကျာ ဗွဲမလောန်ကာဲတုဲ ယဝ်ၜတ်ကၞာတ်ကဵု အခိင်ကာလ (၃) ဂိတုတုဲကၠုင်တေံမ္ဂး ပွစကာက္ၜင်ကျာ သၠုင်တိုန်ကၠုင် (၁၁%) ပြင်ရောင် မျာန်မာအေန်တာနိတ်ပရဝ်ဂျက် (MIP) လလောင်ပ္တိတ်လဝ်ရ။