စဖံက်ဂၠံၚ်တၟိ လှာဒကှ်-ကျာ်ပိယျ

by | Dec 4, 2012 | ပရိုၚ် | 0 comments

မာံသုတ – ဂၠံၚ်ကွဳစက် နူဍုၚ်လှာဒကှ် စိုပ်ဍုၚ်ကျာ်ပိ အာကၠုၚ်မာန် သီုဥတုပိဂှ် နူတနေံဏံ စဖံက်ယျရောၚ် ဂွံတီကေတ် နူရုၚ်ဆက်ဆောံ KNU ဍုၚ်ကျာ်ပိရ။

ဗီုတိအာစိုပ်ဒေသပယျဵုကျာ်ပိ(internet)

ဂၠံၚ်လးတၟံ နူဍုၚ်ကျာ်ပိ စဵုစိုပ်ကွာန်ကြုၚ်ထဝ် ဖံက်လဝ်ကၠာတေံဂှ် မၞုံဇမၠိၚ် ၅၈ တိုၚ်၊ ၂ ဖာလုၚ်၊ မၞုံသၠဲ ၁၂ ပေရောၚ် ဂွံတီကေတ် အတိုၚ်ကုမ္ပဏဳ ဖံက်ဂၠံၚ်ကွဳစက် (ရေႊချောၚ်းဆုံ) လလောၚ်ပတိတ်လဝ်ဂှ်ရ။

“နူကြုၚ်ထဝ် စဵုကဵုစိုပ်ကျာ်ပိုတ်ဂှ် မွဲဂကောံ၊ နူလှာဒကှ် စဵုစိုပ်ကျာ်ပိုတ်ဂှ် မွဲဂကောံ ပါ်ၜါဂကောံတုဲ ဖံက်အာဏောၚ်” သာ်ဝွံ ဖဒဝ်သဝ်ထေဝ်နေ မဒှ်ညးလျိုၚ်မွဲတၠ နူရုၚ်ဆက်ဆောံ KNU ဍုၚ်ကျာ်ပိဂှ် ဟီုရ။

ဂၠံၚ်ဇၞော်ကွဳစက်ဝွံ နူဍုၚ်ကျာ်ပိ စဵုစိုပ်ကျာ်ပိုတ်၊ သနုၚ်၊ ကြုၚ်ဆုကၠ (ကွျန်းချောၚ်း)၊ ကြုၚ်ထဝ်ဂှ် ဒဒန်ဆု မၞုံ ၅၅ ရောၚ်ဂှ်လေဝ် ဓမံက်ထ္ၜးလဝ် အပ္ဍဲကိုန်စဳဇန် ပရေၚ်ဖံက်ဂၠံၚ်ဏံရ။

“အခိၚ်ကသီုသၞာံဏံတှေ် ကွဳစက်တံ ဂြိပ်မာန်ဏောၚ် စၟဳပတှေ်ကေတ်လဝ်ရ။ သီုသိုၚ်ဒဒန်၊ သီုဖံက်ဂၠံၚ်တှေ် တုဲမာန်ညိဟာဂှ်ရ ဒးမၚ်ကျောဝ်မံၚ်ဏီ” သာ်ဝွံ ဖဒဝ်သဝ်ထေဝ်နေ ဟီုရ။

ကိုန်စဳဇန် ဖံက်ဂၠံၚ် လှာဒကှ်-ကျာ်ပိဏံဂှ် မဒှ်ကိုန်စဳဇန် အလဵုအသဳကၟိန်ဍုၚ်မွဲတုဲ အပ္ဍဲကာလၜါတ်ဂျက် (budget) သၞာံ ၂၀၁၂-၂၀၁၃ ဂှ် နူကၟိန်ဍုၚ် ဖျေံကဵုလဝ်သြန်ဗွဝ် ပွမပလေဝ်ပလေတ်တၟေၚ် ကဆံၚ်ကၟိန်ဍုၚ် ရ၉၄ ဒဿမ ၉၅ ပြကောဋိကိုဋ်ရ။

ကာလၜါတ်ဂျက်ဏံဂှ် စဵုစိုပ် ဂိတုမာတ်ချ် ၃၁၊ သၞာံ ၂၀၁၃ တေံမ္ဂး အတိုၚ်ရန်လဝ် ဒးသိုၚ်ဂၠံၚ်ဒဒန် စဵုစိုပ်ဒတုဲရ။

ပ္ဍဲကုမ္ပဏဳ (ရေႊချောၚ်းဆုံ) မဖံက်ဂၠံၚ်ကွဳစက်ဏံဂှ် ညးဒေသလတူဍုၚ်ကျာ်ပိ မကၠောံဍကဵု KNU တံ ပါလုပ်တုဲ ဖဒဝ်ဥူယှိုဲမံၚ် ဥက္ကဋ္ဌ ခရိုၚ်ဒူပလာယျာ ဒပ်မဟာ ၆ KNU ဂှ် မဒှ်နာယကရ။

တုပ်တဴသာ်ဂှ်ကီု ဂၠံၚ်ဂေတ်ဒဵု ဗြဝတဳ-ကအ်ကြိက် မၞုံဇမၠိၚ် ၆၃ ကဳလဵုမဳတာဂှ်လေဝ် နူဍုၚ်သေံ ဍိုက်က္ဍိုပ်တုဲ စဖံက်မံၚ် နူဂိတုတုဲကၠုၚ်ဏံရ။

ကြဴနူ KNU ကေုာံ အလဵုအသဳဗၟာတံ ဒေံါပန်ပှော်တုဲဂှ် သွက်သ္ဂောံပလေဝ်အာဂၠံၚ် မၞုံအပ္ဍဲတိဍာ်ထိၚ်ဒဝ် KNU ဂှ် ဖျေံကိုန်စဳဇန်တုဲ ဓမံက်မံၚ်ရုပ်ရဴရောၚ် ဂွံတီကေတ်ရ။

Written by

Related Posts

ဂကောံညဳသၟဟ်ရာမညတအ် သွက်ဂွံပံၚ်အာတောဲကု ဂကောံမန်မၞုံဍုၚ်သေံတအ်နွံ

ဂကောံညဳသၟဟ်ရာမညတအ် သွက်ဂွံပံၚ်အာတောဲကု ဂကောံမန်မၞုံဍုၚ်သေံတအ်နွံ

ဂကောံညဳသၟဟ်ရာမည ဖျေံသ္ဇိုၚ်ဍုၚ်ဖူကေတ် ကၟိန်ဍုၚ်သေံဝွံ ရန်ကဵုကောန်ဂကူမန်မၞုံဍုၚ်သေံတအ် ဂွံညဳသၟဟ်၊ ဂွံဒှ်မွဲဂကောံမွဲဇြဟတ်ရောၚ်ဂးတုဲ သွက်ဂွံရေၚ်တၠုၚ်ချဳဒရာၚ်ပံၚ်အာတောဲကု ဂကောံမှာဇန်မန် မၞုံဍုၚ်သေံဂမၠိုၚ်နွံရောၚ်ဂှ် ညးတာလျိုၚ်ဂကောံညဳသၟဟ်ရာမညတအ် သ္ဂးလဝ်ရ။

ဒူရေန်ဆက်မတ် တိတ်ပြဟ်ကဵု တိတ်လဇုဲ ၚုဟ်ခြာကဝက်

ဒူရေန်ဆက်မတ် တိတ်ပြဟ်ကဵု တိတ်လဇုဲ ၚုဟ်ခြာကဝက်

ဒူရေန် (ဆက်မတ်) စတိတ်တၟိတၟိကဵု ဒူရေန်တိတ်လဇုဲဂှ် ၚုဟ်ခြာဒၟံၚ်ကဝက်တုဲ ကၠအ်ဒူရေန်တိတ်ပြဟ်တအ်ဂှ် ဒှ်ပရေၚ်ပိုန်ဒြပ်ခိုဟ်ခိုဟ်မွဲရောၚ် တၠကၠအ်ဒူရေန်မွဲတၠဂှ် ဟီုရ။

မတၞံထ္ၜိုတ်ဆက်မတ် သၞာံဏံ ၚုဟ်က္ဍၚ်တိုန်ကဝက်

မတၞံထ္ၜိုတ်ဆက်မတ် သၞာံဏံ ၚုဟ်က္ဍၚ်တိုန်ကဝက်

ဟိုတ်နူဗၞိက်ဗွဝ်ဖျာနာနာ က္ဍၚ်တိုန်အာဂှ် ၚုဟ်ထ္ၜိုတ်လေဝ် သၠုၚ်တိုန်ကီုတုဲ မတၞံထ္ၜိုတ်ဆက်မတ် သၞာံဏံလေဝ် ၚုဟ်က္ဍၚ်တိုန်အာကဝက်ဒှ်ရောၚ် ဂွံတီကေတ်ရ။

0 Comments

Submit a Comment

Your email address will not be published. Required fields are marked *

This site uses Akismet to reduce spam. Learn how your comment data is processed.