သၟာကမၠောန်ဆုဲပြံၚ် စိုပ်မံၚ်ဍုၚ်သေံဂမၠိုၚ်တံဝွံ သွက်ကောန်ၚာ်ပအပ်စွံလဝ် ပ္ဍဲဘာလွဳၜံၚ် နကဵုသၞောတ်ပရေၚ်ဗ္တောန်ပညာသၟးသၟးဂှ် ဂကောံညးဍုၚ်ကွာန်သေံ Thai Intolerable Team တေအချဳဝါ က္ဍိုက်က္ဍိုပ် ကော်ဂး ဂကောံသော်ပါၚ်တအ် ဒစဵုဒစးဟီုကၠုၚ်လဝ်နွံရောၚ် ပရိုၚ်သေံဂမၠိုၚ် ပ္တိုန်ထ္ၜးလဝ်ရ။
သွက်ကောန်ၚာ်ကွးဘာ ကောန်ဍုၚ်သေံဟွံသေၚ် နကဵုသၞောတ်မူဝါဒတၟိ အခေါၚ်ဗ္တောန်ပညာသၟးသၟး ဏအ်ဝွံ စရၚ်လၟိဟ်စၟတ်တဲဖအိုတ် ဗ္ဒါဲမွဲကိုဋ်တၠဂှ် ဟွံဒုၚ်တဲ ဒစဵုဒစးအာပေၚ်ပေၚ်ရောၚ် ဂိတုမာတ် စၟတ်တ္ၚဲ (၁၇) နူတနေံဏအ် ဂကောံတေအချဳဝါ ကော် ဂကောံသော်ပါၚ်ဂှ် ကၠုၚ်စိုပ်ပ္တိုန်လဝ်လိက် ကုဌာနဝန်ဇၞော်ပရေၚ်ပညာသေံတအ် နွံရ။
ဂကောံညးဍုၚ်ကွာန်သေံ Thai Intolerable Team တေအချဳဝါ သော်ပါၚ်ဂှ်ဝွံ ကၠုၚ်စိုပ်ထ္ၜးဆန္ဒ ဂတမုက်ရုၚ်ဌာနဝန်ဇၞော် ပရေၚ်ပညာသေံဂှ်တုဲ “ကိစ္စပရေၚ်ဗ္တောန်ပညာ ကုကောန်ၚာ်ကွးဘာ ကောန်ဍုၚ်သေံဟွံသေၚ် ပ္ဍဲသၞာံ (၂၀၂၅) လလောၚ်တြးလဝ်တၟိဂှ် ကလေၚ်ရုပ်သီကဵုညိ’’ သာ်ဝွံ အာတ်မိက်ထ္ၜးကၠုၚ်ဆန္ဒရ။
နကဵုသၞောတ်မူဝါဒ ဌာနဝန်ဇၞော်ပရေၚ်ပညာသေံဂှ်ဝွံ သၞာံတုဲကၠုၚ်ဏအ် သွက်ကောန်ဇာတ်သၟာ ကမၠောန်ဆုဲပြံၚ် စိုပ်မံၚ်ဍုၚ်သေံဂမၠိုၚ်တအ်ဂှ် ညးတအ်စဳဇန်လဝ် ကဵုအခေါၚ်မံၚ်ဘာ နကဵုသၞောတ်ပရေၚ်ဗ္တောန်ပညာသၟးသၟး နွံကၠုၚ်လဝ်ရ။
ဆေၚ်စပ်ကဵု အခေါၚ်အရာတဏအ်ဝွံ နကဵုဂကောံ တေအချဳဝါ သော်ပါၚ်တအ် ကၠိုဟ်ကေတ်မံၚ်ကီုလေဝ် ပရေၚ်ဒးသုၚ်စောဲ ပါ်ပရအ်ကဵုမံၚ် ဩန် (budget) ဗၞတ် (၈၀၀) ပြကောတိကိုဋ်ၝာတ်ဂှ် ဒုၚ်တဲဟွံမာန်ရောၚ် ညးတအ် ဂးရ။
ဂကောံတေအချဳဝါ သော်ပါၚ်တအ်ဂှ် “ဒးစဵုဒစးမံၚ် အခေါၚ်အရာမၞိဟ်တအ် ဟွံသေၚ်၊ ရံၚ်ကဵုဩန် ဗိတ်ဂျိတ်တုဲ ပ္ဍဲကဵုမကတ်လ္ၚတ်ပရေၚ်ပညာမ္ဂး သွက်ကောန်ၚာ် ကောန်ဍုၚ်သေံဏအ် ဂွံရပ်စပ်စကာကၠာတဲထေက်ရောၚ်’’ သာ်ဝွံ ဟီုဂးလဝ်ရ။
ကိစ္စညးတအ်ဟွံဒုၚ်တဲ နကဵုလိက် ဒစဵုဒစး ကေုာံ စရၚ်ထ္ပက်စၟတ်တဲဂမၠိုၚ်တအ်ဝွံ ဌာနဝန်ဇၞော်ပရေၚ် ပညာသေံတအ် ဒုၚ်တဲကေတ်လဝ်တုဲ ကိစ္စဏအ်ဂှ် နကဵုဌာနဝန်ဇၞော်ပရေၚ်ပညာသေံတအ် ဆက်တုဲ ကလေၚ်သ္ၚဳဂၠိပ်သဳကၠဳအာပၠန်ရောၚ် ဂွံတီကေတ်ရ။
ညးထ္ၜးဆန္ဒ ဒစဵုဒစးတအ် အာတ်မိက်လဝ်ဂှ်ဝွံ နကဵုဌာနဝန်ဇၞော် ပရေၚ်ပညာတအ် ဟွံဒုၚ်ကၠုၚ်တဲမွဲသာ်မ္ဂး ညးတအ်အာပ္တိုန်ထ္ၜး စဵုကဵုရုၚ်သ္ကိုပ်ဝန်ဇၞော်တေံမာန်ရောၚ်ဂှ်လေဝ် ကဵုလဝ်သမ္တီကီုရ။
ပြဟ်ဟ်ဏအ် ပ္ဍဲကၟိန်ဍုၚ်သေံဝွံ နကဵုဂကောံညးဍုၚ်ကွာန်သေံ တေအချဳဝါ သော်ပါၚ်တအ် ကံက်ဂွံလဝ်စရၚ် လၟိဟ်ကောန်ကွးဘာ သၟာကမၠောန်ဆုဲပြံၚ် (၈၆,၀၀၀) တၠပြၚ်တုဲ အဌာန်ဂတဏအ် သွက်ကောန်ၚာ်သၟာကမၠောန်ဆုဲပြံၚ်တအ် သ္ဂောံပအပ်စွံ ပ္ဍဲဘာလွဳၜံၚ် နကဵုသၞောတ်ပရေၚ်ဗ္တောန်ပညာ သၟးသၟးဂှ် ဒှ်ကၠုၚ်တၚ်ခက်ခုဲမာန်ရောၚ် ဂွံတီကေတ်ရ။
ဗီုရုပ် – Thai News
