မာံတဵုလွဳ – ဌာနက္ဍိုက်က္ဍိုပ်ပရေၚ်သာသနာ၊ ဌာနဝန်ဇၞော်ပရေၚ်သာသနာ အလဵုအသဳကၟိန်ဍုၚ်ဗၟာတံ ကၠောန်သ္ပတုဲဒှ်အာ ပေဲါသၟာန်သွဟ်လိက်ဓမ္မစရိယ သၞာံ (၂၀၁၃) ဂှ်ဝွံ အတိုၚ်စရၚ်အံၚ် လလောၚ်ပ္တိတ်လဝ် ပ္ဍဲဂိတုဂျူလာၚ် (၁၄) ဂှ်မ္ဂး ခၟဳသၚ်မန်တံ အံၚ်အောန်ရောၚ် ဂွံတီကေတ် နူကျာ်ဇၞော်မန်ဂမၠိုၚ်ရ။

နကဵုခၟဳသၚ်မန်ဂမၠိုၚ်ဝွံ လၟိဟ်လုပ်သွဟ်လိက်တန်ဓမ္မစရိယ ဂၠိုၚ်ကၠုၚ်ကီုလေဝ် သွက်စရၚ်အံၚ်သၞာံဏံ ဟွံဂွံဇြဟတ်ရဂှ် ကျာ်ဇၞော်အ္စာ တိုက်လိက်ပရိယတ္တိမန်ဗဵုလ္ၚီ၊ ဍုၚ်လ္ဂုၚ် ဟီုမြော်ရ။

“ပ္ဍဲသၞာံဏံ ပၞောဝ်ကဵုသာမဏဳခၟဳသၚ်မန် လုပ်သွဟ်လိက်တန်ဓမ္မစရိယဖအိုတ် ၜိုတ် (၂၀၀) ဇကုဂှ် ပိကၞပ် (၇) ဇကု၊ ၜါကၞပ် (၆) ဇကု ကေုာံ မွဲကၞပ် (၂) ဇကုဟေၚ် အံၚ်ကၠုၚ်ရ” သာ်ဝွံ ကျာ်ဇၞော်ဂှ် ဟီုမြော်ရ။

ပ္ဍဲသၞာံတုဲကၠုၚ်ဝွံ ပၞောဝ်ကဵုခၟဳသၚ်မန် လုပ်သွဟ်လိက်တန်ဓမ္မစရိယ ကြပ်ၜိုတ် (၂၀၀) ဇကုဂှ် မွဲကၞပ်၊ ၜါကၞပ်၊ ပိကၞပ် အလုံသီုဖအိုတ်ဂှ် အံၚ်အာ (၉၀) ဇကုပြၚ်ရ။

ဆဂး ဟိုတ်နူသၟာန်ဝါတ်တုဲ အံၚ်အောန်ဟွံသေၚ်ရဂှ် ကျာ်ဇၞော်ဂှ် ဆက်မြော်ဂလာန်ရ။

“ပေဲါသၟာန်သွဟ်လိက်ပရိယတ္တိ ကၟိန်ဍုၚ်ကၠောန်ဗဒှ်ဂှ် ကၠာဟွံစိုပ်အတးဏီ သွဟ်တုဲမံၚ်အိုတ်ရ။ သၞာံဏံဂှ် ဟိုတ်နူပရေၚ်ပကီုပရာပ်လကျာ် ပ္ဍဲဒဵုကျေနဳတုဲ ပေဲါသၟာန်သွဟ်လိက်တန်ဓမ္မစရိယဂှ် အတးလောန်တုဲမှ ဂွံသွဟ်တှေ် ပ္ဍဲကဵုသွဟ်လိက်ဂှ် စိုတ်သာသ္ပံအာရ” သာ်ဝွံ ကျာ်ဇၞော်ဂှ် ဟီုမြော်ရ။

ခၟဳသၚ်လ္ၚဵုတံဝွံ ဟိုတ်နူဂွံသွဟ်လိက်လဇုဲ ပ္ဍဲဂိတုမေ (၂) ဂှ်ရ ဟွံသွဟ်လိက်ရတုဲ စဴအာမံၚ်တန်တဴ ပ္ဍဲကွာန် မိမဂမၠိုၚ်တေံ နွံရ။

တုပ်သာ်ဂှ်ကီု ပ္ဍဲပေဲါသၟာန်သွဟ်လိက် (ပထမပြန်စာမေးပွဲ) ဂှ်လေဝ် ခၟဳသၚ်၊ သာမဏဳမန် လၟိဟ်ဇကုအံၚ်အောန်ကၠုၚ်ကီုရောၚ်ဂှ် ဒကာဘာဝေယျာဝစ္စပိုန် နူတိုက်လိက်မန်နန္ဒဝန်၊ ဍုၚ်ဇြပ်ဗုဂှ် ဟီုရ။

“ခၟဳသၚ်၊ သာမဏဳ၊ သဳလ ညးကတ်လိက်တံ သီုဖအိုတ် စၞးဂွံသွဟ်လိက် ဗွဲမၜိုဟ်သြိုဟ်ဂှ် ဒးဒှ်မံၚ်ဓဝိၚ်သောကတုဲ ပ္ဍဲပေဲါသၟာန်သွဟ်လိက်ဂှ် စိုတ်သာသ္ပံအာရ။ တၟံကၠံအံၚ် (ပထမပြန်) သၞာံဏံ ခၟဳသၚ်မန် အံၚ် (၁၃) တၟံကၠံဟေၚ်ရဂှ် ကျာ်ဇၞော်ဂမၠိုၚ်တံ ဟီုမြော်ရ” သာ်ဝွံ ဒကာဘာဂှ် ဟီုရ။

ဌာနက္ဍိုက်ပ်ပရေၚ်သာသနာ၊ ဌာနဝန်ဇၞော်ပရေၚ်သာသနာ အလဵုအသဳကၟိန်ဍုၚ်ဗၟာတံ ကၠောန်ဗဒှ်တုဲဒှ်အာ ပေဲါသၟာန်သွဟ်လိက်တန်ဓမ္မစရိယ သွက်သၞာံ (၂၀၁၃) ဂှ် ပၞောဝ်ကဵုခၟဳသၚ် ကေုာံ သဳလ လုပ်သွဟ်လိက်ဂမၠိုၚ်တံဝွံ ပိကၞပ် (၅၂၆) ဇကု၊ ၜါကၞပ် (၉၉၉) ဇကု၊ မွဲကၞပ် (၁၅၃၇) ဇကု၊ ဂုန်တၟေၚ်ဗၟာ (၇) ဇကု အံၚ်အာရောၚ်ဂှ် ဓမံက်ထ္ၜးလဝ် ပ္ဍဲလိက်ပရိုၚ်ဗၟာ ဂိတုဂျူလာၚ် (၁၅) ဂှ်ရ။