မာံသုတ – ကောန်ဂကူမန်ပိုဲတံ ဆၜိုတ်ဂွံအခေါၚ်အရာလိက်ပတ်ယေန်သၞာၚ်တံညိညဟေၚ် လ္ပလဟိၚ်မံၚ်အိုတ်ညိဂှ် သဘာပတိ ကောံဓရီုဇၞော် ပရေၚ်ဂကူမန် (၂၀၁၃) ဥက္ကဌဗော်ဍုၚ်မန်တၟိ နာဲထဝ်မန် တိုန်စိုပ်ဟီုဏာပၟိၚ်ဂလာန် ပ္ဍဲတ္ၚဲပထမဂှ် ကဵုဏာသတိနွံရ။

“အခေါၚ်အရာပရေၚ်ဍုၚ်ကွာန် သွက်ဂကူမန်ပိုဲ မန်ပိုဲတအ်မုဒးအာတ်မိက်ဂှ် ညးညးအဲအဲ သွက်ဂွံဒးတီကၠိုဟ်လဝ်ကီု ၊ မွဲလပါ်ဂှ်ပၠန် လညာတ်စိုပ်မံၚ်တၞုၚ်တၞးတံဟီုဂှ် နကဵုဝၚ်အတိက် ဂကူဇကုမွဲဟေၚ် ခိုဟ်အိုတ် ပြဲအိုတ်ဂးတုဲ ဍဵုဍိုက်ပျုတ်ဗဒေက်ဖျေံ ဂကူတၞဟ်ဟ်တအ်ဂှ် ညံၚ်ဂွံဝေၚ်ပဲါအာကီု” သာ်ဏံ ဥက္ကဌဇၞော် ဗော်ဍုၚ်မန်တၟိ နာဲထဝ်မန် ဟီုလဝ်ဂလာန် ဂွံတီရ။

ကောံဓရီုဇၞော် ပရေၚ်ဂကူမန် (၂၀၁၃)ဂှ် စပ္တံကၠောန်ဗဒှ်လဝ် ဒၞာဲကဵုၝောံခန်တွဵုရးဍုၚ်မန် ပ္ဍဲဂိတုသေပ်တေမ်ပါ ၂၈ အခိၚ်နူဂယး ၈း၃၀ နာဍဳဂှ် က္ဍိုပ်သကိုပ်ပရေၚ်ဍုၚ်ကွာန်မန်ဂမၠိုၚ်၊ ကျာ်ဇၞော်အစာဂမၠိုၚ်၊ ဝန်ဇၞော်တွဵုရးဍုၚ်မန် ဥူအုၚ်မျေအ်ကေုာံ ဝန်ဇၞော်ဂမၠိုၚ်၊ ဝန်ဇၞော်ကၟိုန်ဍုၚ် ဥူအံၚ်မေန် ကေုာံ ဂကောံကမ္မတီ ထမံက်ရုပ်ရဴ ပရေၚ်ၜိုဟ်လလမ်အလုံကၟိုန်ဍုၚ်၊ ဗော်ဍုၚ်မန်တၟိ၊ ဗော်ဒဳမဵုကရေဇြဳ အလုံရးမန်၊ ဗော်ဒဳမဝ်ကရေသဳမန်၊ ဂကောံမှာဇန်ညးဍုၚ်ကွာန်မန်နာနာ၊ ညးစၞးဂကောံမန် စိုပ်ဍုၚ်သအာၚ်ဂမၠိုၚ်တံ နကဵုညးစၞးဗွဲမဂၠိုၚ်၊ ညးတိုန်လ္ၚတ် ကေုာံ ကၟုဲတၟေၚ်တံ အပံၚ်ဖအိုတ် ၜိုတ် ၄၀၀ တၠ တိုန်စိုပ်လဝ်ရ။

တုဲပၠန် ဒု-ဥက္ကဌ ကမ္မတီ ထမံက်ရုပ်ရဴ ပရေၚ်ၜိုဟ်လလမ်အလုံကၟိုန်ဍုၚ် ဥူအံၚ်မေန်ဂှ် ပ္ဍဲကဵုဂိတု အံက်တဝ်ပါဏံ ကာလကၠောန်ဗဒှ်ပေဲါထပက်စၟတ်တဲဒေါအ်ပန်ပှော် အလုံကၟိုန်မ္ဂး ဗော်မဆေၚ်စိုပ်တအ် ညံၚ်ဂွံတိုန်စိုပ်မာန်ဂှ်ဖတိုက်ဖအောဝ်လဝ်ကီုရ။

“ပ္ဍဲကဵု အခိၚ်ကာလ အဲဒှ်ဝန်ဇၞော်ဏံ ကၠောန်ဗဒှ်ဏာ သဘၚ်ကောံဓရီုဇၞော်ပရေၚ်ဂကူမန် ဗီုဏံမာန်ဂှ် မိတ်စိုတ်အိုဟ်တၟိုဟ် ကေတ်ဂုဏ်စရာဲကွေံကွေံရ” သာ်ဏံ ဝန်ဇၞော်တွဵုရးဍုၚ်မန် ဥူအုၚ်မျေအ် ဟီုရ။

ပ္ဍဲကဵု ကောံဓရီုဇၞော် ပရေၚ်ဂကူမန်ဏံဂှ် နူကဵု ဗော်ဍုၚ်မန်တၟိဂှ် ပတိုန်ထ္ၜးလိက်စံၚ် နကဵုက္ဍိုပ် “သွက်ဂွံဒက်ပတန် ဓရ်ၜိုဟ်လလမ်ဍာ်ဇမၠိၚ် ပ္ဍဲဍုၚ်ပိုဲ”၊ ဗော်ဒဳမဵုကရေဇြဳ အလုံရးမန်ဂှ် နကဵုက္ဍိုပ် “ ဍုၚ်ပိုဲ ညံၚ်ဂွံၜိုဟ်သြိုဟ်တန်ကြန် ဖောအ်ဗြေဝ်တဴတက်တိုန်” ၊ ကေုာံ ဗော်ဒဳမဝ်ကရေသဳမန်ဂှ် နကဵုက္ဍိုပ် “ အလုံကောန်ဂကူမန် ဂွံညဳသာဒှ်မွဲဒြဟတ်” တအ်ရောၚ် ဂွံတီရ။

ကောံဓရီုဇၞော်ဏံတုဲမ္ဂး သွက်ဂွံဆက်ကၠောန်ဗဒှ်အာ Mon National Convention သဘၚ်သဳကၠဳအလုံကောန်ဂကူမန်ရောၚ်ဂှ် ရန်တၟံလဝ်နွံ သာ်ဝွံဥက္ကဌ ကၠောန်ဒှ်ကောံဓရီုဇၞော် ပရေၚ်ဂကူမန် အစာသဝ်ဟံၚ်ဍုၚ် ဟီုလဝ်ရ။

ကောံဓရီုဇၞော် ပရေၚ်ဂကူမန်ဝွံ (၁) သွက်ဂွံကၠောန်အာ သဘၚ်သဳကၠဳကောန်ဂကူမန်၊ (၂) အလုံဂကူမန် ဂွံညဳသာဒှ်မွဲဇြဟတ်၊ (၃) သွက်ဂွံဒက်ပ္တန်အာ ၜိုဟ်လလမ်ဍာ်ဇမၠိုၚ် အပ္ဍဲဍုၚ်ပိုဲ၊ (၄) အလုံကောန်ဂကူမန် သွက်ဂွံဒက်ပတန်အာ ပရေၚ်ဖောအ်ဗြေဝ်တဴတက် သာ်ဝွံ တၚ်ရန်တၟံ ၄ တၚ်ပါလုပ်ရ။

ကောံဓရီုဇၞော် ပရေၚ်ဂကူမန် ကၠောန်ဗဒှ်ပ္ဍဲကဵုဍုၚ်မတ်မလီု ပွိုၚ်(၃)တ္ၚဲဏံဂှ် ဒှ်အလန်ကိုပ်ကၠာအိုတ်တုဲ အခိၚ်ကၠာတေံ ကေၚ်ကၠာန်ဗဒှ်ကၠုၚ် ဒၞာဲတိဍာ်ဒေသအုပ်ဓုပ်ဗော်ဍုၚ်မန်တၟိ ၆ ဝါ တုဲကၠုၚ်ရ။