ခတ္တာနန် – ဂကောံဇာဖိုၚ်ညးဗြဴမန် ကၟိန်ဍုၚ်ဗမာ WON ကေုာံ ဂကောံညးဗြဴ WLB တံ ပံၚ်တောဲတုဲ အပ္ဍဲဂိတုသေပ်တေမ်ပါ ၂၂ ဂှ် စတုဲပွိုၚ် ၃ တ္ၚဲကၠောန်ဗဒှ်ဏာလဝ် ပေဲါသဳကၠဳ Forum ညးဗြဴ အလန်ကိုပ်ကၠာအိုတ်ရောၚ် ညးစၞးတိုန်စိုပ်လဝ် ပေဲါသဳကၠဳ ညးစၞးဗော်ဒဳမဝ်ကရေဇြဳမန် မိသုဟီုရ။
ပေဲါသဳကၠဳ ဂကောံ Forum ညးဗြဴ ကၟိန်ဍုၚ်ဗၟာ(EKO-Facebook)
နကဵုညးစၞးဗော်ဒဳမဝ်ကရေသဳမန်ဂှ် ဖိတ်ဒရေဝ်ဟီုဂှ်မုရော ဒးထပ်သောၚ်ကလးဏာကဵု ညးဍုၚ်ကွာန်တံထေက်ကီု၊ သွက်ကောန်ဂကူကောန်ဍုၚ်အရၚ်တံ သ္ဂောံကလိဂွံအခေါၚ်အရာဍိုက်က်ပေၚ်ၚ်မာန် ကေုာံ အပ္ဍဲကဵုအခန်ကဏ္ဍ ပရေၚ်ဍုၚ်ကွာန်ဂှ် ညးဗြဴတံၜိုတ် ၃၀ တၟံကၠံ သ္ဂောံပါလုပ်မာန် တုပ်လဝ်စိုတ် ထပက်လဝ်စၟတ်တဲရဂှ် မိသု ဆက်ဟီုရ။
တုဲပၠန် သၞောတ်ဝ်ဥပဒေ သွက်မၚ်မွဲစဵုဒၞ ကုညးဗြဴတံကီု၊ သွက်ဂွံကလေၚ်ပလေဝ် ချူဓဇက်သဇိုၚ်သၞောဝ်ဥပဒေ ၂၀၀၈ ကေုာံ အပ္ဍဲကဵုပေဲါသဳကၠဳပရေၚ်ၜိုဟ်လလမ်မ္ဂး သွက်ညးဗြဴတံ ဂွံပါလုပ်ကီု၊ ပရေၚ်ကဆံၚ်ဟွံတုပ်သၟဟ်ကဵု မၞိဟ်တြုံတံကီု၊ အပ္ဍဲကဵုကၠောန်သ္ပဖျေံတၚ်သ္ကုတ်သွာတ်ပၟိက်ဇၞော်ဇၞော်မွဲမွဲမ္ဂး ညးဗြဴတံလေဝ် ညံၚ်ဂွံပါလုပ်ကီု သာ်ဝွံသဳကၠဳလဝ်ရ။
အပ္ဍဲပေဲါသဳကၠဳ Forum ညဗြဴတံဂှ် ဂကောံညးဗြဴဂမၠိုၚ်၊ ဂကောံညးဗြဴချဳဒရာၚ်မံၚ် အပ္ဍဲဒေသပယျဵု၊ ဂကောံညးဗြဴကောန်ဍုၚ်အရၚ်တံ ကေုာံ ညးဗြဴပါလုပ်ဗော်ပရေၚ်ဍုၚ်ကွာန်ဂမၠိုၚ် သီုဖအိုတ်ၜိုတ် ၄၀၀ တၠတိုန်စိုပ်လဝ်နွံတုဲ ပေဲါသဳကၠဳဂှ် ကၠောန်ဗဒှ်ဏာ အပ္ဍဲတိုက် Excel Tower လ္တူဍုၚ်လ္ဂုၚ် မဒှ်ရ။
ဂကောံသ္ၚိဇာဖိုၚ်ညးဗြဲ ကၟိန်ဍုၚ်ဗၟာ (WON) ဂှ် စပံက်လဝ် အပ္ဍဲသၞာံ ၂၀၀၈ တုဲ လၟုဟ်မ္ဂး ဂကောံၜိုတ် ၃၀ ဂကောံပံၚ်ကောံလဝ်ရ။
တုဲပၠန် ဂကောံညးဗြဴကၟိန်ဍုၚ်ဗၟာ (WLB) မဖျေံလဝ်သဇိုၚ်အပ္ဍဲဍုၚ်သေံဂှ်လေဝ် နကဵုဂကောံညးဗြဴ ကောန်ဂကူကောန်ဍုၚ်အရၚ် ၁၃ ဂကောံတံ ပံၚ်ကောံပံက်လဝ် မဒှ်ရ။
