ပ္ဍဲတွဵုရးဍုင်မန်ဝွံ ကပေါတ်ဗၞိက်တိတ်အပ္ဍဲဍုင် ၚုဟ်သၠုင်တိုန်ကၠုင်ဒၟံင် ဟွံမွဲကဵုသၞောတ်ဗ္ၜတ်ဂှ်ရ ကပေါတ်လ္ၚဵုတံဂှ် ဒေံါဇူလဝ် ပရေင်သွံရာန်ရောင် ညးရာန်စကဵု တၠဆေင်ဖျာတံ ဟီုရ။
အခိင်လၟုဟ်ဏံ သၟာင်နူသ္ၚု၊ ကၠေင်၊ လသိုန်၊ ကဖျုန် ကေုာံ ကပေါတ်စသုင်သဇိုင်ဂမၠိုင်တုဲ ကပေါတ်မၞိဟ်တံစကာလၟေင်တ္ၚဲဂှ်လေဝ် ကြပ်ဇၟာပ်အဒိုတ် ၚုဟ်သၠုင်တိုန်ကၠုင်ဒၟံင် ဟွံမွဲကဵုသၞောတ်ဗ္ၜတ်ရ။
လသိုန်ဗ္ကေတ်မွဲပသာ ၚုဟ်သၠုင်တိုန်မံင် စဵုကဵု (၂၀၀၀၀) ဒကေဝ် ကေုာံ ကပေါတ်စသုင်တၞဟ်သၟာင်၊ ကပေါတ်သိုင်ခၞံဂမၠိုင်ဂှ် ဂွိင်ဖေက်ညးရာန်ဟွံမွဲဂှ်ရ ဒေံါဇူသွံရောင် ညးဒေသဇြပ်ဗုမွဲတၠ ဟီုရ။
“ၚုဟ်မးကပေါတ်တံဂှ် တိုန်အာ မွဲအသိင်ဓဝ်ရ။ ကၠာတေံတှ်ေ သၞောတ်ဗ္ၜတ်ကၟာတ်ထောံ ကပေါတ်သေံတုဲ ၚုဟ်တိုန်ဂှ် မွဲဗီု။ လၟုဟ်ဏံ ကပေါတ်တိတ်အပ္ဍဲဍုင်လေဝ် ၚုဟ်တိုန်မံင် ဟွံမွဲကဵုသၞောတ်ဗ္ၜတ်။ ကပေါတ်လ္ၚဵုတံဂှ် ဆေင်ဖျာတံ ဟွံသွံရပုဟ်။ ၚုဟ်တိုန်မံင် ဟွံမွဲကဵုသၞောတ်ဗ္ၜတ်တှ်ေ ဂွိင်ဖေက်ညးရာန်ဟွံမွဲတုဲ ဟွံသွံရ” သာ်ဝွံ ညးဟီုရ။
အခိင်ကပေါတ်အပ္ဍဲဍုင် ၚုဟ်ဟွံညိင်မံင်ဏံဂှ် ဟွံက္လေင်ရာန်ဗပေင်ကပေါတ်တၟိမွဲသာ် ကပေါတ်မၞုံပ္ဍဲဆေင်ဂမၠိုင်ဂှ်ဟေင် သွံမံင်တုဲ ဆေင်ဖျာလ္ၚဵုတံဂှ်လေဝ် တၟာတ်လဝ်ယာယဳနွံရောင် ဂးရ။
အခိင်လၟုဟ်ဏံ ပ္ဍဲတွဵုရးဍုင်မန်ဂှ် ဖျုန်ကၠိက်မွဲပသာ (၃၀၀၀၀) ဒကေဝ်၊ ဖျုန်စာင်ဂြိုပ်မွဲပသာ (၃၅၀၀၀) ဒကေဝ်၊ စာင်ကြံင်မွဲပသာ (၂၅၀၀၀) ဒကေဝ် ကေုာံ လသိုန်ဗ္ကေတ်မွဲပသာ (၂၀၀၀၀) ဒကေဝ်ပြင် ၚုဟ်သၠုင်တိုန်ကၠုင်ဒၟံင်ရ။
တၠဆေင်ဖျာ နူပွိုင်ဍုင်မုဟ်ဍုင်မွဲတၠဂှ် “သ္ၚုဂှ်တှ်ေ ၚုဟ်ပဵုတိုန်ရ။ သ္ၚုတဆိပ် (မြတံဆိပ်) မွဲရိုက်ဂှ် ကၠာတေံတှ်ေ မွဲကိုဋ်ကဵုမသုန်ဠက်ဟေင် နွံရ။ လၟုဟ်ဏံ ဒှ်အာ ၜါကိုဋ်ကဵုမသုန်ဠက်ရ။ ပြဟ်ပြဟ်ပြေဟ်ပြေဟ်ဂှ် တိုန်အာ ၜိုတ်မွဲကိုဋ်ရ” သာ်ဝွံ ညးဟီုရ။
တုဲပၠန် သၟတ်မန် ကၠောန်ဒၟံင်ကမၠောန် ပ္ဍဲဍုင်မတ်မလီုမွဲတၠဂှ်လေဝ် ဟိုတ်နူကပေါတ်အောန်ကၠုင် ကေုာံ ၚုဟ်မးသြန်ဗၟာစှ်ေကၠုင်ဂှ်ရ ၚုဟ်မးဖျာ တိုန်ကၠုင်ဟွံမွဲကဵုသၞောတ်ဗ္ၜတ် ဒှ်မာန်ရောင် ဂးရ။
“မုကပေါတ်ဒှ်ဒှ် အောန်ကၠုင်ကွေံရ။ ကပေါတ်ဂှ်တှ်ေ ဠဂွံမှ ဂွံရ။ ဠဂွိုအ်တှ်ေ ဂွိုအ်ပုဟ်။ ဒးဟီုတှ်ေ အခိင်မိက်ဂွံရာန်ဂှ် ဂွံမံင်ဟွံသေင်ပုဟ်။ ၚုဟ်ဂှ်လေဝ် မွဲတ္ၚဲကဵုမွဲတ္ၚဲ တိုန်ကၠုင်မံင်ရ။ တုဲတှ်ေ လှုဲၜိုတ်မွဲကိုဋ်၊ ၜါကိုဋ်ဂှ် မုပဟွံဂွံပုဟ်” သာ်ဝွံ သၟတ်ဂှ် ဟီုရ။
ၜိုန်ၚုဟ်မးကပေါတ်ဗၞိက်ဂမၠိုင် သၠုင်တိုန်ကၠုင်မွဲအသိင်ဓဝ်ကီုလေဝ် သြန်လုပ် ကေုာံ သြန်ဂိတု သွက်သၟာကမၠောန်သဇိုင်တံ ဟွံတိုန်ကၠုင်ဂှ်ရ စၞစသဇိုင်ဂမၠိုင်ဂှ်လေဝ် ရာန်စဟွံမာန်တုဲ ကပေါတ်မၞုံပၟိက်ဂမၠိုင်ဂှ်ဟေင် ဒးချိင်ဆရာန်မံင်ရောင် ဂးရ။
မွဲလ္ပာ်ပၠန်ဂှ်လေဝ် သွက်ဂွံဗပေင်သြန်ဘဏ္ဍာမနွံပၟိက်ဂှ် အစဳစန်တိုက်သြန်ဗဟဵု ကမ္မယှေန်ပၞာန် ဂၠေံသြန် စဵုကဵု (၂ ဒသမ ၁ ထရဳယာန်) ဒကေဝ် နူကဵုကၟိန်ဍုင်ဗဳလာရုတ် ကၠတ်ထဝ်ကၟိန်ဍုင်သ္ပဒတန်တုဲဂှ် သြန်ၝာတ်သေံ၊ ဒဝ်လာအမေရိကာန် ၚုဟ်မးသြန်ဍုင်သၟာင်ဂမၠိုင် သၠုင်တိုန်ကၠုင်တုဲ ၚုဟ်သြန်ဗၟာ စှ်ေအာ ကၠးကၠးဖ္ဍးဖ္ဍးရ။
ဗွဲကြဴနူသီအဝဵုတုဲ အခိင်ဒးဆဵုဂဗမံင် ပရေင်ကြေပ်ဂြတ်ပိုန်ဒြပ်နာနာဏံ က္ဍိုပ်သ္ကိုပ်ပၞာန်မေန်အံင်လှာင် ဒုင်လဝ်ဝန် သၞေဟ်ကင်သၟဝ်တဲဂမၠိုင် ကံက်ဒၟံင်သြန် ဟွံဗဗွဲဓဝ်ကီုလေဝ် သၟာင်နူဟွံကေတ်အရေဝ်ဗွဲမစိုပ်တရဴတုဲ ဟိုတ်နူညးဍုင်ကွာန်ကဵု ညးပၠန်ဂတးမံင်ဟွံဗဗွဲဓဝ်ဂမၠိုင်ဂှ်ရောင် သီုဟီုဂးစုတ်မံင်ဒုဟ်အဆက်ဆက်ရ။