နာဲမာန် – ဗော်ဒဳမဝ်ကရေသဳမန်(MDP) ဝွံ မွဲဒမြိပ် လလောၚ်တြးဒစဵုဒစးလဝ် သွက်ဂွံလုပ်ပေဲါရုဲမာဲ (၂၀၁၅) ဂှ် တ္ၚဲဏံ နကဵုလုပ်သၞောဝ် လ္ဒောဝ်ကောန်ဂကူမန်ဂမၠိုၚ် နကဵုဗော်ဒဳမဝ်ကရေသဳမန် လုပ်ပေဲါရုဲမာဲရောၚ် လလောၚ်ဏာ ပ္ဍဲကောံဓရီုဇၞော်ပရေၚ်ဂကူမန် တ္ၚဲလ္ဒောဝ် September 29 ဂှ်ရ။

နကဵုဂၠံၚ်တရဴ ဗော်ဒဳမဝ်ကေရေသဳမန် မွဲဒမြိပ်လလောၚ်တြးလဝ်ဂှ် ပဠေဝ်သၞောဝ် (၂၀၀၈) ဂှ် အဓိက၊ လုပ်ပေဲါရုဲမာဲ (၂၀၁၅) ဂှ် ဒှ်သာမည သာ်ဝွံ ဟီုတြးလဝ်နွံတုဲ ပရေၚ်ဗော်ၜါ (AMDP,MDP) ဂှ် ပ္ဍဲကဵုကမ္မတဳ ကေၚ်ကာဗဟဵု အကြာဗော်ၜါတအ် ဒှ်အာပရေၚ်ဝိဝိၚ် သွက်ဂွံပံၚ်နွံရ။

“တ္ၚဲဏံတှေ် နကဵုအဲ ညးအုပ်ကာနာနာ ဗော်ဒဳမဝ်ကရေသဳမန် (MDP) လလောၚ်တြးဏာ ဒတုဲဒတုဲရ နကဵုဗော်ပိုဲ ပေဲါရုဲမာဲ (၂၀၁၅) ဏံ နကဵုဗော်ဒဳမဝ်ကရေသဳမန် (MDP) လုပ်ပေဲါရုဲမာဲရောၚ်” သာ်ဏံ ညးအုပ်ကာနာနာ အ္စာသဝ်နာဲစောန်တၟး ဟီုလလောၚ်တြးဏာ ပ္ဍဲကောံဓရီုဇၞော်ပရေၚ်ဂကူမန် တ္ၚဲလ္ဒောဝ် ဂှ်ရ။

စပ်ကဵုပရေၚ်ဂၠံၚ်တရဴ ဗော်ဒဳမဝ်ကရေသဳမန် (MDP) ဂှ် ဟီုလလောၚ်တြးလဝ် ဟွံစွံအဓိကကဵု ပေဲါရုဲမာဲ (၂၀၁၅) ဂှ်တုဲ “ဗော်ၜါ ယဝ်ဒှ်ပံၚ်အာတုဲ ဗော်မန်ဒဳမဝ်ဂှ် ညးတံ ဟွံလုပ်ပေဲါရုဲမာဲတွဵု ယဝ်ရဒှ်တှေ် နကဵုဗော် AMDP ပိုဲ ဒှ်ခက်အာဟဂှ်ရ၊ ဗော်ပိုဲဂှ် ညးတံ လုပ်ပေဲါရုဲမာဲတွဵုရောၚ်” သာ်ဏံ ကမ္မတဳကေၚ်ကာ ဗော် AMDP နာဲအံက်သာ ဟီုထံက်ထ္ၜးရ။

နကဵုဂၠံၚ်တရဴဗော်ဒဳမဝ်ကရေသဳမန်ဂှ် မွဲဒမြိပ် စှေ်ပရေၚ်စန္ဒက်ကီု သ္ပပေဲါသောၚ်ကလး ကုညးဍုၚ်ကွာန် ဂမၠိုၚ်ကီု ဟွံပဠေဝ်သၞောဝ် (၂၀၀၈) ဒဵုကဵုညးဂလိုၚ်ဒုၚ်တဲမ္ဂး နကဵုဗော်ဒဳမဝ်ကရေသဳမန် ဟွံချပ်လ္ပာ်ပရေၚ် ပေဲါရုဲမာဲပုဟ်ဂှ် ဟီုလလောၚ်လဝ်သာ်ဂှ်တုဲ ညးဍုၚ်ကွာန်ဂမၠိုၚ်ကီု ခမဳသၚ်ဂမၠိုၚ်ကီု စှေ်လဝ်စိုတ် ဗော် MDP ဟွံလုပ်ပေဲါရုဲမာဲ (၂၀၁၅) ဂၠိုၚ်ရ။

“ နူစပံက်ဗော်ပရေၚ်ဍုၚ်ကွာန်ယျဟီုတှေ် ဂၠံၚ်ဒးတတ်ပေဲါရုဲမာဲဟေၚ်ရနွံ၊ ၜိုန်ဂှ်ကီုလေဝ် လုပ်ပေဲါရုဲမာဲတုဲ အရၚ်ဂွံလုပ်ပေဲါဗ္တိုက် သွက်အခေါၚ်အရာကောန်ဂကူ ပ္ဍဲကဵုသ္ဇိုၚ်သၞောဝ်ဥပဒေကၟိန်ဍုၚ်ဂှ် ဂၠံၚ်ထောၚ် ဟွံထောၚ်၊ ယဝ်ရ ဂၠံၚ်ထောၚ်မံၚ်ရတှေ် လုပ်ပေဲါရုဲမာဲဂှ် သက်ဒးကယျာန်ဟွံမွဲ၊ အဵု – ယဝ်ရ ဇၞးအာမာဲဖိုဟ် သွက်ဂွံဆက်လုပ်အာပေဲါဗ္တိုက် ဂၠံၚ်ပရေၚ်ကောန်ဂကူဇကု ဂၠံၚ်လေဝ်ဟွံထောၚ်ပုဟ် သ္ဇိုၚ်သၞောဝ်ဥပဒေဂှ် တာဒၞာလဝ်တှေ် ဇၞးအာပေဲါရုဲမာဲတုဲလေဝ် အခေါၚ်မုဟွံမွဲပုဟ်၊ သောၚ်ဂှ်ရ နကဵုမူဗော်ပိုဲ ဒးရပ်လဝ်သာ်ဂှ်” သာ်ဏံ ကမ္မတဳကေၚ်ကာ နာဲလျးတၟး ဟီုရ။

တ္ၚဲဏံ ဗော်ဒဳမဝ်ကရေသဳမန် လလောၚ်တြးဏာ လုပ်ပေဲါရုဲမာဲရောၚ်တုဲဂှ် ဂကောံဗော် MDP ဂမၠိုၚ် ကၠး အာစိုတ်ကၠာကီုလေဝ် ပ္ဍဲစိုတ်ညးဍုၚ်ကွာန်ဂမၠိုၚ် ဗော်ၜါ ယဝ်ဟွံဒှ်ပံၚ်ကောံတွဵုမ္ဂး ပေဲါရုဲမာဲ (၂၀၁၅) ဏံ ဗီုလဵုက္ဍိုပ်သ္ကိုပ်ဗော်မန်ၜါ လးဏာဂၠံၚ်တရဴ သွက်ဂွံပြိုၚ်ပ္ကာန်ပေဲါရုဲမာဲ (၂၀၁၅) ဂှ် ညးဍုၚ်ကွာန်ဂမၠိုၚ် စၟဳအခါတ်အကာဲဒၟံၚ်ရ။