-
- ပေါဲဆဵုဂဗ ကွာန်ပ္ၚ(BNI)
-
- ပေါဲဆဵုဂဗ ကွာန်ပ္ၚ(BNI)
ကာလကံက်စရၚ်ကၟိန်သ္ၚိဂှ်မ္ဂး လၟိဟ်မၞိဟ်ဝွံ သွက်ကောန်ဂကူမန်တံဂှ် ကိစ္စဇၞော်မံၚ်ရ။ ကောန်ဂကူမန်ဂမၠိုၚ်တံ နွံပြးဇးမံၚ် အလုံဂၠးတိတုဲ မိမကလောကောဒေံကောန်ဇာတ်ဇကု ၜိုန်နွံပ္ဍဲဍုၚ်သေံ၊ မလေဝ်ယှာ၊ အမေရိကာန်ကီုလေဝ် ဆီမန်နွံမ္ဂး စုတ်ပ္ဍဲစရၚ်ဂကူမန်ညိဂှ် “နာဲကသုမန်” ဒါရိုက်တာ ဂကောံဒက်ပ္တန်အခေါၚ်အရာမၞိဟ် အပ္ဍဲဍုၚ်မန် ဟီုဂးဏာ ပ္ဍဲစၟတ်တ္ၚဲ (၂၀) ဂိတုဖေဖဝ်ဝါရဳ၊ ဒၞာဲၝောံခန် လိက်ပတ် ကေုာံ ယေန်သၞာၚ်မန် ကွာန်ပ္ၚ ပွိုၚ်ဍုၚ်ဇြပ်ဗုဂှ်ရ။
“ညးလ္ၚဵုတံ ဟွံဒုၚ်ယၟုမန်ရ။ ဟွံမိက်ဒှ်မန်တုဲ မိက်ဂွံဒှ်မံၚ်ဗၟာရ။ ဒုၚ်ကေတ်ဂကူဗၟာ ဗီုဂှ်ဏောၚ်တှေ် ဂကူမန်တံအောန်ရ။ အခေါၚ်အရာတံ ယအ်အာတှေ် သွက်ဂကူဇကုဟေၚ် ဂိရ” သာ်ဝွံ နာဲကသုမန် ဟီုရ။
ဂကူမန်ဂမၠိုၚ်တံဝွံ ၜိုန်စှေ်ဒၞာဲအိန်ထံၚ် ကုဂကူတၞဟ်သၟာၚ်ကီုလေဝ် ကောန်ဇာတ်ဂမၠိုၚ်တံဂှ် ညံၚ်ဂွံစုတ် ပ္ဍဲစရၚ်ဂကူမန်ကီု၊ ကာလကံက်စရၚ်ကၟိန်သ္ၚိဂှ်လေဝ် ဟွံချူနကဵုအက္ခဝ်မန်တုဲ နကဵုအက္ခဝ်အၚ်္ဂလိက် စၟတ်ဂၞန် code (601) ဟေၚ် စၟတ်သမ္တီကေတ် မဒှ်တုဲ ကာလကံက်စရၚ်မ္ဂး ပရေၚ်ဓဝ်ဍာံ နွံ၊ ဟွံမွဲ ဟီုဂှ် ညးမၞုံဗဟုသုတ၊ ညးဗှ်လိက်မွဲမွဲတၠတံ ညံၚ်ဂွံမၚ်ကျောဝ်ကီုဂှ်လေဝ် သဂးလဝ်နွံရ။
ဝန်ဇၞော်ကၟိန်ဍုၚ် “ဥူခေန်ယဳ” ဌာနဝန်ဇၞော်ဇြဟတ်ညးဍုၚ်ကွာန် ကေုာံ ပရေၚ်ကောပ်ကာဲမၞိဟ်လုပ်တိတ် (လူဝၚ်မှုကြီးကြပ်ရေးနှၚ့် ပြည်သူ႔အၚ်အားဝန်ကြီးဌာန) ဂှ် “ဟီုမန်တှေ် ချူကဵုမန်၊ ဟီုဗၟာတှေ် ချူကဵုဗၟာရ။ အရာဇကုဒးစိုတ်ဂှ် အခေါၚ်ရုဲစှ် ဟီုဂး ဗၠးၜးနွံရ” သာ်ဝွံ ဟီုရ။
ဥူခေန်ယဳဝွံ အဃောဆဵုဂဗကဵု မဳဒဳယာကောန်ဍုၚ်အရၚ် အပ္ဍဲဂိတုဂျာန္နဝါရဳတုဲကၠုၚ် ပ္ဍဲၝောံဗဒမ်ပေဲါကောံဓရီု ဌာနဝန်ဇၞော်ဇြဟတ်ညးဍုၚ်ကွာန်ကဵု ပရေၚ်ကောပ်ကာဲမၞိဟ်လုပ်တိတ် မၞုံပ္ဍဲဍုၚ်နေပျဳဒဝ်ဂှ် ဟီုဂးဏာလဝ် သာ်ဝွံ မဒှ်ရ။
“ဆေၚ်စပ်ကဵု ကံက်စရၚ်ကၟိန်သ္ၚိတုဲ မုလေဝ်ဟွံတီရ။ ဗီုညးတၞဟ်စုတ်ဂှ် စုတ်ဗက်ကီုရ။ လၟိဟ်ဂကူမန်အောန်မ္ဂး သွက်ဂကူမန်တံ အခေါၚ်အရာ အောန်အာဏောၚ်ဟီုဂှ် လၟုဟ်မှ ဂွံတီရ” သာ်ဝွံ နာဲမူ ကောန်ကွာန်ပ္ၚ၊ ပွိုၚ်ဍုၚ်ဇြပ်ဗုဂှ် ဟီုရ။
ပရောပရာစရၚ်ကၟိန်သ္ၚိ ကေုာံ လၟိဟ်မၞိဟ်အလုံကၟိန်ဍုၚ်ဂှ်ဝွံ စနူဂိတုမာတ် (၃၀) စဵုကဵု ဂိတုအေဗရဴ (၁၀) ဂှ် ကံက်အာစရၚ်လၟိဟ်မၞိဟ် တန်တဴမၞုံဒၟံၚ် ပ္ဍဲပယျဵုဒၞက်တိဍာ် ကၟိန်ဍုၚ်ဗၟာရောၚ် မဒှ်ရ။
ကာလကံက်စရၚ်ဂှ်ဝွံ သွက်ဂွံသၟာန်ဇၟာပ်မၞိဟ်ဂှ် တၚ်နၚ်သၟာန် (၂၀) တၚ်၊ သွက်ဂွံသၟာန် ဇၟာပ်သၟတ်ဗြဴကေၚ်စှေ်လဝ်အိန်ထံၚ်တံဂှ် (၄) တၚ်၊ သၟာန်ဆေၚ်စပ်ကဵု ပရောပရာသ္ၚိဂှ် (၈) တၚ်၊ ညးစိုပ်မံၚ်ဍုၚ်သၟာၚ် မၞုံပ္ဍဲစရၚ်ကၟိန်သ္ၚိဂှ် (၅) တၚ်၊ ပရောပရာညးမစုတိ အပ္ဍဲစရၚ်ကၟိန်သ္ၚိ လောန်ကၠုၚ်အပ္ဍဲ ပွိုၚ် (၁၂) ဂိတုဂှ် (၄) တၚ် မဒှ်တုဲ အပံၚ်သီုဖအိုတ် သၟာန် (၄၁) တၚ် သၟာန်သၟုက်အာရောၚ် မဒှ်ရ။
0 Comments