မာံပိုန် – စပ္တံနူစၟတ်တ္ၚဲ ၂ ဒဵုကဵုစိုပ် ၄၊ ဂိတုဖေဖဝ်ဝါရဳ ၂၀၁၄ ဂှ် ဂကောံသၟတ်မန်လညာတ်တၟိ (MYPO) တအ် ကၠောန်ဗဒှ်ဏာ ကောံဓရီုဇၞော် ပွိုၚ် (၃) တ္ၚဲ ပ္ဍဲဘာတိုက်လိက်တၟံကၞေၚ် လ္တူဍုၚ်မတ်မလီုဂှ်တုဲ ဒုၚ်သ္ဇိုၚ်ကဵုဓဝ်ၜိုဟ်လလမ်၊ တၚ်ဒတူလိုၚ် ကဏ္ဍပရေၚ်ဍုၚ်ကွာန် ကေုာံ ဇြဟတ်ညဳသာသၟတ်တအ်တုဲ ပ္တိတ်လိက်လလောၚ်တြးမွဲတၞးရ။
လညာတ်ဂမြၚ် ဂကောံသၟတ်မန်လညာတ်တၟိဝွံ ညံၚ်သ္ဂောံကလိဂွံဓဝ်ၜိုဟ်လလမ် ကေုာံ အခေါၚ်တုပ်သၟဟ် မၞုံကဵုဗဗွဲဓဝ် ဗွဲမသၠးပွးတုဲ သွက်ဂွံလွဳၜံၚ်ပ္တိုန် က္ဍိုပ်သ္ကိုပ်အနာဂတ်၊ သ္ဂောံဒက်ပခိုၚ်အာ ဇြဟတ်ဂကောံ ညးဍုၚ်ကွာန်၊ သ္ဂောံဒက်ပ္တန်ဓဝ်ညဳသာ အကြာသၟတ်၊ သ္ဂောံမၚ်မွဲထိၚ်ဒဝ်အာ လိက်ပတ်အခိုက်ကၞာယေန်သၞာၚ်မန်၊ သ္ဂောံချဳဒရာၚ် လုပ်အာပေဲါဗ္တိုက် သွက်ဂကူဂွံဗၠးၜး ကေုာံ ဒဳမဝ်ကရေဇြဳရောၚ် ဓမံက်ထ္ၜးလဝ် တၚ်ရန်တၟံဂကောံ ပ္ဍဲလိက်လလောၚ်တြးဂှ်ရ။
“အဓိကပ္တိတ်ဏာလိက်လလောၚ်တြးဂှ် ဂကောံသၟတ်မန်လညာတ်တၟိ မုကမၠောန်မွဲ ချဳဒရာၚ်ကၠောန်မံၚ်ရောဂှ် ဂွံတီကၠးအာညးသ္ကအ်တုဲ အနာဂတ်ဂတဏအ် အကြာပိုဲကဵုပိုဲ ကမၠောန်တုပ်နွံမ္ဂး ညံၚ်ဂွံဒှ်ပံၚ်ကၠောန် ဓမံက်အာရုပ်ရဴ မွဲစွံရ” သာ်ဝွံ ဒု- ဥက္ကဋ္ဌ (MYPO) မိမြမောဝ် ဟီုကဵုသၞံၚ်တိုၚ်ရ။ လညာတ်ဂမြၚ်ဂကောံ ကေုာံ တၚ်ရန်တၟံဂကောံဂမၠိုၚ် ညံၚ်သ္ဂောံစိုပ်တရဴမာန်ဂှ် နကဵုဂကောံသၟတ်မန်လညာတ်တၟိ ပံၚ်ဗစပ်ကဵုဂကောံသၟတ်ပွိုၚ်ဍုၚ်၊ ဂကောံသၟတ်ကောန်ဍုၚ်အရၚ် ကေုာံ ဂကောံမှာဇန်ညးဍုၚ်ကွာန်မန်နာနာတုဲ ဓမံက်ရုပ်ရဴ ပံၚ်တောဲချဳဒရာၚ်အာရောၚ်ဂှ်လေဝ် ချူဓမံက်လဝ်ရ။
ကၟိန်ဍုၚ်ဗၟာအခိၚ်တ္ၚဲဏံဂှ် အကာဲအရာပြံၚ်သၠာဲနွံကၠုၚ်ညိညကီုလေဝ် အယာံမာတ်လ္တူဍုၚ်ဇၞော်တအ်ဟေၚ် ဂွံဒုၚ်စသိုၚ် ဖဵုဂုဏ်ပြံၚ်သၠာဲဂှ်တုဲ ပရေၚ်သၟတ်မန် အကြာရးတအ် ဒးဇီုကပိုက်မံၚ်ကဵု ဂဥုဲၜူမာဲမွဲဂှ် ဟွံပြံၚ်သၠာဲမွဲသာ်ဏီရောၚ် ဒု-ဥက္ကဋ္ဌ ဂကောံသၟတ်မန်လညာတ်တၟိဂှ် ဆက်ဟီုကဵုသၞံၚ်တိုၚ်ရ။
“အဓိက သၟတ်ပ္ဍဲရးတအ် ဒးဒုၚ်ဇီုကပိုက်မံၚ်မွဲ ဂၠိုၚ်အိုတ်ဂှ် စပ်ကဵုပရေၚ်ဂဥုဲၜူမာဲတုဲ ကိစ္စဏအ်ဂှ် ဒှ်တၚ်ကော်ဆဴ ဇၞော်အိုတ် ပ္ဍဲကဵုဂကူပိုဲရ၊ ဂကောံဗွဲမဂၠိုၚ်တအ်ပၠန်လေဝ် ပရောမွဲမွဲ ဒှ် Hot Issue မှ လုပ်ချဳဒရာၚ် လုပ်ကၠောန်ညးသ္ကအ်တုဲ မုညးဍုၚ်ကွာန်တအ် နွံပၟိက်မံၚ်ဇေတ်တ်ဂှ် ကၠးကၠးမးမး ဓမံက်ထ္ၜးလဝ် ဟွံမွဲရ” သာ်ဝွံ ဂးရ။
နူကောံဓရီုဇၞော်ဂှ် လးဖျေံလဝ် ပရေၚ်ကမၠောန်ဋ္ဌာန်ဂတနွံတုဲ သွက်ဂွံချဳဒရာၚ် ဆက်ဓမံက်အာရုပ်ရဴ ကမၠောန်ဂကောံတအ်ဂှ်မာန် နဒဒှ် ဥက္ကဋ္ဌဂှ် မိသာယာ၊ ဒု ဥက္ကဋ္ဌ မိမြမောဝ်၊ ညးအုပ်ကာ မိသိုက္ခမာ ကေုာံ ဖက်ဆောညးအုပ်ကာ န္ၚဲာန်တအ် ဂွံဒုၚ်ရုဲစှ်ပ္တိုန် ညးတာလျိုၚ်က္ဍိုက်ပ်ဂကောံတၟိ နကဵုမာဲဒမၠုက်အိုတ်ရ။
ဂကောံသၟတ်မန်လညာတ်တၟိဝွံ ဂိတုနဝ်ဝေမ်ဗာ ၂၀၁၄ တေံမ္ဂး အာယုက်ဒက်ပ္တန်ဂကောံ ပေၚ် ၁၄ သၞာံကီုလေဝ် စပ္တံနူသၞာံ ၂၀၀၇ ဂှ် ၜါသၞာံမွဲဝါ ကၠောန်ဗဒှ်ကၠုၚ်ကောံဓရီုဇၞော် ပြံၚ်သၠာဲရုဲစှ်ပ္တိုန် ညးတာလျိုၚ်ဂကောံတၟိ ဗွဲလၟေၚ်ၚ်နွံတုဲ အလန်ဏအ်မ္ဂး ဒှ်ကောံဓရီုဇၞော် မရနူက်ကဵုစတုတ္ထ မဒှ်ရ။
