ဂကောံမဟာဇန်နာနာတံ က္ဍိုက်က္ဍိုပ်တုဲ ပ္ဍဲဂိတုသေတ်တေမ်ဗာ ၁၂ ဂှ် ကၠောန်သ္ပပေဲါသဳကၠဳပရေၚ်ပညာ အလန်ပထမ ပ္ဍဲပွိုၚ်ဍုၚ်ရေဝ် တုဲဒှ်အာ ဗွဲအံၚ်ဇၞးရောၚ်ဂှ် ညးအုပ်ကာကမ္ပတဳကၠောန်ဗဒှ် ဥုအံၚ်နာၚ်ဝေန် ဟီုရ။

“ဗီုဂကောံမဟာဇန်တံ ပါ်ပဲါဂှ် သၞာဲဒဴပရေၚ်ပညာတံ တီကၠိုဟ်အာဏောၚ်၊ သၞာဲဒဴပရေၚ်ပညာတံ ဗီုဒှ်အခက်အခုဲဂှ်လေဝ် မိမကွးဘာတံ တီကၠိုဟ်အာဏောၚ်၊ ဗီုမိမကွးဘာတံ ဒးဒုၚ်စသိုၚ်ဂှ်လေဝ် ဂကောံမဟာဇန်နာနာတံကဵု သၞာဲဒဴပရေၚ်ပညာတံ ကၠိုဟ်အာဏောၚ်၊ ဣဏံဂှ် ပိုယ်ဂွံလဝ်ဂလာန် ပ္ဍဲဝိုၚ်ကောံဓရီုဂှ်ရ”သာ်ဝွံ နာဲအံၚ်နာၚ်ဝေန် ဟီုရ။

ဟိုတ်နူပေဲါသဳကၠဳအလန်ပထမ မဒှ်တုဲ ဒဵုကဵုကဆံၚ်ဒက်ကမ္မတဳမွဲဂှ် ဟွံစိုပ်ဏီလေဝ် ဟိုတ်နူညးမွဲကဵုမွဲ ပရေၚ်ဆက်စၠောံ၊ သဳကၠဳ၊ ကဆံၚ်ကဵုကသပ်တံ နွံကၠုၚ်မာန်ဂှ်ရ ၜိုတ်ထေက်ကြိုက် အံၚ်ဇၞးမံၚ်ယျရောၚ် ညးသ္ၚဳဂၠိပ်ဏာရ။

“ကဆံၚ် ဂွံသဳကၠဳကဵု ရုၚ်ပရေၚ်ပညာမာန်ဂှ် ဂွံကၠုၚ်ယျ၊ ဟိုတ်နူဂွံဆက်ဆောံကဵု ဂအုပ်ဘာ၊ သၞာဲဒဴပရေၚ်ပညာတံဂှ်ရ ဂွံပ္တိုန်ထ္ၜး၊ ကဵုကသပ်၊ ပါ်ပဲါမာန်ရ။ တုဲတှေ် အ္စာဘာတံဂှ်လေဝ် ဗီုညးတံခက်ခုဲဂှ် ဍေံလဴထ္ၜးကဵုမာန်ဏောၚ်” သာ်ဝွံ ညးဆက်ဟီုရ။

ဖံၚ်ဒေယှေန်ပရေၚ်ပညာမာရဒေဝဳ၊ ဂကောံရေၚ်တၠုၚ်ဖဵုမၞိဟ် ဍုၚ်ရေဝ်ကဵု ဂကောံပရိုၚ်Ye Taw Win တံ အာက္ဍိုပ်တုဲ ပေဲါသဳကၠဳဂှ် ကၠောန်သ္ပပ္ဍဲဍုၚ်ရေဝ် ဘာတန်သၠုၚ်စၟတ် (၁)၊ ပ္ဍဲၝောံခန်ပညာရတနာဂှ်တုဲ ဂအုပ်ပရေၚ်ပညာဍုၚ်ရေဝ်ကဵု သၞာဲဒဴပရေၚ်ပညာဂမၠိုၚ်၊ ညးတာလျိုၚ်ဌာန နာနာဂမၠိုၚ်၊ ညးရေၚ်တၠုၚ်ဖဵုဘာဂမၠိုၚ်ကဵု မိမကွးဘာတံ သီုဖအိုတ် ၜိုတ် ၁၀၀ တၠပြၚ်ၚ် တိုန်စိုပ်တုဲ သဳကၠဳဏာ ကဏ္ဍပရေၚ်ဗ္တောန်လိက်၊ ကဏ္ဍပရေၚ်ပံၚ်ကောံမိမအာစာကဵု ကဏ္ဍပရေၚ်ကွးဘာတံရ။

ဂအုပ်ပရေၚ်ပညာပွိုၚ်ဍုၚ် ဒဝ်မဵုမဵုဨ ဂှ်လေဝ် သွက်ဂွံသၠုၚ်ပတိုန် စရာဲပရေၚ်ပညာကဵု စရၚ်အံၚ် ဂွံသၠုၚ်တိုန်ဂှ် ပ္ဍဲဂိတုအံက်တဝ်ဗာမ္ဂး ကၠောန်သ္ပပေဲါသဳကၠဳ ဆေၚ်စပ်ကဵု ဘာသာဗ္တောန်လိက် ပွိုၚ် ၃ တ္ၚဲတုဲ ကေတ်အာလညာတ်ညာဏ် ပ္ဍဲဘာကီု မ္ၚးဘာကီုတုဲ အစဳအဇန် ဒးကၠောန်အာကဆံၚ်ကဆံၚ်တံဂှ်လေဝ် ၜိုတ်အစောန်နွံ ကၠောန်သ္ပအာရောၚ်ဂှ် ဟီုလဝ်ပ္ဍဲပေဲါသဳကၠဳဂှ်ရ။

“ဗီုပြၚ်စၟဳစၟတ်သ္ၚိကၟိန်ဂှ် စၟဳစၟတ်အာ ဘာလဵုဂှ် လေပ်လိက်အောန်ရော၊ ပ္ဍဲကဵု ၈ တန် ၉ တန်၊ ၁၀ တန်ဂှ်လေဝ် ဘာသာလဵု ဍိုန်လျဂှ် ဗက်စၟဳစၟတ်တုဲ ရီုဗၚ်အာဏောၚ်၊ ပရေၚ်ပါ်ပဲါ ကွးညးကွးအဲ ညံၚ်ဟွံဂွံနွံဂှ်လေဝ် စၟဳစၟတ်အာ နကဵုသၞောတ် Code ဏောၚ်” သာ်ဝွံ ညးဆက်ဟီုရ။

တၚ်သွဟ်ဂွံနူပ္ဍဲပေဲါသဳကၠဳဂှ် ပတိတ်လိက်လလောၚ်တြးမွဲတၞးတုဲ ပတိုန်ထ္ၜးဏာ ကဆံၚ်မဆေၚ်စပ်တံဂှ်တုဲ ပံၚ်တောဲဓမံက်အာရုပ်ရဴရ။ ကၠာဟွံဂွံကၠောန်သ္ပ ပေဲါသၟာန်သွဟ်လိက် (၁၀) တန်ဏီ ပ္ဍဲပွဳပွူဂိတုဒဳဇြေမ်ဗာဂှ်မ္ဂး ဆက်ကၠောန်အာ ပေဲါသဳကၠဳပရေၚ်ပညာ ဗီုဏံပၠန်ရောၚ်ဂှ် ဂွံလဝ် တၚ်တုပ်စိုတ်ကဵု ဂအုပ်ပရေၚ်ပညာပွိုၚ်ဍုၚ် ဗွဲပလး (အလွတ်သဘော) တုဲယျရောၚ်ဂှ်လေဝ် နာဲအံၚ်နာၚ်ဝေန် ဟီုရ။

အလုံမွဲကၟိန်ဍုၚ်ဗၟာဝွံ တွဵုရးဍုၚ်မန်ဂှ် ကလိဂွံစရၚ်အံၚ် ကွးဘာ (၁၀) တန် ခိုဟ်အိုတ် ပွိုၚ် (၅) သၞာံ ဆက်က်ကီုလေဝ် ပွိုၚ်ဍုၚ်ရေဝ်ဝွံ ပ္ဍဲအလုံမွဲတွဵုရးမ္ဂး နွံမံၚ်ကဆံၚ် အကြာ ရ ကဵု ၉ ရ။ ပ္ဍဲကဵုသၞာံဗ္တောန်ပညာ ၂၀၁၃ -၂၀၁၄ ဂှ်မ္ဂး အပ္ဍဲ (၁၀) ပွိုၚ်ဍုၚ် တွဵုရးဂှ် ဒှ်အာပရေၚ်အံၚ်ဇၞး သဝ်အိုတ်ရ။ ဟိုတ်သာ်ဝွံတုဲ မဒးကၠောန်ဗဒှ် ပေဲါသဳကၠဳပရေၚ်ပညာဏံကီုရ။

ပွိုၚ်ဍုၚ်ရေဝ်ဂှ် နွံဒၟံၚ်ပ္ဍဲဒိုဟ်သၠုၚ်ကျာဍုၚ်မန်တုဲ ပရေၚ်ကမၠောန်ကၠောန်ကၠအ်၊ ကၠောန်ကမၠောန်ဍာ်တံ ဒှ်သ္ဇိုၚ်ပရေၚ်ပိုန်ဒြပ်ခိုဟ်မွဲကီုလေဝ် ဟိုတ်နူဒှ်ဒၟံၚ်ပွိုၚ်ဍုၚ် ဂကောံပၠန်ဂတးရပ်လွဟ်တံ ဂေတ်အာကၠုၚ်ဂှ် တုဲ သဇိုၚ်ပရေၚ်ပညာ ဇြဟတ်ဍိုန်လျကီု၊ သၞာဲဒဴပရေၚ်ပညာ ညးဒေသတံ အောန်ကီုဂှ်ရ ဒှ်ဟိုတ် စရာဲပရေၚ်ပညာ ဍိုန်လျမွဲတၚ်ကီုရောၚ်ဂှ် ညးရေၚ်တၠုၚ်ဖဵု ပရေၚ်ပညာဂမၠိုၚ်တံ သ္ၚဳဂၠိပ်လဝ်ရ။

ပ္ဍဲပွိုၚ်ဍုၚ်ရေဝ်ဂှ် ဘာတန်မူလ၊ ဘာတန်လဒေါဝ်၊ ဘာတန်သၠုၚ် အပံၚ်သီုဖအိုတ် မနွံ ၁၄၄ ဘာတုဲ သၞာဲဒဴပရေၚ်ပညာ ၜိုတ် ၂၅၀၀ တၠပြၚ် နွံရောၚ် ဂွံတီကေတ်ရ။