ပ္ဍဲဒေသဝါဗ္ၚ လ္ပာ်ကွာန်ဘာဒေါဝ် ပွိုၚ်တိုက်ကၠအ်သတ် ပွိုၚ်ဍုၚ်မုဟ်ဍုၚ်ဂှ် စၟသြောံတၟိ မံက်ကၠုၚ်မွဲဂကူပၠန် တုဲ ဝါဗ္ၚမွဲဒမြိပ် ပ္ဍဲပွိုၚ်တိုက်ကၠအ်သတ်ဂှ် သြောံဒးစၟတုဲ ကှ်အေဲအာကြပ်ကဵုလ္ၚီဨကဒှ်ရောၚ် ရဲဒေသတအ် ဟီုထ္ၜးရ။
အတိုၚ်တၠဝါဗ္ၚ ရဲကွာန်ဘာဒေါဝ် ဝါဒေသဗၚ်ဂဒူမွဲတၠ ဟီုထ္ၜးမ္ဂး ‘စၟသြောံလၟုဟ်ဏံဂှ် မွဲအာယုက် အဲ ကၠောန်ဗ္ၚဏံ မွဲလှေ်လေဝ် ဟွံကေၚ်ဆဵုဏီပုဟ်၊ ဗီုပြၚ်စၟဂှ်တှေ် ညံၚ်ကဵုစၟရဝ်ဗါ ပိုဲကော် အရံၚ်ဍေံဗစံက် ဗစံက်၊ ဇကုဍေံ ဇလမံၚ်၊ တ္ၚဲပၠိုတ်တိုန်တှေ် ၜါၜါမွဲတောဲ ဍေံပဝ်အာ ညံၚ်ရဴသာဲတုဲ ဒၞာဲဍေံဍုန်ဂှ် သြောံ တအ်ဂှ် ကှ်အေဲအာအိုတ်ရောၚ်’ သာ်ဏံ တၠညးပိုၚ်ပြဳလဝ်ဝါဗ္ၚ(၃၇)ဨက နာဲဝေန်ခိုၚ် ဟီုထ္ၜးရ။
ဆက်တုဲ ‘လၟုဟ်ဝါအဲဂှ် နွံမံၚ်(၃၇)ဨက၊ ဒးအာစၟ ၜိုတ်(၃၀)ဨကပြၚ်ၚ်ယျရောၚ်၊ သြောံပ္ဍဲခံက်ဂှ် ယဝ်ရကြံၚ်ညိတှေ် သာညိ၊ ယဝ်ရသြောံၜတ်မံၚ်တှေ် ကှ်အေဲဗုအာအိုတ်တး၊ သုၚ်လဝ်ၜံက်တှေ် အာကရပ်ဂှ်ဟွံဂွံပုဟ် ဖေက်ဝါဇကုတူအာ၊ ၜိုတ်မံက်မံၚ်လ္တူဍာ်ဂှ် ကှ်အေဲဗုအာအိုတ်တး၊ အဲခယျ ကေတ်တှေ် မွဲဒမြိပ်ဂှ်တှေ် ၜိုတ်(၆/၇)ကၠံဨက ပြၚ်ဒှ်ရောၚ်’ သာ်ဏံ တၠဝါ နာဲဝေန်ခိုၚ်ဂှ် ဆက်ဟီုထ္ၜးရ။
ဝါဗ္ၚလ္ၚဵုဂှ် ဒးဂွံစၟ မွဲလစုတ်တုဲဂှ် ညးဂစတ်ဂွံဂဥုဲစၟ ဗွဲမဂတာပ်အခိၚ်တုဲ ဝါဗ္ၚလ္ၚဵု သြောံကလေၚ်တိုန်နွံ၊ ဝါလ္ၚဵုဂှ် ဟွံဂစတ်သုၚ်စောဲကီု ဂစတ်ဂဥုဲလဇုဲညိမ္ဂး တၞံသြောံတအ်ဂှ် ကှ်အေဲအာအိုတ်ရ၊ ဒေသဝါမွဲဒမြိပ် ဒးစၟတအ်ဂှ် ပလိုတ်ဝါ ဍုၚ်ကၟာဝက်ဂှ်ကီု၊ ဝါဗ္ၚ ပလိုတ်မွဲဒမြိပ်ပွိုၚ်တိုက်ကၠအ်သတ်၊ ဝါကွာန်ဘာဒေါဝ် ကွာန်ထုၚ်မၚ် ညးကော် ဝါဗၚ်ဂဒူဂှ်ကီု၊ ဂတှေ်နက်ပြေၚ်ဂှ်ကီု ဒးစၟဂၠိုၚ် သ္ဂးရ။
စၟသြောံတအ်ဂှ် တၞံသြောံၜိုတ်(၃)ကၟဵုမ္ဂး စၟတအ်ၜိုတ်မွဲဗူ(မွဲစေဝ်နိုအ်)နွံတုဲ တ္ၚဲပၠိုတ်တ္ၚဲဂၠုတိုန်မ္ဂး စၟတအ်ဂှ် ပဝ်ပြံၚ်အာဒၟံၚ် မွဲဒၞာဲကဵုမွဲဒၞာဲ၊ မွဲဒေသကဵု မွဲဒေသရ၊ ဟိုတ်ဂှ်တုဲ သြောံတအ်ဂှ် ဒးလဝ်စၟတုဲ ကှ်အေဲဒၟံၚ် အ တေံမွဲဂတှေ် အဏံမွဲဂတှေ်ရ။
စပ်ကဵုပရေၚ်သြောံ ဒးအာစၟတအ်ဂှ် ညးတာလျိုၚ်ဌာနလဵုလေဝ် ကဵုကၠုၚ်အရီုအဗၚ်ဟွံမွဲတုဲ နဲကဲညးကဵုညး ဂစတ်ဒၟံၚ်ဂဥုဲနွံရ။
ညးတၠဝါဗ္ၚသ္ကုတ်ကၟာဝက်မွဲတၠဂှ် ‘စၟဂကူဏံဂှ် ကၠာတေံလေဝ် ကေၚ်ဒးမံၚ်ရရောၚ်၊ ညးကော်စ စၟဂြၚ် လေဝ် သာ်ဍေံဂှ် ဗစံက်ဗစံက် ဍေံနွံသီုဂြၚ်၊ ဍေံစတၞးသြောံရ၊ ဒးစၟဂှ်တှေ် ကှ်ဗုအာဗီုကဵုဆံက်ရ၊ ဆဂး လ္ပာ်ဝါကၟာဝက်ပိုဲဂှ် ဟွံမိၚ်ဏီပုဟ်’ သာ်ဏံ နာဲဗြာန် ဟီုထ္ၜးရ။
ဝါဗ္ၚလ္ပာ်သ္ကုတ်ကၟာဝက်ကီု သ္ကုတ်ဝါဗ္ၚကွာန်ဖါအံက်ဂှ်ကီု ဂိတုတုဲကၠုၚ်ဂှ် သြောံပ္ဍ္ဍဲခံက်တအ် ကၞုဂမၠိုၚ် ကိတ်စသြောံတုဲ ဝါဗ္ၚတဵုလဝ်သြောံလၟိဟ်ကဵုကၠံဨက တၞံသြောံတအ် လီုလာ်အာလဝ်နွံရောၚ် ဂွံတီကေတ် ရ။
0 Comments