အပ္ဍဲဍုၚ်ဗၟာ သွက်သၟာကမၠောန်ဆုဲပြံၚ်တံဂးတုဲ ဒက်ပ္တန်ရေၚ်တၠုၚ်မံၚ် ဌာနတမ်ရိုဟ် ဗက်ပရိုၚ် (၅) ဌာနရောၚ်ဂှ် နူကဵု IOM ပတိတ်လဝ် လိက် လလောၚ်တြးရ။
“သွက်မၞိဟ်အာကၠောန်ကမၠောန်ဍုၚ်မ္ၚးဂှ်တှေ် ဟွံပစုက်ကဵုပုဟ်၊ မၞိဟ်အာတံဂှ်လေဝ် ဗီုဍေံကဵုဍေံ ချိက်လဝ်တုဲတုဲရ၊ ရုၚ်ပိုဲဂှ် ဒှ်ကၠုၚ် အခက်အခုဲဏောၚ်ဂးတှေ် ကၠုၚ်စိုပ်ရုၚ်မ္ဂး နူဌာနဂှ် ကဵုအရီုဗၚ် ရေၚ်တၠုၚ်ကဵုဏောၚ်” သာ်ဝွံ သၞာဲဒါ နူရုၚ် ဂၠာဲပကောံပကေဝ် သၟာကမၠောန် မွဲတၠ ဟီုလဴဏာကီုရ။
ဍုၚ်သေံ၊ ဍုၚ်မလေဝ်ယှာ၊ ဍုၚ်ကိုဝ်ရဳယာတံဟေၚ်ရ နူဌာနဝန်ဇၞော်သၟာကမၠောန်ဂှ် ဗလးစွံ အမာတ်ကလုတ်မာန်တုဲ၊ ဍုၚ်သှေ်သၟေဟ်မံၚ် တၞဟ်ဟ်တံဝွံဂှ် ဟွံမွဲဏီပုဟ် သာ်ဏံ သၞာဲဒဴဂှ် ဟီုရ။
သၟာကမၠောန်နူဍုၚ်ဗၟာ ပြံၚ်လုပ်မၞုံမံၚ် ပ္ဍဲဍုၚ်သေံတေံဂှ် (၂.၃) ပြကာတိကိုဋ်မဒှ်တုဲ၊ ဍုၚ်မလေဝ်ယှာဂှ် လၟိဟ်ၜိုတ် (၁) ကိုဋ် မၞုံရောၚ် ချိၚ်ချကေတ်ရ၊ ဗွဲမဂၠိုၚ်ဂှ် ဟိုတ်နူ အာကၠုၚ် နနဲဟွံလုပ်သၞောဝ်တုဲ၊ စပ်ကဵု ဒးဒုၚ်ကူသာန် သွံရာန်စဂှ်ကီု၊ စကာကောန်ၚာ် အဝဲဟွံစပ်နဲ အဓမ္မတံကီု၊ ဒးဒုၚ်ရေက်ကူသာန်သွံရာန် စအိုတ်တုဲ၊ အပ္ဍဲစရၚ်ဍုၚ်သေံ ထမံက်ထ္ၜးလဝ်ဂှ် (၅၀)% ဂှ် မဒှ်ကောန်ဍုၚ်ဗၟာရောၚ်၊ ပ္ဍဲလိက် သကေမ်တဲ IOM ထမံက်ထ္ၜးလဝ်ရ။
ရုၚ် MRC ဂှ်ဝွံ ပ္ဍဲတွဵုရးမန်၊ ဍုၚ်မတ်မလီုတေံကီု၊ တုပ်ဗၟာသာ်ဂှ် တွဵုရးကရေၚ်၊ ရးဒေသဇၞော်မဂွေ၊ ဍုၚ်လ္ဂုၚ်ဂှ်လေဝ် ပံက်လဝ်ကီုရောၚ် ဂွံတီကေတ်ရ။
“ ဟိုတ်နူရုၚ် MRC ဏံနွံတုဲ၊ ကိစ္စသွက်သ္ဒးအာတ်အရီုဗၚ်မွဲမွဲသာ် ဒှ်ကၠုၚ်ရောၚ်ဟီုမ္ဂး စၞးသ္ဒးအာတ်အရီုဗၚ် နူဗၠာဲသၟိၚ်တံဂှ် အာတ်အရီုဗၚ်နူညး တံလေဝ်ဂွံရ၊ သၟာကမၠောန် ဆုဲပြံၚ်တံဂှ် ယဝ်ခါရ ဒှ်ကၠုၚ်အခက်အခုဲ ဒှ်ကၠုၚ်ပြသၞာဏောၚ်ဟီုတှေ် MRC ဂှ် ဗိုၚ်ပသောၚ် ကဵုဏောၚ်၊ ကာလဒးသောၚ် ဒၞာဲလ္ၚဵု ဟွံဗၠးကဵုသၞောဝ် နွံကၠုၚ်ဂှ်တှေ် ဆက်သၠောဲနၚ်ကဵုပိုဲရ၊ လ္ပာ်ညးတံ ပြသၞာဇဳသာ်လုပ်ကၠုၚ်ဏောၚ်ဟီုတှေ် ဂွံပရိုၚ်ဂၠိုၚ်ရ၊ သွက်ပိုဲဂှ် ရုၚ်ကဵုအရီုဗၚ်သၟာကမၠောန် ဆုဲပြံၚ် MRC မံက်ကၠုၚ်ဂှ် ဒှ်ဖဵုတၟာဟလိုၚ်ရ” သာ်ဝွံ သ္ကိုပ်ဗၠာဲသၟိၚ် ဂကောံ ဖ္တိုက်ဖၟောဝ်စဵုဒၞာပရေၚ်ကူသာန်သွံရာန်မၞိဟ် အေတုၚ် ဟီုလဴဏာကီုရ။
ယဝ်ခါရ အာဍုၚ်မ္ၚး နဒဒှ်လုပ်သၞောဝ် လိက်ကသုက်ရောၚ်ဟီုမ္ဂး၊ နူဒၞာဲဍုၚ် ဇကုအာစိုပ်တံဂှ် အခေါၚ်ဒုၚ်စသိုၚ် အတိုၚ်ဖျေံလဝ်သ္ကုတ်သွာတ် ဂွံဒုၚ်ဂိုၚ်ကေတ်တုဲ၊ အာနဒဒှ် ဟွံလုပ်သၞောဝ်မ္ဂး၊ ပွမသ္ဒးဒုၚ်ရပ်ကီု၊ ဆဵုဂ္ဗအာကဵု မၞိဟ်ကူသာန်သွံရာန်မၞိဟ်တုဲ သ္ဒးဒုၚ်သွံစတံ ဒှ်မာန်ရောၚ်၊ သ္ကိုပ်ဗၠာဲသၟိၚ် အေတုၚ် ဂးရ။
ဝန်ဇၞော် တွဵုရးဍုၚ်မန် ဥူအုၚ်မျေတ်၊ သၟာကမၠောန်၊ ဌာနဝန်ဇၞော်ဂဳုကၠဳပရေၚ်မၞိဟ်၊ ဒု-ဝန်ဇၞော်ကၟိန်ဍုၚ် ကေုာံ IOM ဂှ် Chief of Mission, Mr Kieran Gorman တံဂှ် အပ္ဍဲကဵု ဂိတုနဝ်ဝေန်ဗာ (၂၅) ဂှ် ပံက်ဏာလဝ်ရောၚ် ဂွံတီကေတ်ရ။
