သွက်ဂွံပကောံစရၚ်မၞိဟ်စုတ်မာဲဂှ် ဒုၚ်သ္ဇိုၚ်ကဵု စရၚ်ညးအုပ်ဓုပ်ကွာန်တံ ကံက်လဝ်တုဲ ပ္ဍဲဂိတုမတ်ချ် ၃ ဂှ်မ္ဂး စကံက်အာစရၚ်ရောၚ် ဒုသ္ကိုပ်စၞော်ပညုၚ် ကမ်မယှေန်ပေဲါရုဲမာဲ ဥူဟိၚ်လေန်ထာတ် ဟီုကဵုဌာန်ပရိုၚ်ဗၠးၜးမန် (IMNA) ရ။
“စရၚ်မၞိဟ်ဂှ် ဒှ် update မှ စုတ်စရၚ်မာဲဂွံ လစုတ်မာဲတေံပၠန်လေဝ် ပါ်လဝ်မၞိဟ်(၄) ဂကူ၊ ဆဂးလၟုဟ်ပြဟ်ဟ်ဏံဂှ် ပကောံအာ ပိဂကူကၠာဏောၚ်” သာ်ဏံ ဥူဟိၚ်လေန်ထာတ်ဟီုရ။
ဂကူပထမဂှ် မၞိဟ်မံၚ်ဒၟံၚ် ပ္ဍဲတွဵုရး စရၚ်ကၟိန်သ္ၚိနွံတုဲ အယုက် (၁၈) သၞာံဒးပေၚ်၊ တတိယဂှ် လိက်တၞးစၟတ်သမ္တီ ကောန်ဍုၚ်ပိသၠပ်နွံကီုလေဝ် စရၚ်လၟိဟ်မၞိဟ် ဒၞာဲလဵုလေဝ်ဟွံပါလုပ် ဆဂး အယုက် (၁၈) သၞာံပေၚ်တုဲ ဒးကိတ်ညဳကဵုသၞောဝ်ဥပဒေ၊ စတုတ္ထဂှ် စၟတ်သမ္တီကောန်ဍုၚ်ကဵု ကာတ်တၞဟ်ခြာဟၟဲ ဆဂးအယုက် (၁၈) သၞာံပေၚ်တုဲ ကိတ်ညဳကဵုသၞောဝ်ဥပဒေဂှ် ကဵုဖျုန်တုဲ ပကောံအာရောၚ်ဂှ် ညးဆက်ဟီုရ။
ဂကူဒုတိယဂှ် စရၚ်သၞာဲဒါ ညးဒးတာလျိုၚ် အပ္ဍဲတွဵုရးတၞဟ်ခြာတံဂှ် ဟွံကံက်နၚ်ဏီပုဟ် လလောၚ်တြးပေါဲရုဲစှ်မာဲတုဲမှ ကၠောန်အာစရၚ် တၞဟ်ခြာရောၚ် သာ်ဏံ ညးဆက်ဟီုရ။
လၟုဟ်ပြဟ်ဟ်ဏံ (လဝက ပုံစံ ၆၆/၆ ) ကဵု စရၚ်မၞိဟ်ဂှ် ညးအုပ်ကာနာနာတွဵုရးတံ ကလေၚ်စၟီစၟတ်မံၚ်ဖိုဟ်ဂှ် ဂွံတီကေတ်ရ။
ညးအုပ်ဓုပ်ကွာန် ပွိုၚ်ဍုၚ်မုဟ်ဍုၚ်တှေ် “ပ္ဍဲကဵုကွာန်ပိုဲဂှ်ဏံ သွက်ဂွံစုတ်မာဲဂှ် ကံက်စရၚ်ဗွဲအပြောံတုဲဒှ်အာယျ သှေ်မံၚ်သွက်ဂွံသ္ပဒတန်ရ” သာ်ဏံ ညးဟီုရ။
သွက်ဂွံကံက်စရၚ် ဆန္ဒမာဲဂှ် နူကဵုဂကောံ (IFES) တံ ထံက်ပၚ်ကဵု ကမ်ပျူတာ (၃၀) မတုဲ ပ္ဍဲဂိတုဖေဖဝ်ဝါရီ စၟတ်တ္ၚဲ၂၆ ဂှ် ဂကောံပါ်ကမ်မယှေန်ပေါဲရုဲမာဲ တွဵုရး (၂၀) တွဵုရးတံ ကဵုဘာတန်ဗ္တောန်ကဵု ဂကောံကမ်မယှေန် ၆၅ တၠတံတုဲ ပ္ဍဲဂိတုမတ်ချ် စၟတ်တ္ၚဲ ၃ ဂှ် ကံက်စုတ်အာစရၚ်ရောၚ်ဂှ် ဥူဟိၚ်လေန်ထာတ် ဟီုရ။
သွက်ဘာတန်ဗ္တောန်ဂှ် နူကဵုဂကောမ (IFES) တံ ကဵုလဝ်ကမ်ဗျူတာ ၃၀ မကၠာတုဲ အလန်လက္ကရဴမှ ထံက်ပၚ်အာကဵု ကမ်ဗျူတာ ၁၁၆ မ ပၠန်ရောၚ်ဂှ် ဂွံတီကေတ်ရ။
သွက်ဂွံပကောံစရၚ် ညးစုတ်မာဲအလုံမွဲဍုၚ်အလန်ပထမဂှ် ပ္ဍဲဂိတုနဝ်ဝေမ်ဗာ စဵုစိုပ်ဒီဇြမ်ဗာ သၞာံ ၂၀၁၄၊ အလန်ဒုတိယဂှ် ဂိတုဒဳဇြေမ်ဗာ သၞာံ ၂၀၁၄ စဵုစိုပ်ဂိတုဖေဖဝ်ဝါရဳ သၞာံ ၂၀၁၅၊ အလန်တတတိယဂှ် နူကဵုဂိတုဖေဖဝ်ဝါရဳ စဵုစိုပ်ဂိတုမတ်ချ် သၞာံ ၂၀၁၅ ကၠောန်ဗဒှ်လဝ်တုဲ အလန်စတုတ္ထဂှ် နူဂိတုဖေဖဝ်ဝါရီ စဵုစိုပ်ဧပြဳ ကၠောန်ဗဒှ်အာရောၚ်ဂှ် ကမ်မယှေန်ပေဲါရုဲမာဲတံ ရန်လဝ်ရ။
စရၚ်ညးကဵုမာဲပ္ဍဲတွဵုရးမန်ဂှ် စုတ် software စရၚ်ညးကဵုမာဲ (IFES) တုဲ ဂိုၚ်စွံလဝ်ပ္ဍဲ ဆာဗာ ကမ်မယှေန်ကၟိန်ဍုၚ် ပ္ဍဲနေပျဳတဝ်တေံရောၚ်ဂှ် ဂွံတီကေတ်ရ။
ပေါဲရုဲမာဲ သၞာံ ၂၀၁၅ ဝွံ ပ္ဍဲဂိတုအံက်တဝ်ဗာ သတ္တဟက္ကရဴအိုတ် ဟွံသေၚ်မ္ဂး ဂိတုနဝ်ဝေမ်ဗာ သတ္တဟပထမမ္ဂး ကၠာန်သ္ပအာရောၚ်ဂးတုဲ တ္ၚဲကၠောန်ပေါဲရုဲမာဲ ချိတ်တ်ပၠိုတ်တ်ဂှ် ပ္ဍဲဂိတုအဝ်ဂါတ်တေံမ္ဂး လလောၚ်တြးအာပၠန်ရောၚ်ဂှ် ကမ်မယှေန်ပေဲါရုဲမာဲကၟိုန်ဍုၚ်တံ လလောၚ်လဝ်နွံရ။
