ခတ္တာနန် – ရံၚ်ကေတ် အတိုၚ်စရၚ် တၠမာဲဆန္ဒ( ညးနွံကဵုအခေါၚ်ကဵုမာဲ) နူကမ္မယှေန်ပေါဲရုဲမာဲ က္လေၚ်လလောၚ် ပ္တိတ်လဝ် ပ္ဍဲသေပ်တေမ်ဗာ ၁၄ ဏံဂှ်မ္ဂး ပ္ဍဲကွာန်မန် ၃၄ ကွာန် နွံအကြာၜဳၜါ (ၜဳဇၟိကဵုၜဳဝၚ်ရော) ပွိုၚ်ဍုၚ်လှာဒကှ် တွဵုရးကရေၚ်ဂှ် ညးတံ ဟွံကၠုၚ် လလောၚ်ထ္ၜး စရၚ်ညးစုတ်မာဲတုဲ အခေါၚ်ဂွံကဵုမာဲဂှ် ဟွံမွဲရ သာ်ဝွံ ညး

ဇၞော်ကွာန်ဂမၠိုၚ် မၞုံပ္ဍဲဒေသတံ ဟီုမံၚ်အိုတ်ရ။

ဒၟါနူဂှ်ရ ပ္ဍဲသေပ်တေမ်ဗာ ၁၈ ဖါသဝ်တ္ၚဲဂှ် ညးဇၞော်ကွာန်ဂမၠိုၚ်တံ ပြာပ်အာ ရုၚ်ကမ္မယှေန် ပေါဲရုဲမာဲ ပွိုၚ်ဍုၚ်လှာဒကှ် ဂှ်တုဲ ညံၚ်ဂွံဂွံ အခေါၚ်ကဵုမာဲဂှ် အာတ်မိက်ပ္တိုန်လဝ် ဂွံတီရ။

နာဲဝေန်ယှိုဲ ကောန်ကွာန်ကံဒုန်ဗရေၚ် “ကာလအလန်ပထမတေံဂှ် စရၝေောံတံ ကၠုၚ်ပအပ်စရၚ်မာဲ ကဵုညးဇၞော်ကွာန်တံ။ ကၠုၚ်ဗာန်ပ္ဍဲကွာန်ပိုဲ ယၟုအဲလေဝ် ပါမံၚ်ကီုရ၊ ကၠုၚ်အလန်ဏံဂှ် ညးတံဟွံကၠုၚ်ဗာန် စရၚ်မာဲ ပ္ဍဲကွာန်ပိုဲရ။ ထ္ၜးဟိုတ် အကာဲအရာပရေၚ်ဂီုကၠီုတုဲ ဍေံတံ ပထောံဒေသ ဟွံမွဲကဵု အခေါၚ်ကဵုမာဲ ဂွံမိၚ်ကေတ်ဗီုဂှ်” ဂးရ။

ပ္ဍဲဒေသကွာန်ဒဵုထောၚ် ၃၄ ကွာန် မဆက်စပ်မံၚ်ကဵု ပွဳဗွိုၚ် ဌာန်ဂအုပ် ခရိုၚ်မတ်မလီု ဗော်ဍုၚ်မန်တၟိဂှ် လၟိဟ်သ္ၚိ နွံ ၅၅၀၀ ပြၚ်တုဲ လၟိဟ်မၞိဟ် နွံကဵုအခေါၚ်ကဵုမာဲဂှ် နွံၜိုတ် ၂ ဠက်ပြၚ် ဂွံတီရ။

“ပေါဲရုဲမာဲ သၞာံ၂၀၁၀ တေံဂှ်လေဝ် ပိုဲဟွံဂွံ အခေါၚ်ကဵုမာဲပုဟ်။ ဆ္ဂး အခိၚ်တေံ ညးလဵုလေဝ် စိုတ်ဟွံလုပ်စ၊ ဟွံစွံရုၚ်မာဲလေဝ် ကိစ္စဟွံမွဲ၊ ပေါဲရုဲမာဲ အခိၚ်တေံဂှ် ပေါဲအလီရ ပိုဲထေၚ်လဝ်ဗီုဂှ်၊ လၟုဟ် ဗီုဂှ်ဟွံသေၚ်ရ မၞိဟ်တံ စိုတ်လုပ်စကဵု ပေါဲရုဲမာဲအိုတ်ဣရ၊ ဍေံတံ ဟွံကၠုၚ်ဗာန် စရၚ်ရဲကဵုမာဲတှေ် ဆောံအာ အခေါၚ်ကောန်ဍုၚ်မွဲဏောၚ် ဒးဟီုစ” နာဲဝေန်ယှိုဲ ဂှ်ဂးရ။

လၟုဟ် ညးဇၞော်ကွာန်တံ ဗက်ပကောံပကေဝ်စရၚ် ညးနွံကဵု အခေါၚ်ကဵုမာဲ မရပ်လဝ် တၞးစၟတ်သမ္တီကောန်ဍုၚ် (မှတ်ပုံတၚ်) နူကဵုကွာန် ၁၀ ကွာန် က္လိဂွံလၟိဟ်မၞိဟ် ၃၀၂၂ တလတုဲ အာအာတ် အခေါၚ် ပ္တိုန်ထ္ၜးကဵု ရုၚ်ပါ် ကမ္မယှေန်ပေဲါရုဲမာဲ ပွိုၚ်ဍုၚ်ဂှ် ကီုလေဝ် နူကမ္မယှေန် ဟွံဒုၚ်တဲ ဂွံတီကေတ်ရ။

နာဲအံၚ်မေန် ကောန်ကွာန်ဒဵုထောၚ် “ အတုန်ကၠာတေံ ကၠုၚ်ဗာန် စရၚ်ညးကဵုမာဲ ပ္ဍဲကွာန်ပိုဲ၊ သီုညးဖၟိုတ်ဂှ် ဟွံပါ၊ ပါၜိုတ်ကဝက်ဓဝ်၊ ယၟုအဲလေဝ် ဟွံပါ၊ ယၟုဇကု ဟွံပါတှေ် ဒးပ္တိုန်စရၚ်ဏောၚ်ဂှ်လေဝ် ဟွံတီ၊ မၞိဟ် ဂွံကၠောန်ကဵုဂှ်လေဝ် ဟွံမွဲ၊ ဆ္ဂး စရၚ်အလန်ဒုတိယဏံ ဟွံဂွံကၠုၚ်ဗာန်ဏီဖိုဟ်၊ ပ္ဍဲပေါဲရုဲမာဲ သၞာံ ၂၀၁၀ တေံဂှ် ပ္ဍဲကွာန်ပိုဲ ရုၚ်မာဲနွံမံၚ် အဲလေဝ် ဂွံကဵုမာဲကီု” ဂးရ။

စပ်ကဵုကိစ္စ ဟွံမွဲကဵု ရုၚ်မာဲ၊ ဟွံမွဲကဵု စရၚ်တလမာဲ ဂှ်တုဲ ဆက်ပ္တိုန်ထ္ၜးကဵု ဂကောံကမ္မယှေန် အဆံၚ်ၚ်ဏောၚ်၊ ဣဂှ်လေဝ် ဟွံဂွံဏီတှေ် ဆက်ပ္တိုန်ထ္ၜး ဒဵုကဵု အဆံၚ်ကၟိန်ဍုၚ် တေံဏောၚ် နာဲအံၚ်မေန် ဂးရ။

“ ပိုဲလေဝ် ကောန်ဍုၚ်ဏံကီုရ၊ တၞးစၟတ်သမ္တီကောန်ဍုၚ် (မှတ်ပုံတၚ်) လေဝ် နွံမံၚ်၊ ဣဂှ်ရ ပ္ဍဲ ပိုဲ အခေါၚ်ကဵုမာဲ နွံမံၚ်၊ အခေါၚ်အဝဵုဏံ ပိုဲဒုၚ်ပဆောံ ဟွံမာန်၊ ညးစၞး ပိုဲဒးစိုတ်ဂှ် အခေါၚ်ပိုဲကဵု အခေါၚ်ပိုဲရုဲ ဒးနွံဏောၚ်” နာဲအံၚ်မေန် ဂးရ။

ဥုမိုၚ်ၚ်ဝေန် ညးအုပ်ကာ ဂကောံကမ္မယှေန်ဍောတ်တ် ပွိုၚ်ဍုၚ်ကံကြိက် “ကိစ္စဂှ် ပိုဲဂၠိုက်ဂၠာဲ စၟဳစၟတ်မံၚ်ဖိုဟ်၊ မုလေဝ် ပဒ္တန် ဟွံဂွံဏီ” ဂးရ။

ရန်ကဵု ကောန်ဒေသ ခတှေ်ကွာန်ဒဵုထောၚ် သ္ဂောံဂွံ အခေါၚ်ကဵုမာဲတုဲ နကဵုစၟတ်တ္ၚဲ ၁၈ ဂိတုဂျူလာဲဂှ် နူကဵုဗော်ဍုၚ်မန်တၟိ ပလံၚ်ဗ္စိုပ်လိက် ကုဂကောံကမ္မယှေန် ပေါဲရုဲမာဲ ပွိုၚ်ဍုၚ်လှာဒကှ်ကီု ဂွံတီကေတ်ရ။

ညံၚ်ဒေသတံဂှ်ကီုရ ပ္ဍဲဒေသ ဗော်ဍုၚ်မန်တၟိ မပ္တံကွာန်ခလံက်ဂနဳ၊ ဗလးဒုန်ဖာ် ကေုာံ ဒေသဗွဲပွဳပွူ မလုပ်အဝေါၚ် ဒေသ ဍုၚ်ကျာ်ပိ၊ ပွိုၚ်ဍုၚ်လှာဒကှ် ဂှ်လေဝ် အခေါၚ်စုတ်မာဲ နွံဟာ၊ ဟွံမွဲဟာဂှ် ဟွံတီဏီ ရဲဒေသတံ ဟီုရ။