နေသဝ်ယှိုဲ – ပ္ဍဲပေါဲရုဲ သၞာံ ၂၀၁၅ ဂိတု နဝ်ဝေမ်ဗာ ၈ ဏံ ရံၚ်ကဵု ဒပ်ဗၠာဲသၟိၚ်တံ ပါ်လဝ်ဗွိုၚ်ဂီုကၠီုဂှ်မ္ဂး ပ္ဍဲတွဵုရးမန် ရုၚ်မာဲ မက္တံၚ်က္တဴ ဒှ်ပဋိပက္ခမာန်ကီုလေဝ် ဍေံဒှ်ဟွံမာန်၊ မုဟွံဒးဂွိၚ် သာ်ဝွံ သ္ကိုပ်ဗၠာဲသၟိၚ် တွဵုရးမန် ဗိုဗိုဥုဟီုရ။

“က္တံၚ်က္တဴမာန် က္တဵုဒှ်ဟိုတ်မာန် ဟီုကၠာလေဝ် တၟော်ကဵု အကာဲအရာမ္ဂး ဍေံဒှ်ဟွံမာန် အဲထေၚ်၊ ဂကောံ ရပ်လွဟ် ကောန်ဍုၚ်အရၚ်တံလေဝ် ဂစာန်ကေတ်မံၚ် ပရေၚ်ၜိုဟ်လလံဏောၚ်၊ ဂစာန်မံၚ် သွက်ဂွံထ္ပက်စၟတ်တဲ ဒိုအ်ပန်ပှော် အလုံဍုၚ်ဏောၚ်တှေ် ပ္ဍဲဒေသဂှ် ဟိုတ်ဘဲအန္တရာဲ မမိက်ကဵုမွဲမွဲ ဗီုဂွံဒှ်မာန် ဟွံမွဲ၊ ပ္ဍဲတွဵုရးမန်ဏံ ကဵုမာဲ စုတ်မာဲ ၜိုဟ်ဟ်သြိုဟ်ဟ် မာန်ဏောၚ်ဂှ် အဲပတှေ်” ညးဂးတဴ သာ်ဝွံရ။

သွက်ပေါဲရုဲမာဲ သၞာံ ၂၀၁၅ ၊ ဂိတုနဝ်ဝေမ်ဗာ ၈ ဏံ ပ္ဍဲတွဵုရးမန် လၟိဟ်ရုၚ်မာဲ နွံဗ္ဒာဲမွဲလ္ၚီတုဲ အပ္ဍဲဂှ် ရုၚ်မာဲ ဘိုအ်ဂွံဒှ် အန္တရာဲ ဘဲပရိုက်ပကီု မမိက်ကဵုမွဲမွဲဂှ် နွံ ၉၀ ရုၚ်ပြၚ်ရဂှ်လေဝ် ဒပ်ဗၠာဲသၟိၚ် တွဵုရးမန် ကေၚ်ဟီုကၠုၚ်လဝ်နွံတုဲ ပ္ဍဲသေပ်တေမ်ဗာ ၁၅ ဂှ်လေဝ် နူ RFA လလောၚ် ဓမံက်လဝ် ပရိုၚ်ကီုရ။

ပ္ဍဲတွဵုရးမန် လၟိဟ်ရုၚ်မာဲ နွံ ၉၁၉ ရုၚ်တုဲ အပ္ဍဲဂှ် ရုၚ်မာဲ ဟွံဒးဖေက်ဘဲ ကဵုမာဲ စုတ်မာဲ ၜိုဟ်ဟ် သြိုဟ်ဟ်မာန်ဂှ် နွံ ၈၂၇ ရုၚ်၊ အခိၚ်ဟွံရုဲ အန္တရာဲ ဘဲပရိုက်ပကီု က္တဵုဒှ်မာန်ဂှ် နွံ ၉၂ ရုၚ် သာ်ဝွံ ဂွံတီကေတ် အတိုၚ်စရၚ်စၟတ်သမ္တီ နူရုၚ်နာဲဒပ် ဗၠာဲသၟိၚ် ရ။

အတိုၚ်စၟတ်သမ္တီ ရုၚ်နာဲဒပ် ဗၠာဲသၟိၚ် တွဵုရးမန်ဂှ်မ္ဂး ရုၚ်မာဲ အခိၚ်ဟွံရုဲ က္တဵုဒှ် ဘဲပရိုက်ပကီုမာန်ဂှ် ပ္ဍဲပွိုၚ်ဍုၚ်ကျာ်မြဟ် ၂၁ ရုၚ်၊ ပ္ဍဲပွိုၚ်ဍုၚ်ဇြပ်ဗု ၄ ရုၚ်၊ ပ္ဍဲပွိုၚ်ဍုၚ်ရေဝ် ၅၀ ရုၚ်၊ ပ္ဍဲပွိုၚ်ဍုၚ်ကျာ်ထဝ် ၅ ရုၚ်၊ ပ္ဍဲပွိုၚ်ဍုၚ်ၜဳလီု (ၜဳက္လေၚ်) ရ ရုၚ်၊ ပ္ဍဲပွိုၚ်ဍုၚ်သဓီု ၅ ရုၚ် သာ်ဝွံ ဓမံက်ထ္ၜးလဝ် ၉၂ ရုၚ်ရ။

အကာဲအရာလၟုဟ်ဏံ ပ္ဍဲတွဵုရးမန် ဒၞါဲမဒှ်မံၚ်ပေါဲဗ္တိုက် ဟွံမွဲတုဲ ရဲစုတ်မာဲတံ အာစုတ်မာဲမ္ဂး ဟွံဒးဒှ်ဓဝိၚ် မွဲသာ်ရ၊ ဒၞါဲဒပ်ဗၠာဲသၟိၚ်ဟီု ဒေသဖျေံစိုတ်ဟွံဂွံ ဟီုဂှ်လေဝ် နူဒပ်ပၞာန် ဖျေံစွံကဵု ပရေၚ်ဂီုကၠီဵုဏောၚ် ဇမၞော်ဗၠာဲသၟိၚ် ဗောဗောဥု ဂးရ။

စပ်ကဵုပရေၚ်ဂီုကၠီု ပ္ဍဲကာလပေါဲရုဲမာဲဂှ်မ္ဂး ပ္ဍဲတွဵုရးမန် ညံၚ်သ္ဂောံနွံကဵု ပရေၚ်ဂီုကၠီုဂှ် သဳကၠဳ ပ္ညဳလဝ်ကဵု မၞိဟ်တာလျိုၚ် ဗော်ကရေၚ် KNU၊ ဒပ်ဒဳမဝ်ကရေဇြဳရၚ်တၠုၚ်ဖဵုကရေၚ် DKBA၊ ဗော်ဍုၚ်မန်တၟိ NMSP ၊ ကံၚ်ဇြဳၜိုဟ်လလံကရေၚ် KNU/KNLA (PC)၊ဂကောံမန်ပါ်တိတ်၊ မုက်ဒပ် ပရေၚ်ၜိုဟ်လလံ ကေုာံ ပရေၚ်စဵုဒၞါမန် MPDF ကဵု ဒပ် KFAP တံတုဲရဂှ်လေဝ် ဂွံတီကေတ် နူဒပ်ဗၠာဲသၟိၚ် တွဵုရးမန် ရ။