အိုက်သာၚ် – ပ္ဍဲအရာ အလဵုအသဳကဵု ဂကောံရပ်လွဟ် ကောန်ဍုၚ်အရၚ်တံ ဆဵုဂဗ သဳကၠဳမံၚ် ကိစ္စလိက်ကသုက် NCA သွက်ပရေၚ်ၜိုဟ်လလံ ဍုၚ်ဂှ် ဒၞာဲအခန်ကဵုသ္ဂုတ်သွာတ်တံဂှ် ပံက်အခေါၚ် ကဵုညးဗြဴတံ ပါလုပ်ကီုညိဂှ် နူဂကောံညးဗြဴ (ဍုၚ်ဗၟာ) WLB အာတ်မိက်လဝ်ရ။

ပ္ဍဲသေပ်တေမ်ဗာ ၁၉ ဂှ် နူဂကောံညးဗြဴ ဍုၚ်ဗၟာ WLB ကၠောန်လဝ်ပေါဲသဳကၠဳမွဲ နကဵုက္ဍိုပ်လိက် “စၟတ်သမ္တီ တ္ၚဲပရေၚ်ၜိုဟ်လလံ ဂၠးကဝ် ကေုာံ အခေါၚ်အဝဵု ညးဗြဴဂမၠိုၚ်” ပ္ဍဲကဵု Orchid Hotel ဍုၚ်လ္ဂုၚ်ဂှ်တုဲ အာတ်မိက်ဏာ အတိုၚ်ဗွဲလ္တူဂှ်ရ။

“လၟုဟ် အလဵုအသဳကဵု ဂကောံရပ်လွဟ် ကောန်ဍုၚ်အရၚ်တံ သဳကၠဳမံၚ်ပရေၚ် NCA ။ အပ္ဍဲဂှ် မၞိဟ်ဗြဴဗြဴ ၜါပိတလ ဓဝ်ရ ဂွံအခေါၚ်ပါလုပ်။ တုဲတှေ် ပ္ဍဲဒၞါဲ နွံကဵုအခေါၚ်ကၠောန်၊ ဒၞါဲကၠောန်ဂွံ နွံမံၚ်ဖိုဟ်ဂှ် ဟွံဂွံ အခေါၚ်ကၠောန်။ ဒှ်ပေါဲဗ္တိုက်တှေ် ဆဵုဒဒိုက်ကၠာအိုတ်ဂှ် မၞိဟ်ဗြဴတံရ။ ဒှ်သာ်ဂှ်ရ မိက်ဂွံဓမံက်ရုပ်ရဴ ဓဝ်ၜိုဟ်လလံ ဍာံဍာံတှေ် ဒးကဵုအခေါၚ် ကုညးဗြဴတံ ပါလုပ်မွဲဂကောံ မွဲကရောံကီုဏောၚ်တုဲ ပ္ဍဲဗွိုၚ်နွံကဵု အခေါၚ်ကၠောန်ဂှ် ထေက်ကဵု ဒးကဵုလုပ်သဳကၠဳကီုဏောၚ်။ ဗီုဂှ်ဖန်ကဵု ဟွံမာန်တှေ် ဓဝ်ၜိုဟ်လလံ ဍုၚ်ဗၟာဏံဂှ် ဒှ်မာန်ဟွံသေၚ်” မိသဳတာ(စမ်းချောၚ်း) ဥက္ကဌ Pen Myanmar မလုပ်အဝေါၚ် ဂကောံညးဗြဴ ဍုၚ်ဗၟာ WLB ဂှ် ဟီုရ။

ပ္ဍဲအ္ခိၚ်အခါ ကာလတ္ၚဲဏံ သွက်ဂွံဓမံက်ရုပ်ရဴ လိက်ကသုက် ဒိုအ်ပန်ပှော် အလုံမွဲဍုၚ် ကော်ဂး NCA ဂှ် ဂကောံ UWPC (ကမ္မတဳဓမံက်ရုပ်ရဴ ပရေၚ်ၜိုဟ်လလံ ကၟိန်ဍုၚ်) အလဵုအသဳကဵု ဂကောံညးစၞး ပ္ညဳပ္ညပ်အဆံၚ်သၠုၚ်(SD) နူကောန်ဍုၚ်အရၚ်တံ ကၠောန်ကၠုၚ်လဝ် ပေါဲသဳကၠဳဂမၠိုၚ်တုဲ သွက်ဂွံဒှ်ထ္ပက်စၟတ်တဲ ပ္ဍဲဂိတု အံက်တဝ်ဗာ ပထမ သတ္တဟ ဂှ်လေဝ် သ္ဂုတ်သွာတ်တုဲမံၚ်ကီုရ။

ရံၚ်ကေတ် ပ္ဍဲဂကောံတံဂှ်မ္ဂး အခန်ကဏ္ဍ ညးဗြဴတံ ဂွံပါလုပ်ဂှ် အောန်ကွေံကွေံတုဲ ဟွံမွဲကဵု အခေါၚ်ကၠောန် ညာတ်ကေတ်သာ်ဂှ်ရ၊ ဒၟါနူဂှ်ရ ပ္ဍဲဒၞါဲကၠောန်ဂွံ ၊ဒၞါဲနွံကဵု အခေါၚ်ကၠောန်ဂှ် ကဵုညးဗြဴတံ ပါလုပ်ကီုညိ နကဵုဂကောံ ညးဗြဴဂမၠိုၚ်ဍုၚ်ဗၟာ ဒးအာတ်မိက်လဝ် သာ်ဝွံ ဂကောံ WLB ဂှ် ဟီုရ။
“ပ္ဍဲဂကောံ (SD) ဂှ် ညးဗြဴဗြဴတှေ် ပဒေါနဝ်ဇြဳဖဝ်ရာသိၚ် နွံ။ ပ္ဍဲ UPWC တှေ် မၞိဟ်ဗြဴမွဲတလကဵု ဒဝ်ဒွါဗူ နူကၠတ်ထဝ် ပါလုပ်။ ပ္ဍဲ MPC တှေ် ဒံက်တာ ယေန်န်နွာ ပါလုပ်ရ။ ၜိုန်ဂှ်လေဝ် ပ္ဍဲညးတံ အခေါၚ်ကၠောန်လေဝ် ဟွံမွဲ၊ အခေါၚ်ကဵုသ္ဂုတ်သွာတ်လေဝ် ကြပ်ဟွံမွဲမံၚ်ကီုရ။ ဒၟါနူဂှ်ရ ပ္ဍဲကလောန် ပရေၚ်ဓဝ်ၜိုဟ်လလံဏံ နကဵုလၟိဟ် ဗၞတ်ဗ္ၜတ်မွဲမွဲကီု၊ ပ္ဍဲဒၞါဲ နွံကဵုအခေါၚ်ကၠောန် မကၠောန်ဂွံဂှ်ကီု ကဵုညးဗြဴတံ လုပ်ဗိုၚ်ရၚ်တၠုၚ်ကီုညိ အာတ်မိက်ဏာ” သာ်ဝွံ ဒဝ်ဏာမ်ရဝ် ဒါရာ်တာ ညိၚ်ဝှံၚ်ဒေယှေန် မလုပ်အဝေါၚ် WLB ဂှ် ဟီုရ။

ပ္ဍဲဂိတုဂျုန် သၞာံ ၂၀၁၅ မလောန်ကၠုၚ်ဏံ အဃော က္ဍိုပ်သ္ကိုပ် ဂကောံရပ်လွဟ် ကောန်ဍုၚ်အရၚ်တံ သ္ပသဘၚ်သဳကၠဳ ပ္ဍဲလဝ်ခဳဠာ ဌာန်ဂအုပ် ဗော် (KNU) ဂှ် ညးတာလျိုၚ်ဂမၠိုၚ် နူဂကောံညးဗြဴဂလိုၚ် ဍုၚ်ဗၟာ WLB ဏံလေဝ် တိုန်စိုပ်လဝ် နဒဒှ်ညးလ္ၚတ်တုဲ ပ္ဍဲကိစ္စပေါဲသဳကၠဳ စပ်ကဵုပရေၚ်ၜိုဟ်လလံ တံဂှ် ပံက်အခေါၚ် ကဵုညးဗြဴဗြဴတံ ပါလုပ် ဗၞတ် ၃၀ က္ဍိုပ်ကၠံကီုညိ ပၠောပ်ဂလာန် အာတ်မိက်ဏာဂှ် က္ဍိုပ်သ္ကိုပ် ဂကောံရပ်လွဟ် ကောန်ဍုၚ်အရၚ်တံ ဒုၚ်တဲရ။

ကိစ္စဂှ် လ္ပာ်အလဵုအသဳလေဝ် ဒုၚ်တဲကီုရ၊ ဆ္ဂး အခါ ဓမံက်ရုပ်ရဴကွေံကွေံမ္ဂး ဗၞတ်ဗ္ၜတ် ၃၀ က္ဍိုပ်ကၠံဟီုဂှ် ဂၠိုၚ်လောန်အာတုဲ ဒှ်ဟွံမာန်ဏီ ခၠေဝ်နၚ် အရေဝ်ရ။

ပ္ဍဲကဵု SD (ဂကောံညးစၞး ပ္ညဳပ္ညပ်အဆံၚ်သၠုၚ်) လ္ပာ်ကောန်ဍုၚ်အရၚ်ဂှ် နဝ်ဇြဳဖဝ်ရာသိၚ် ပၠမံၚ် နဒဒှ် မၞိဟ်အာက္ဍိုပ်တုဲ ကရောံဂှ် ဒဝ်သဝ်မျရာဇာလေန် နူ ALP ပါကီုရ။ ပ္ဍဲUPWC အလဵုအသဳဂှ်လေဝ် ဒဝ်ဒွါဗူ ညးစၞးကၠတ်ထဝ် ညးဍုၚ် ကေုာံ မၞိဟ်ဗြဴမွဲတလ နူကၠတ်ထဝ်ကောန်ဂကူ ပါလုပ်ရ။ ပ္ဍဲ MPC ဌာန်ဂအုပ် ပရေၚ်ၜိုဟ်လလံ ဂှ်လေဝ် သၟာၚ်နူ ဒံက်တာ ယေန်န်နွာတုဲ မၞိဟ်ဗြဴတၞဟ် လ္ၚဵုလ္ၚဵုလေဝ် ပါလုပ်မံၚ်ကီုရ။