အိုက်သာၚ် – ဂကောံပၠန်ဂတး ရပ်လွဟ်ဗွဲမဂၠိုၚ် အလဵုအသဳအဆက်က် လလောၚ်ပၟိၚ်လဝ် နဒဒှ် ဂကောံဟွံဗဗွဲဓဝ်တုဲ လၟုဟ်ဝွံ ပၞောဝ်ကဵု ဂကောံ (၈) ဂကောံ မလုပ်ထ္ပက်စၟတ်တဲ

ပ္ဍဲလိက်ကသုက် ဒိုအ်ပန်ပှော်အလုံမွဲဍုၚ် NCA ဂှ် ဂကောံ ရပ်လွဟ် ၃ ဂကောံ- နူစရၚ် ဂကောံဟွံဗဗွဲဓဝ်ဂှ် အလဵုအသဳ ဇိုတ်ထောံရ သာ်ဝွံ နူအလဵုအသဳ ပ္တိတ်လဝ်လိက်ပၟိၚ် ပ္ဍဲဂိတု အံက်တဝ်ဗာ ၁၂ ဂှ်ရ။

နကဵုလၟေၚ်ဂၞန်လိက် အလဵုအသဳဗၟာ (၂/၂၀၁၅)၊ စၟတ်တ္ၚဲအံက်တဝ်ဗာ ၁၂ ဂှ် ကုဗော် ကောန်ဂကူကရေၚ် KNU၊ မုက်ဒပ် ဒဳမဝ်ကရေတ်တေတ် ကွးဘာဂမၠိုၚ် အလုံဍုၚ်ဗၟာ ABSDF ၊ ကံၚ်ဇြဳ က္လေၚ်ပ္တန် ရးသေံဇၞော်/ ဒပ်ပၞာန်ရးသေံဇၞော် RCSS/SSA ပိဗော်ဏံ နူကဵုမလလောၚ်လဝ် ဂကောံဟွံဗဗွဲဓဝ်ဂှ် အလဵုအသဳ ဇိုတ်ထောံစရၚ်ရ။

ဥုယျေဝ်ထောဋ် ဝန်ဇၞော်ကၟိန်ဍုၚ်ဂှ် “ဌာနဝန်ဇၞော် ပြုပြေၚ်ကေၚ်ကာပ္ဍဲဍုၚ် (ပျဳဳထေဝ်ယျေ) ဂှ် ပ္ဍဲဂကောံ ၈ ဂကောံမထ္ပက်စၟတ်တဲ NCA ဂှ် ဂကောံ ၃ ဂကောံရ ဒးဇိုတ်ကဵုစရၚ် နူမလလောၚ်လဝ် ဂကောံဟွံဗဗွဲဓဝ်၊ ဂကောံမပကီုပရိုက် ရ။ လိက်ပၟိၚ်မဇိုတ်ကၠေံစရၚ်ဂှ် ပ္တိတ်လဝ် နစၟတ်တ္ၚဲ အံက်တဝ်ဗာ ၁၂ ဏံရ။ ဂကောံ ၅ ဂကောံ မသှေ်မံၚ်ဂှ် နူတံအာဒိတေံရ ကေၚ်လလောၚ်လဝ် ညးတံ နဒဒှ် ဂကောံဟွံဗဗွဲဓဝ် ဟွံမွဲမံၚ်ရတုဲ သ္ဇက်ဒးပ္တိတ်လိက်ပၟိၚ် အရၚ်ညးတံ ဟွံမွဲရ” သာ်ဝွံ ချူထ်ၜးလဝ် ပ္ဍဲမုက်လိက် ဝှေတ်ဗော် ညးတေံရ။

ပ္ဍဲအံက်တဝ်ဗာ ၁၅ ဏံမ္ဂး ပ္ဍဲဂတ သက်သဳဂလိုၚ် သီုပ္ဍဲဍုၚ် သီုဍုၚ်မ္ၚးဂှ် ဂကောံရပ်လွဟ် (၈) ဂကောံ ကဵု အလဵုအသဳဗၟာတံ ထ္ပက်စၟတ်တဲ လိက်ကသုက် NCA ပ္ဍဲဌာန် MICC-2 (အပျဳပျဳဇြာၚ်ယျာ မျာန်မာ ကန်ဗေန်ယှေန်သေန်တာ) ဍုၚ်နေပျဳဒဝ်ဂှ်ဏောၚ်။

ကၠာဟွံစိုပ် တ္ၚဲထ္ပက်စၟတ်တဲ ၃ တ္ၚဲမ္ဂး ကုဂကောံ လုပ်ထ္ပက်စၟတ်တဲ NCA ဂှ် နူအလဵုအသဳ ရုပ်ထောံ နူဂကောံ ဟွံဗဗွဲဓဝ်ဏောၚ် ဂှ်လေဝ် အဃော ညးစၞး ဂကောံ (၈) ဂကောံကဵု ညးစၞးအလဵုအသဳ တံ သဳကၠဳလဝ် ပ္ဍဲအံက်တဝ်ဗာ ၄ တေံဂှ် ဟီုဂးတုပ်စိုတ် တုဲမံၚ်ရ ဥုလှမိုၚ်ယှိုဲ နူရုၚ် MPC ဟီုရ။

ထ္ပက်စၟတ်တဲ လိက်ကသုက် NCA ဒိုအ်ပန်ပှော် အလုံမွဲဍုၚ်တုဲမ္ဂး အတိုၚ် တၚ်တုပ်စိုတ် ပ္ဍဲလိက်ကသုက်ဂှ်ရ ဒးကၠောန်ကဵု ပေါဲသဳကၠဳ ပရေၚ်ဍုၚ်ကွာန် ဏောၚ်တုဲ ဗွဲမဗွဲကဵု သွဟ်ပေါဲသဳကၠဳ ပရေၚ်ဍုၚ်ကွာန်ဂှ်ဟေၚ် ဒက်ပ္တန်အာ ကၟိန်ဍုၚ်ပံၚ်ကောံ နွံကဵုသၞောတ်ဝှေဒ္ဒရဴ မဍိုက်ပေၚ်ကဵု သဘဴဒဳမဝ်ကရေဇြဳဏောၚ် သာ်ဝွံ ပ္ဍဲအံက်တဝ်ဗာ ၁၂ ဂှ် နူဗော် KNU ပ္တိတ်လဝ် လိက်လလောၚ်တြး မွဲတၞးရ။

“ ပိုဲတံ ထ္ပက်စၟတ်တဲ NCA တုဲမ္ဂး အတိုၚ်ဂလာန်တုပ်စိုတ် ပ္ဍဲလိက်ကသုက်ဂှ်ရ ချူ မူပၞောန် ဆေၚ်ကဵု ပရေၚ်ဍုၚ်ကွာန်ဏောၚ်၊ တုဲမ္ဂး ကၠောန်ပေါဲသဳကၠဳ ပရေၚ်ဍုၚ်ကွာန်ဏောၚ်၊ ဒုၚ်သဇိုၚ်ကဵု သွဟ်ပေါဲသဳကၠဳ ပရေၚ်ဍုၚ်ကွာန်ဂှ်တုဲ ညံၚ်ဂွံဒက်ပ္တန် ကၟိန်ဍုၚ်ပံၚ်ကောံ မဒုၚ်သဇိုၚ်ကဵု သၞောတ်ဝှေဒ္ဒရဴ ကဵု ပရေၚ်ဒဳမဝ်ကရေဇြဳ မာန်ဂှ် ဂစာန်အာဏောၚ်” ပဒေါသဝ်ဂွါထူဝေန် ညးအုပ်ကာ ဗော် KNU ဟီုရ။

ပ္ဍဲဂကောံရပ်လွဟ် (၈) ဂကောံ မလုပ်ထ္ပက်စၟတ်တဲဂှ် KNU ဗော်ကောန်ဂကူကရေၚ်၊ ABSDF မုက်ဒပ် ဒဳမဝ်ကရေတ်တေတ် ကွးဘာဂမၠိုၚ် အလုံဍုၚ်ဗၟာ၊RCSS ကံၚ်ဇြဳ က္လေၚ်ပ္တန် ရးသေံဇၞော်၊DKBA ဒပ်ကရေၚ် မပ္တုဲဖဵုကဵု ဒဳမဝ်ကရေဇြဳ၊ PNLO ဂကောံဇၞော် ပရေၚ်ဗၠးၜးကောန်ဂကူ ပအိုအ်၊ ALP ဗော်ပရေၚ်ဗၠးၜး ရးရခေၚ်၊ KNU/KNLA-PC ကံၚ်ဇြဳပရေၚ်ၜိုဟ်လလံ ကရေၚ်၊ CNF မုက်ဒပ်ကောန်ဂကူချေၚ် တံ ပါလုပ်အိုတ်ရ။