ရဲဌာနဝန်ဇၞော် ပရေၚ်လလောၚ်ပရိုၚ် ကၟိန်ဍုၚ် ကဵု ရဲဌာန်ပရိုၚ် ကောန်ဍုၚ်အရၚ်တံ ဆဵုဂဗသဳကၠဳ
ၚ်ပရိုၚ် MOI ရီုဗၚ်ထံက်ပၚ်ကီုဏောၚ် ဝန်ဇၞော် ဥုယျေဝ်ထောဋ် ဟီုဂးလဝ်နွံ သာ်ဝွံ ဥုဇြေန်ဠေန် ညးက္ဍိုပ် ဂကောံ NQAT ကေုာံ ဌာန်ပရိုၚ် BNI ဟီုရ။
ပ္ဍဲအံက်တဝ်ဗာ ၁၃ ဂှ် ဝန်ဇၞော်ကၟိန်ဍုၚ် ဥုယျေဝ်ထောဋ် ကဵု ညးတာလျိုၚ်ဂမၠိုၚ် နူဌာန်ပရိုၚ်ကောန်ဍုၚ် အရၚ် မဒှ်ကောန်ဂကောံ ဌာန်ပရိုၚ် BNI ကီု သီုကဵု ညးတာလျိုၚ်ဌာန်ပရိုၚ် ဒေသ တအ် ဆဵုဂဗညးသ္ကအ် ပ္ဍဲၝောံခန်ဗ္ဒမ်ကၟုဲ ဌာနဝန်ဇၞော် ပရေၚ်လလောၚ်ပရိုၚ်တုဲ ပ္ဍဲကလောန် တက်တရးပ္တိတ်ပရိုၚ်ကီု၊ အရာဌာန်ပရိုၚ်မွဲမွဲ ဂွံတန်တဴကီု နွံကဵုတၚ်ဝါတ်ဂါတ် အခက်ခုဲ သာ်လဵုရောဂှ် သဳကၠဳပ္တိုန်ထ်ၜး ညးသ္ကအ်နွံ ဂွံတီရ။
လဟီု ဥုဇြေန်ဠေန် “ အဓိကဂှ် ညးတံသၟာန် အကာဲအရာ တၠုၚ်လအာ ပရေၚ်ဇၞော်မောဝ် ဌာန်ပရိုၚ် ကောန်ဍုၚ်အရၚ်တံ၊ ဌာန်ပရိုၚ် ကောန်ဍုၚ်အရၚ်တံ ခက်ခုဲမံၚ် ဗီုလဵုဂှ် ညးတံသၟာန်၊ လ္တူညးတံ သၟာန်ကၠုၚ်ဂှ် ပိုဲက္လေၚ်သှ်က္လး ပ္တိုန်ထ်ၜးကဵုညးတံ အကာဲအရာ အခက်ခုဲပိုဲတုဲ နကဵုဌာနဝန်ဇၞော် လလောၚ်ပရိုၚ် MOI ၜိုတ်သ္ပမာန် ညးတံရီုဗၚ် ထံက်ပၚ်အာ အရာနွံပၟိက်တံဂှ် ကီုဏောၚ်ဂှ် ဝန်ဇၞော် ဥုယျေဝ်ထောဋ် ဟီုရ။ ဆ္ဂး ရီုဗၚ်ဗီုလဵု ထံက်ပၚ် အရာလဵုရောဂှ် ဟီုပ္တိတ်ကၠးကၠး ဟွံမွဲရ။ ရီုဗၚ်ဏောၚ် ဟီုလဝ် ၜို်တ်ဂှ်ရ။ ဌာန်ပရိုၚ်ကောန်ဍုၚ်အရၚ်ဂှ် နွံမွဲဓဝ်ဟွံသေၚ်တုဲ အရာနွံပၟိက်လေဝ် ဍေံတုပ်ညးသ္ကအ် ဟွံသေၚ်” ဂးရ။
ဌန်ပရိုၚ်ကောန်ဍုၚ်အရၚ်တံဝွံ ဗွဲမဂၠိုၚ် အ္စာပရိုၚ် ဟွံရုံဂပ်၊ အပေါတ်ကြိယာ ဟွံဍိုက်ပေၚ်၊ ဂၠံၚ်ဍာန်တံလေဝ် ဟွံခိုဟ် ဟွံက္လိတ်က္လောတ် ဒၟါနူဟိုတ်တံဏံရ ပရိုၚ်ဂှ်လဇုဲ၊ ဂွံတက်တရးပ္တိတ်ဂှ်လေဝ် နွံကဵုတၚ်ခက်ခုဲ မပ္တံသာ်ဏံ လ္ပာ်ဌာန်ပရိုၚ် ကောန်ဍုၚ်အရၚ်တံ ဟီုထ်ၜးရ။
ဌာနလလောၚ်ပရိုၚ် MOI ဂှ် ၜိုတ်ညးတံသ္ပမာန် ရီုဗၚ်ထံက်ပၚ်သၟးဟွံက၊ ပ္ဍဲတန်ဗ္တောန် ညးတံဗ္တောန်မံၚ် ဂှ်လေဝ် အ္စာပရိုၚ် နူဌာန်ပရိုၚ် ကောန်ဍုၚ်အရၚ်တံလေဝ် ကဵုအခေါၚ်တိုန်ကီုဏောၚ် တုပ်လဝ်စိုတ်ရ။ မွဲသာ်ပၠန် လ္ပာ်ဌာန်ပရိုၚ် ကောန်ဍုၚ်အရၚ်တံ စှေ်စိုတ်မ္ဂး သွက်ဂွံလှာဲဂတး ပရိုၚ်ညးသ္ကအ်ဂှ်လေဝ် နူဌာနလလောၚ်ပရိုၚ်ပိုဲ ဒုၚ်တဲလၟိုန်ရ သာ်ဝွံ ဥုယျေဝ်ထောဋ် သဳကၠဳကၠုၚ်နွံ ဂွံတီရ။
ပ္ဍဲဂၠးမုက်လိခ် facebook ဥုယျေဝ်ထောဋ်ဂှ် “တ္ၚဲဏံ ပံၚ်ကဵုမဳဒဳယာမဇ္ဇျှိမတုဲ ဆဵုဂဗသဳကၠဳကဵု ဂကောံ BNI သီုဌာန်ပရိုၚ် ကောန်ဍုၚ်အရၚ် လ္ၚဵုလ္ၚဵုတံရ။ တၚ်သဳကၠဳလဝ် အဓိကဂှ် လိက်ပရိုၚ်၊ ဂျာနေဝ် မပ္တိတ်မံၚ် နကဵုဘာသာ ကောန်ဍုၚ်အရၚ်တံ ညံၚ်ဂွံဇၞော်မောဝ် ဖေါအ်ဗြေဝ်တိုန်ဂှ် သွက်ဂွံရီုဗၚ် နကဵုပရေၚ်ဘဏ္ဍာ၊ ပ္ဍဲအရာလှာဲဂတး ပရိုၚ်ဂှ်ပၠန်လေဝ် ဒ္ဂေတ်ဝတ် သၞောတ်ဗ်ၜတ် ဒးမၚ်မွဲ တံဂှ်လေဝ် ဒးထ်ၜုတ်စွံလဝ်။ မူ ဒးမၚ်မွဲ ဒ္ဂေတ်ဗက်တံ ထ်ၜုတ်ထောံတုဲမ္ဂး ဌာန်ပရိုၚ် ကောန်ဍုၚ်အရၚ် မဍိုက်ပေၚ်ကဵု ပၞောန်မူဂှ် နူဌာနလလောၚ်ပရိုၚ် ကၟိန်ဍုၚ်ဏံ သွက်ဂွံရီုဗၚ် ထံက်ပၚ်အာဂှ် ဆက်ဖန်ဇန်အာဏောၚ်” ချူဓမံက်ထ်ၜးလဝ် သာ်ဝွံရ။
ပေါဲသဳကၠဳဏံဂှ် ဒှ်ပေါဲ ဌာနဝန်ဇၞော် ပရေၚ်လလောၚ်ပရိုၚ် ကဵု ဂကောံဌာန်ပရိုၚ် ကောန်ဍုၚ်အရၚ်တံ ဆဵုဂဗသဳကၠဳ အလန်ကိုပ်ကၠာအိုတ်တုဲ လ္ပာ်ဌာန်ပရိုၚ် ကောန်ဍုၚ်အရၚ်တံဂှ် ညးတာလျိုၚ် ၂၅ တလ နူဌာန်ပရိုၚ်ဂမၠိုၚ် ကောန်ဍုၚ်အရၚ် မပ္တံကဵု ကန္တာရဝတဳတာၚ်မ်၊ တာန်လွေန်တာၚ်မ်၊ ဌာန်ပရိုၚ် (ခိုနှုမ်းထုန်) ၊(ပဲခူးအသံ)၊ ဌာန်ပရိုၚ် နိရဥ္ဇရာ၊ ဌာန်ပရိုၚ် မဇ္ဇျှိမ၊ ဌာန်ပရိုၚ် ချေၚ်ဝဝ်လ် မဒှ်ကောန်ဂကောံ BNI တံ တိုန်စိုပ်အိုတ် ဂွံတီကေတ်ရ။
