အိုက်သာၚ် – သွက်ရဲပါဲဒဴ ဘဲပၞာန် နွံပ္ဍဲဗ္ဒိုပ် IDPs အပ္ဍဲဍုၚ် ကေုာံ ဒေသပယဵုတံဂှ် နူအလဵုအသဳ စွံဓဝ်ဆာန်ဍူ ဗ္စာရဏာ လ္တူဍေံတံတုဲ ရီုဗၚ်ထံက်ပၚ် ပြဟ်ဟ်ညိဂှ် ပ္ဍဲဂိတုအံက်တဝ်ဗာ ၁၈ လောန်ကၠုၚ်ဏံ ဂကောံရပ်လွဟ် ၈ ဂ

ကောံ မထ္ပက်စၟတ်တဲ လိက်ကသုက် NCA တံ ပ္တိက်လိက်လလောၚ်တြး အာတ်မိက်လဝ် ကုအလဵုအသဳရ။

“ပိုဲ ထ္ပက်စၟတ်တဲ လိက်ကသုက် NCA တုဲဣရ။ ဆ္ဂး အတိုၚ်ပိုဲ ရန်လဝ် ဟွံသေၚ်ရ။ အဓိကဂှ် အတိုၚ် တၚ်တုပ်စိုတ် ပ္ဍဲလိက်ကသုက်ဂှ်ရ အရာဒးမၚ်မွဲဂှ် သီုၜါလ္ပာ် မၚ်မွဲဒ္ဂေတ်ဗက်တုဲ သွက်ဂွံဓမံက်အာရုပ်ရဴရ။ ဒှ်သာ်ဂှ်ရ လၟုဟ် ဒၟါနူပေါဲပၞာန် ပ္ဍဲဍုၚ်တုဲ ရဲပါဲဒဴဘဲပၞာန်တံ က္တဵုဒှ်စိုပ်မံၚ်ဒဒိုက်ဂှ် နူအလဵုအသဳ စွံဓဝ်ဗ္စာရဏာ ဆာန်ဍူ ရဲဒဴပၞာန်တံဂှ်တုဲ ဖန်ဇန်ကဵု ပရေၚ်ရီုဗၚ်ပြဟ်ဟ်ညိဂှ် ပိုဲဒးအာမိက်ဏာ” သာ်ဝွံ ဥုဃောန်မျေအ်ထောန် ဥက္ကဌ ဂကောံဇၞော် ပရေၚ်ဗၠးၜး ကောန်ဂကူပအိုအ် (PNLO) ဟီုရ။

သၞာံ ၂၀၁၅ ပ္ဍဲဂိတုအံက်တဝ်ဗာ ၁၅ ဂှ် ဂကောံရပ်လွဟ် ကောန်ဍုၚ်အရၚ် ၈ ဂကောံကဵု် ဂကောံအလဵုအသဳတံ ထ္ပက်စၟတ်တဲ လိက်ကသုက် ဒိုအ်ပန်ပှော် အလုံမွဲဍုၚ် NCA ပ္ဍဲဂတမုက် သက်သဳဂလိုၚ် သီုသွာၚ်ပ္ဍဲဍုၚ်/သွာၚ်ဍုၚ်မ္ၚး ပ္ဍဲကဵု ၝောံခန် MICC-2 ဍုၚ်နေပျဳဒဝ်တေံ တုဲရ။

ပ္ဍဲလိက်လလောၚ်တြး ဂကောံထ္ပက်စၟတ်တဲ ၈ ဂကောံဂှ်ဝွံ သွက်ဂွံဆက်ဓမံက် ရုပ်ရဴ အတိုၚ်NCA ဂှ် (က) လၟုဟ် လိက်ကသုက် NCA လမျီုလုပ်မံၚ်ရဒှ်တုဲ ညံၚ်ဂွံဒှ် ဒတုဲဖဵု အလုံမွဲဍုၚ်ဂှ် အရာပန်ပှော် ဖန်ဗဒှ်မံၚ် ပေါဲဗ္တိုက်တံဂှ်ကီု၊ အရာသ္ပသၞ ဂၠာဲဆောတံဂှ်ကီု ဒးဖအောန်ဖျေံဏောၚ်။ (ခ) အတိုၚ် ဒုၚ်လဝ်ကတိပါၚ် လ္တူလိက်ကသုက် NCA ဂှ်ရ ပြသၞာပရေၚ်ဍုၚ်ကွာန်ဂှ် သောၚ်က္လး နကဵုနဲပရေၚ်ဍုၚ်ကွာန်မာန်ဟေၚ် ပြေပြံၚ်မာန်ဏောၚ်ဂှ် အလဵုအသဳကဵု ဒပ်ပၞာန်ဒုၚ်တဲရ။

သွက်ဂွံဒက်ပ္တန် ကၟိန်ဍုၚ်ပံၚ်ကောံ နကဵုသၞောတ်ဝှိဒ္ဒရဴ ဂှ်လေဝ် တုပ်စိုတ်ကီုတုဲ ပရေၚ် NCA ဂှ် ဗိုန်ဗတ်အာရ။ ဒှ်သာ်ဂှ်ရ ရဲၜါလ္ပာ် မထ္ပက်လဝ်စၟတ်တဲတံဂှ် ပေါဲသဳကၠဳပရေၚ်ဍုၚ်ကွာန် ညံၚ်သ္ဂောံဒှ်အာ ခိုဟ်ဟ်မိုဟ်ဟ် ပြေပြေပြံၚ်ပြံၚ်ဂှ်် ဒးပံၚ်ကၠောန် မွဲစွံဏောၚ် အာတ်မိက်ဏာ သာ်ဝွံ ဓမံက်လဝ် ပ္ဍဲလိက် လလောၚ်တြးဂှ်ရ။

သ်အာၚ်နူဂှ်ပၠန် သွက်ရဲဒှ်ဒဒိုက် ဒၟါနူဘဲပၞာန် မစိုပ်မံၚ် ပ္ဍဲဗ္ဒိုပ်ဒဴပၞာန် IDPs လ္ပာ်ပ္ဍဲဍုၚ် ကေုာံ လ္ပာ်ဌာန်ဒေသ ပယဵုတေံဂှ်လေဝ် ပရေၚ်အရီုဗၚ် ညံၚ်ဂွံစိုပ်ပြဟ်ဟ်ဂှ် နူအလဵုအသဳ ညံၚ်ဂွံဖန်အာ၊တုဲပၠန် ကုရဲပရေၚ်ဍုၚ်ကွာန် ဒးမံၚ်ထံၚ်တံဂှ်ကီု၊ ကုကွးဘာ တြုံတြုံဗြဴဗြဴ မပ္တိတ်ဒြဟတ် သွက်ဂွံပြံၚ်လှာဲ သၞောတ်ပရေၚ်ပညာတံ ကဵု ကုညးဗိုၚ်ကဵုဒြဟတ် မဗိုၚ်ဗွိုၚ်ဏာတံ ဒးဒုၚ်ရပ်လဝ်ဂှ်ကီု ညံၚ်ဂွံဗလးကဵု ပြဟ်ဟ်ဂှ်လေဝ် ဂကောံ ရပ်လွဟ် ၈ ဂကောံတံ အာတ်မိက်လဝ်ကီုရ။

“လၟုဟ်ဟီုမ္ဂး ပ္ဍဲဗ္ဒိုပ် ရဲဒဒိုက်ဒဴပၞာန် နွံပ္ဍဲတွဵုရး ကချေၚ်တေံဂှ် ရဲဒဴပၞာန်တံ အောန်စှေ်အာ ဟွံသေၚ်ရ။ လ္ပာ်ဂၠိုၚ်တိုန်ရနွံ။ ဒၟါနူဂှ်ရ ဇွောံမ စၞစတံကီု၊ ဆေၚ်ကဵု သွက်ဂွံဝဳယဲကီု နွံပၟိက်ကွေံကွေံရ” သာ်ဝွံ ဥုအိုၚ်နာန် ဒုညးအုပ်ကာ ဂကောံဇၞော် ခရေတ်ယာန်ကချေၚ် (KBC) ဟီုရ။

ကာလလၟုဟ်မ္ဂး အပ္ဍဲဍုၚ်ဗၟာဏံ လၟိဟ်ရဲ ဒးဒဴဘဲပၞာန် နွံကဵုကိုဋ်ဏောၚ် ဂွံတီကေတ်ရ။

အပ္ဍဲဂှ် ပ္ဍဲတွဵုရးကချေၚ်ဂှ် နွံဗ္ဒါဲမွဲကိုဋ်ဘာ်၊ ပ္ဍဲတွဵုရးကရေၚ်ဂှ် နွံမွဲကိုဋ်ပြၚ်ၚ်၊ လ္ပာ်တွဵုရးသေံဇၞော်ဂှ် နွံဗ္ဒါဲၜါဠက်၊ လ္ပာ်ပဠိတ်ဝ တွဵုရးချေၚ်တေံဂှ်လေဝ် နွံဗ္ဒါဲမသုန်ကၠံကီု ဂွံတီကေတ် နူဗ္ဒိုပ် ရဲဒဴပၞာန် တံဂှ်ရ။

ဆဂှ််သၟးဟွံသေၚ် ကာလလၟုဟ်ဏံ ပ္ဍဲဒေသ တွဵုရးသေံဇၞော်တေံ ဒပ်အလဵုအသဳ ကဵု ရဲဒပ် (SSPP/SSA) ဗော်ပရေၚ်တောက်တက် ရးသေံဇၞော် တံ ဆက်ဒှ်မံၚ် ပေါဲဗ္တိုက်ဇၞော်ဇၞော် သၟးတုဲ ရဲကွာန် ၜိုတ်မွဲလ္ၚီပြၚ် နူလ္ပာ်ဒေသ မာၚ်ယှူတေံဂှ်လေဝ် ဂြိပ်ဒဴးမံၚ်ဘဲပၞာန်ကီု ဂွံတီကေတ်ရ။