အိုက်သာၚ် – ဒပ်ပၞာန် ဗော်ပရေၚ်တောတက်ရးသေံဇၞော် SSPP/SSA
ဒပ် ဗော် SSPP/SSA တံ ၜိုန်ဒးဒုၚ်ထ္ပက်ပၞာန်ကဵု ဒပ်အလဵုအသဳကီုလေဝ် ဂွံက္လေၚ်ထ္ပက်ပၞာန်ကီုဂှ် ညးတံဟွံမွဲပၟိက်တုဲ နဒဒှ် မၚ်မွဲစဵုဒၞါအာ ဇကုဇကုဟေၚ် ဆက်တဝ်စၞေဟ်

လုပ်အာပေါဲဗ္တိုက်ဏောၚ် သာ်ဝွံ ပ္ဍဲဂိတုအံက်တဝ်ဗာ ၁၈ ဂှ် ဗော်ညးတံ ပ္တ္တိ်တ်လဝ် လိက်လလောၚ်တြးရ။
ဒပ်အလဵုအသဳဝွံ ပပ္တံနူ သၞာံ ၂၀၁၅ အံက်တဝ်ဗာ ၆ မံက်တေံတုဲ ဒဵုကဵုစိုပ် အံက်တဝ်ဗာ ၁၈ ဂှ် ဍိုက်ထ္ပက်မံၚ်ပၞာန် ဂတှေ်သၞေဟ်ခဒိုအ် တာသာမ်ဖူ ဇရေၚ်ဝါပ်ဟာဲ ဌာန်ဂအုပ် ဗော် SSPP/SSA တေံတုဲ ဗက်သ္ပမံၚ်ပေါဲပၞာန်ရ။
“ဣဏံဂှ် ဍေံတံဓရိုဟ်မံၚ်ပိုဲ နကဵုပရေၚ်ပၞာန် ဒြဟတ်ပၞာန်ဍေံတံရ။ဆ္ဂး လ္ပာ်ပိုဲ ပါဲနူ မၚ်မွဲစဵုဒၞါအာ ဇကုဇကုတုဲ ကာလလဵုမွဲ ဟွံက္လေၚ်ထ္ပက်ပၞာန် ကုဍေံတံရ။ လၟုဟ်ဏံ ဒၞါဲအဓိကမွဲဒၞါဲ သွက်ဌာန်ဂအုပ်ပိုဲဂှ် ဍေံတံ ကၠုၚ်ဍိုက်ဗ္တိုက်တုဲ ရဲပိုဲ ဆုတ်ကဵုနူဒၞါဲဂှ်ရ။ ၜိုတ်ဏံ ဍေံတံဒိုအ်ထေက်ကီုရ ပိုဲထေၚ်။ ပြသၞာ ပရေၚ်ဍုၚ်ကွာန်ဂှ် နကဵုနဲပရေၚ်ဍုၚ်ကွာန်ဟေၚ်ရ ပသောၚ်မာန်” သာ်ဝွံ သ္ကိုပ်ဗိုလ်ဇၞော်သာၚ်ဠ နူဗော် ပရေၚ်တောတက်ရးသေံဇၞော် SSPP/SSA ဟီုရ။
စပ်ကဵုပရေၚ်ဒဒှ်ဏံတုဲ ဗီုဒပ်ပၞာန်ဗၟာတံ သ္ပမာန်ကဵုဒြဟတ် ဍိုက်ထ္ပက်လုပ်ကၠုၚ် ဟွံမွဲကဵုပွဗဗွဲဓဝ်ဂှ် လ္ပာ်ပိုဲ နကဵုဗီုပြၚ် မဗဗွဲဓဝ်ဟေၚ်ရ မၚ်မွဲစဵုဒၞါအာ ဇကုဇကုတုဲ သီုကဵုပါဲဟွံဗၠးဟေၚ် ဒးက္လေၚ်တဝ်စၞေဟ်အာရ၊ ဆန္ဒ အာတ်မိက်ပေါဲပၞာန်၊ အ္ၚပ်ပေါဲပၞာန် ပ္ဍဲသန္ထာန်ဒပ်ပၞာန်ပိုဲ ဟွံမွဲသက်သက်ရ သာ်ဝွံ ဓမံက်ထ်ၜးလဝ် ပ္ဍဲလိက်လလောၚ်တြးဂှ်ရ။
သ်အာၚ်နူဂှ်ပၠန် နကဵုသိက္ခာနွံနွံ ညံၚ်ဂွံပါလုပ် ပ္ဍဲကိစ္စဒိုအ်ပန်ပှော် အလုံမွဲဍုၚ် သီုကဵုကိစ္စ ပရေၚ်ၜိုဟ်လလံ အပ္ဍဲဍုၚ် ကေုာံပေါဲသဳကၠဳ ပရေၚ်ဍုၚ်ကွာန်ဂှ် နကဵုပရေၚ်ပၠတရဴ ကမ္မတဳဗဟဵု ဗော် SSPP/SSA ဂှ်ဟေၚ် ဗွဲမဗဗွဲကဵုအ္ခိၚ် ဆက်ပ္တိုန်ထ်ၜး သဳကၠဳအာ ကုကမ္မတဳ မဓံက်ရုပ်ရဴ ကလောန်ပရေၚ်ၜိုဟ်လလံ ကၟိန်ဍုၚ် UPWC ဂှ်ဏောၚ်ဒှ်တုဲ မွဲလ္ပာ်ဂှ် ကောန်ဒပ် နာဲဒပ် SSPP/SSA ပိုဲလေဝ် ကိစ္စဒပ်ပၞာန်ဗၟာ လုပ်သ္ပမာန် ဍိုက်ဗ္တိုက်မံၚ် နကဵုဒြဟတ်ဂှ် နကဵုပရေၚ်ပၞာန် မစဵုဒၞါ ဇကုဇကုဂှ်ဟေၚ် တဝ်စၞေဟ် လုပ်အာ ပေါဲဗ္တိုက် ဏောၚ် ဗော် SSPP/SSA ဂးရ။
ဗ္ဒိုပ်သၞေဟ်ခဒိုအ် တာသာမ်ဖူ မဒှ်ဗ္ဒိုပ်အဓိက သွက်ဌာန်ဂအုပ် ဗော် SSPP/SSA ဂှ် လၟုဟ်မ္ဂး လုပ်အာ ပ္ဍဲသ္ကေံတဲ ဒပ်အလဵုအသဳဗၟာ တုဲရ။ ဒၟါနူပေါဲဗ္တိုက် ဇၞော်ဇၞော်တံဂှ်တုဲ ကောန်ကွာန် လၟိဟ်မွဲလ္ၚီပြၚ်ၚ် နူကဵုဒေသ ပွိုၚ်ဍုၚ်မာၚ်ယှူတေံ ထောံဌာန်တုဲ ဒးပါဲဒၟံၚ် ဘဲပၞာန်ကီုဏောၚ် ဂွံတီကေတ် နူဂကောံ သၟတ်သေံ (TYN) ရ။
ပ္ဍဲကဵု ဂကောံရပ်လွဟ် ရ ဂကောံ ဟွံထ္ပက်စၟတ်တဲ လိက်ကသုက် NCA ပ္ဍဲ အံက်တဝ်ဗာ ၁၅ ဂှ် ဗော်ပရေၚ်တောတက်ရးသေံဇၞော် SSPP/SSA ဏံလေဝ် တၞီလုပ်လၟိဟ် မွဲဂကောံကီုရ။
ဒပ်အလဵုအသဳကဵု ဂကောံသၟေဟ် ဟွံဂွံထ္ပက်စၟတ်တဲ လိက်ကသုက် NCA အံက်တဝ်ဗာ ၁၅ တံ ညံၚ်ဟဂွံဒှ်ပေါဲဗ္တိုက်ဂှ် လ္ပာ်အလဵုအသဳ စွံစိုတ်လှဲလှဲ စေတနာပြဲပြဲတုဲ ဆက်ပ္ညဳ သဳကၠဳအာညိဂှ်လေဝ် နူကံၚ်ဇြဳ က္လေၚ်ပ္တန်ရးသေံဇၞော် RCSS/SSA အာတ်မိက် ပ္တိတ်လိက်လလောၚ်တြး တုဲမံၚ်ကီုရ။
ဆဂှ်သၟးဟွံသေၚ် ဗော် ပရေၚ်တောတက်ရးသေံ SSPP/SSA ဝွံ ပ္ဍဲအရာပ္ညဳပ္ညပ်သဳကၠဳ ချူ ပရေၚ်လိက်ကသုက် ဒိုအ်ပန်ပှော်အလုံမွဲဍုၚ် NCA ဂှ်လေဝ် ပါကၠုၚ်မံၚ်လၟိုန်ကီုရတုဲ လၟုဟ် ဒပ်အလဵုအသဳ ကဵု ဒပ် SSPP/SSA တံ ဒှ်မံၚ်ပေါဲဗ္တိုက် ဇၞော်ဇၞော်ဂှ် လ္ပာ်အလဵုအသဳ စွံစိုတ်လှဲလှဲတုဲ ညံၚ်ဂွံပဒိုအ်ထောံပေါဲပၞာန်၊ညံၚ်ဂွံဂၠာဲသွဟ် နကဵုပေါဲသဳကၠဳဂှ်လေဝ် RCSS/SSA အာတ်မိက်လဝ် အလဵုအသဳကီုရ။
သ်အာၚ်နူ RCSS/SSA တုဲ ဂကောံမဇ ၈၈ (ၚြိမ်းချမ်းရေးနှၚ့် ပွၚ့်လၚ်းလူ့အဖွဲ့အစည့်) ကဵု ဂကောံ မဟာမိတ် ကောန်ဍုၚ်အရၚ် မညဳသာ UNA တံလေဝ် နူအလဵုအသဳ ညံၚ်ဂွံဝေၚ်ပါဲပေါဲပၞာန် ကုဂကောံ ဟဂွံထ္ပက်စၟတ်တဲဏီတံတုဲ ဂၠာဲသွဟ် နကဵုပရေၚ်ပေါဲသဳကၠဳညိဂှ်လေဝ် အာတ်မိက်လဝ်ကီုရ။