– တ္ၚဲကောန်ဂကူမန် ဂွံဒှ်ကၟာတ်ရုၚ်ဗွဲလုပ်သၞောဝ်မာန်ဂှ် ဂကောံထံက်ပၚ်ပရေၚ်ပညာမန် ပတိတ်လိက်လလောၚ်တြး ကသေအ်ကၟဝ်ဆဝ်ဗ္ၚုဟ်လဝ် ဇြဟတ်ဗွိုၚ်နာနာတံရောၚ် ဂွံတီကေတ်ရ။
ပ္ဍဲဂိတုနဝ်ဝေန်ဗာ (၂၂) ဂှ် ကၠောန်ဗဒှ်စၟတ်သမ္တီ “လဂံါတ္ၚဲစိုပ် ၁၀-သၞာံ” ပ္ဍဲကဵုရာမညဟိုဝ်တေဝ် ဍုၚ်မတ်မလီုဂှ် နူကဵုဂကောံဂှ် ပတိတ်လိက်လလောၚ်တြးရောၚ်။
“နူကဵုဂကောံထံက်ပၚ်ပရေၚ်ပညာမန်ပိုဲဏံ အတိုၚ်ရန်တၟအ်လဝ် သွက်ဂွံထိၚ်ဒဝ်မၚ်မွဲအာ အာဲကၟာဲယေန်သၞာၚ် ဂကူဘာသာသာသၞာ၊ နကဵုလၟေၚ်ကမၠောန်ဂှ်တှေ် ပ္ဍဲကဵုတၚ်နွံပၟိက်ထေက်ကဵုဒးကၠောန်ဂှ်တှေ် တ္ၚဲကောန်ဂကူမန် ကၟာတ်ရုၚ် ဗွဲမလုပ်သၞောဝ်ဂှ်တှေ် နွံပၟိက်မံၚ်ဏောၚ် ပိုဲစှေ်စိုတ်ရ” သာ်ဝွံ ဒု-ဥက္ကဋ္ဌ ဂကောံထံက်ပၚ်ပရေၚ်ပညာမန် တၠဂုဏ်ပညိန္ဒ ဟီုမြော်ရ။
ဂကောံမဟာဇန် မပံၚ်ကောံ လစွံစိုတ်တုပ်ဂှ် ပတိုန်ထ္ၜးဓရိုဟ်ဏာကဵု အမာတ်မန်တံတုဲနအမာတ်မန်တံလေဝ် ညံၚ်ဂွံစၟတ်သမ္တီကဵု ဒးပ္တိုန်ထ္ၜး လုပ်ပေဲါဗတိုက်ပ္ဍဲကဵုကၠတ်ထဝ်တေံမာန်မ္ဂး တ္ၚဲကောန်ဂကူမန် နဒဒှ်တ္ၚဲကၟာတ်ရုၚ်လုပ် သၞောဝ်မွဲရောၚ် ချူထမံက်လဝ် ပ္ဍဲလိက်လလောၚ်တြးညးတံရ။
စပ်ကဵုတ္ၚဲကောန်ဂကူမန် ဂွံဒှ်တ္ၚဲကၟာတ်ရုၚ်တုဲ “ဒးပတိုန်ပ္ဍဲကဵုကၠတ်ထဝ်ကၟိန်ဍုၚ်ဏောၚ်။ ကဆံၚ်တွဵုရးဂှ် ဖျေံသ္ဂုတ် သွာတ် ဟွံဂွံပုဟ်။ ပိုဲဂှ် ဂစာန်မံၚ်ဏီဖိုဟ်ရ။ ဟီုမံၚ်ဖိုဟ်ရ။ မၞိဟ်ဂွံပတိုန်ဂလာန်လ္တူတေံ ဒးနွံပၠန်ဏောၚ်” သာ်ဝွံ ညး စၞးကၠတ်ထဝ်တွဵုရးဍုၚ်မန် နူပွိုၚ်ဍုၚ်ကျာ်မြဟ် နာဲသာန်တေန် ဟီုဂးလဆဵုဂဗညးရ။
သၞာံတုဲကၠုၚ်တေံ ပ္ဍဲကဵုကၠတ်ထဝ်တွဵုရးဍုၚ်မန်ဂှ် ပတိုန်ထ္ၜးလဝ်နကဵုဂလာန်ကီုလေဝ် ဟွံအံၚ်ဇၞးဏီရောၚ်။ ပ္ဍဲကဵုတ္ၚဲ ကောန်ဂကူမန်ဂှ် သၞာဲဒဴအလဵုအသဳကီု ကွးဘာတံကီု ညးလဵုဟွံရုဲသွက်ဂွံတိုန်စိုပ်သ္ဘၚ်တ္ၚဲကောန်ဂကူမန်ဂှ် အာတ် ကၠုၚ်အခေါၚ်မ္ဂး ကဵုအခေါၚ်ဇူ ဟွံကေတ်ဒုဟ်ဒဏ်ရောၚ် နူကဵုကၠတ်ထဝ်တွဵုရးဍုၚ်မန် သ္ဂုတ်သွာတ်လဝ်နွံရ။
“နကဵုဆန္ဒတှေ် မိက်ဂွံကၟာတ်ရုၚ် အလုံမွဲဍုၚ်၊ ရံၚ်အာကဵုအကာဲအရာ ဍုၚ်ပိုဲဏံတှေ် ဇၟာပ်တ္ၚဲကောန်ဂကူ ဂကူနွံဖၟိုတ် ဂှ် ယဝ်ရဒးကၟာတ်တှေ် အလုံဍုၚ်တ္ၚဲအခေါၚ်ကၟာတ်ရုၚ်နွံဖအိုတ်တှေ် ဍေံဟွံဂပ်ဂဝ်ပုဟ်။ ဆ္ဂး ပ္ဍဲကဵုတွဵုရးညးကဵုညး ဒးကၟာတ်ရုၚ်တှေ် ဗီုဏံရ ပိုဲတံလုပ်ပေဲါဗတိုက်ထေက်” သာ်ဝွံ ကေၚ်ကာဗဟဵု (တြေံ) ဗော်ဍုၚ်မန်တၟိ နာဲတၠညး ဟီုဂးသဳကၠဳလဝ်ကီုရ။
အခေါၚ်ကံကုသဵုမန် မန်သ္ဂောံဖန်ဖက်ကေတ်မာန်ဂှ် ဒးထမံက်ရုပ်ရဴတုဲ အလုံဂကူမန်ပိုဲ သီုကဵုက္ဍိုပ်သ္ကိုပ်မန် ဂကောံ မဟာဇန်မန်ဂမၠိုၚ် ရံၚ်မုက်ဂကူတုဲ တ္ၚဲကောန်ဂကူမန်မွဲ ညံၚ်ဂွံဒှ်တ္ၚဲလုပ်သၞောဝ် နဒဒှ်တ္ၚဲကၟာတ်ရုၚ်မာန် ဒးလုပ်အာ ပေဲါဗတိုက်ရောၚ် ဂကောံထံက်ပၚ်ပရေၚ်ပညာမန် ဆဝ်ဗ္ၚုဟ်လဝ်ရောၚ်။
ဂကောံထံက်ပၚ်ပရေၚ်ပညာမန်ဂှ် နူကဵုသက္ကရာဇ် (၂၀၀၆) တေံ ဒက်ပတန်လဝ်တုဲ ချဳဓရာၚ်မံၚ် သွာၚ်ပရေၚ် ထံက်ပၚ်၊ သွာၚ်ပရေၚ်ပညာ ကေုာံ သွာၚ်မဟာဇန်တံဂှ် ပံၚ်တောဲရေၚ်တၠုၚ်မံၚ်ရောၚ် ဂွံတီကေတ်ရ။
