ဌာန်ပရိုၚ်ဗၠးၜးမန် – တိုက်ဗာန် Bank ဂျပါန် နွံယၟု Japan Bank for International Coo-peration (JBIC) ကေုာံ Japan International Cooperation Agency (JICA) တအ် ညံၚ်ဟွံဂွံကဵု အရီုဗၚ် ကုအစဳဇန်
ရုၚ်စက်ပ္တိတ်ဒြဟတ်ဓါတ်လလဳ နကဵုဓတ်ပၟတ်တၟအ်ချး အပ္ဍဲဍုၚ်ဗၟာဂှ် ပူဂဵု မသ္ပစၞးကဵု ဒေသတအ် ပလံၚ်ဗ္စိုပ်လဝ်လိက် အာတ်မိက် ကုတိုက်ဘဏ္ဍာ
ဂကောံအာတ်မိက်ပ္တိုန်ထ်ၜး ပ္ဍဲဂျပါန် (FacebooK)
ပူဂဵုပိတလ မသ္ပစၞးကဵုဒေသ ဒးဒုၚ်ရန်လဝ် သွက်ဂွံသိုၚ်ခၞံ ရုၚ်စက်တၟအ်ချး ပိဒေသ မတွံဂး ဒေသအၚ်ဒၚ် ပွိုၚ်ဍုၚ်ရေဝ် တွဵုရးမန်၊ ဒေသ (ၚရုတ်ကောၚ်း) ပွိုၚ်ဍုၚ် ၚပုတဝ် ရးဨရာဝတဳ၊ ဒေသ သာရဗွေန် ပွိုၚ်ဍုၚ်တနၚ်သဳ ရးတနၚ်သဳ တအ် ပ္ဍဲဂိတု နဝ်ဝေမ်ဗာ ၂၆ ကဵု ၂ရ ဂှ် ညးတအ်အာစိုပ် ပလံၚ်လိက် ပ္ဍဲရုၚ်ဇၞော် တိုက်ဘဏ္ဍာ တအ်ဂှ်ရ။
ပ္ဍဲကာလ ချူဓဇက် မူအပြောံ စပ်ကဵု ဒြဟတ်ဓါတ်လလဳ အရၚ်ကၟိန်ဍုၚ်ဂှ် ပ္ဍဲသၞာံ ၂၀၃၀ တေံမ္ဂး ပၞောဝ်ကဵု အစောံဒြဟတ် မဂွံမာန်တအ်ဂှ် နူကဵုတၟအ်ချး ဍုၚ်ဗၟာဂှ် ဂွံအစောံဒြဟတ်ဓါတ် ၜိုတ် ၃၃ တၟအ်ကၠံ မာန်ဏေါၚ် နူကဵု တိုက်ဘဏ္ဍာ JICA ပၠောပ်လညာတ် ကဵုလဝ်ကသပ်ဂၞန် သာ်ဂှ်တုဲ ဒၟါနူကသပ်လညာတ် ဏအ်ရ ဂကောံလ္ပာ်အရာပ်ကေုာံ ညးဍုၚ်ကွာန် နွံပ္ဍဲဒေသ ကိုန်အစဳဇန် ရုၚ်စက်တၟအ်ချးတအ် ဒှ်ကၠုၚ် ဓဝိၚ်ဇၞော်ဇၞော်ရ။
“ ရမျှာၚ် ကောန်ဒေသ ပိုဲဏအ်တှေ် ကိုန်အစဳဇန်ဏအ် ညံၚ်ဟဂွံဒှ်ဂှ် ဒ္စဵုဒ္စးပေၚ်ၚ်ရ။ တိုက်ဘဏ္ဍာ (ဗာန်) ဂၠေံပ္တိတ်ကဵုသြန် ကုကုမ္ပဏဳ (တဵုယဵုထာဲ) ဏအ်ကီု၊ ကုမ္ပဏဳတၞဟ်ဟ် မလုပ်လဝ်အရေၚ် (ရှေဝ်ယာ) တအ်ကီု သ္ပဇြိုဟ်နက်တုဲ ဒးက္လၚ်ရမျှာၚ် ကောန်ဒေသတအ်ထေက်ရ” သာ်ဝွံ မိနဳမာဥု မသ္ပစၞး ဒေသအၚ်ဒၚ် ဟီုဂးဏာ ပ္ဍဲကောံဓရီု မဆဵုကဵု JICA ဂှ်ရ။
သ်အာၚ်နူဂှ် ဂကောံမအာအာတ်မိက် ပ္တိုန်ထ်ၜး ပ္ဍဲဂျပါန်တေံဂှ်ဝွံ သီုပလံၚ်ဗ္စိုပ်လဝ်လိက် ကုကုမ္ပဏဳဂမၠိုၚ် မပ္တိတ်ကဵု ကပေါတ်စက်ကြိယာ ကေုာံ ကဵုအထံက် နဲကဲပညာ သွက်ရုၚ်စက် တၟအ်ချးတအ်ဂှ်ကီုတုဲ ပ္ဍဲဂိတုနဝ်ဝေမ်ဗာ ၂၈ ဂှ် ကွာ်ထ်ၜးဆန္ဒ အပ္ဍဲကၠအ်ပကဴ Hibiya Park ဂှ်ကီုရ မိနဳမာဥု ဂးရ။
ဆဂှ်သၟးဟွံသေၚ် ပ္ဍဲနဝ်ဝေမ်ဗာ ၂ရ ဂှ်ပၠန်ရ သ်အာၚ်နူမၞိဟ်စၞး ၃ တလတေံတုဲ မၞိဟ်စၞး ၃ တလတၞဟ်ဟ်ပၠန် သ္ပစၞးကဵု ပိဒေသဂှ်တုဲ နူကဵုရုၚ်ကလုတ်ဂျပါန် (ဍုၚ်လ္ဂုၚ်) မွဲတဆံၚ် ထပ်ပလံၚ်ဗ္စိုပ်မဖှ်သာ်ဂှ် ကုတိုက်ဘဏ္ဍာ ၂ လ္တူတေံဂှ်ကီု ဂွံတီကေတ်ရ။
ပ္ဍဲလိက်ပလံၚ်ဗ္စိုပ်ကဵု JBIC ကေုာံ JICA ဂှ် “ ရုၚ်စက်တၟအ်ချးလဵုဟွံဟီု ဆဵုဂဗ ကေတ်ဆန္ဒ ညးဍုၚ်ကွာန် ဒေသတအ်ဂှ်တုဲမှ ဓမံက်ရုပ်ရဴထေက်ဏောၚ်” အာတ်မိက်လဝ် သာ်ဂှ်ရ။
ကုမ္ပဏဳတအ်ဝွံ ပ္ဍဲကာလချုက်လိက် အဆံၚ်စမ်ၜတ်ကီု၊ ပ္ဍဲကာလချုက်လိက်တုပ်စိုတ် အခေါၚ်ကၠောန်ကီု သီုကဵုဟွံကေတ် ဂၞပ်စိုတ်ဆန္ဒ ကောန်ဒေသတအ်မွဲသာ် ဂစာန်မံၚ် အရၚ်ဂွံဓမံက်ရုပ်ရဴကဵု ကိုန်အစဳဇန် ညးတအ်ရ ဂှ်လေဝ် ညးစၞးဒေသတအ် ဟီုရ။
“ ဆန္ဒ ကောန်ဒေသတအ် ဟွံပါမွဲသာ် ယဝ်ဆက်ဓမံက်အာရုပ်ရဴ ကုကိုန်အစဳဇန်ဂှ်မ္ဂး အတိုၚ်စၞောန်ညးတအ် လးလဝ် အရာဒးမၚ်မွဲ စပ်ကဵုပွဳပွူသဘာဝ၊ စပ်ကဵုပရေၚ်မံၚ်စံၚ်စသုၚ် မၞိဟ်တအ်ဂှ် အလဵုလဵုညးတအ် ဝးပကဝ်မံၚ်ဏောၚ်” ဂှ်လေဝ် ပ္ဍဲကာလ လလောၚ်ပ္တိတ်ပရိုၚ်ဂှ် ထံက်ထ်ၜးလဝ်ကီုရ။
ကာလလၟုဟ်ဝွံ ပ္ဍဲကဵုဍုၚ်ဗၟာဏအ် သွက်ဂွံသိုၚ်ခၞံ ရုၚ်စက်ဒြဟတ်ဓါတ်လလဳ မစကာဓတ်ပၟတ်တၟအ်ချးဂှ် ကိုန်အစဳဇန်ကမၠောန် မတုပ်စိုတ် ထ္ပက်လဝ်စၟတ်တဲ အဆံၚ်ကာလစံၜတ် (MOU) ကဵု အဆံၚ်တုပ်စိုတ် အခေါၚ်ကၠောန်(MOA) ကုအလဵုအသဳကၟိန်ဍုၚ်ဂှ် ကိုန်အစဳဇန် ရုၚ်စက်တၟအ်ချး နွံ (၁၁) ဂွံတီကေတ်ရ။
0 Comments