ကၠောန်ဗဒှ် ပေဲါရုဲစှ်သ္ကိုပ်အုပ်ဓုပ်ကွာန် ပ္ဍဲကွာန်ကြေဝ်ဏာ ပွိုၚ်ဍုၚ်ကျာ်မြဟ် ဂိတုဂျာန္နဝါရဳ (၁၇) ဂှ် ညးဗြဴမန်မၞုံအာ ယုက် (၄၁) သၞာံမွဲတၠ ပါလုပ်ဒုၚ်ရုဲစှ်တုဲ နဒဒှ်အလန်ကၠာအိုတ် ဂွံဇၞးအာရောၚ် ဂွံတီကေတ်ရ။

သ္ကိုပ်အုပ်ဓုပ်ကွာန် မိစၠန်ထဝ်(MNA)

ပ္ဍဲကဵုရုဲစှ်သ္ကိုပ်အုပ်ဓုပ် သွက်ဂကောံကွာန်ကြေဝ်ဏာတၟိဂှ်ဝွံ တြုံ (၃) တၠကဵု ဗြဴ (၁) တၠလုပ်ပြိုၚ်ဂှ် မိတာန်ဋ္ဌေ (က) မိစၠန်ထဝ် (၁၄၅) မာဲ၊ နာဲဟၜုတ် (၄၀) မာဲ၊ နာဲထောန်သိၚ် (၂၈) မာဲ၊ နာဲလှထောန် (၁၆) မာဲက္လိဂွံတုဲ နကဵုလၟိဟ် မာဲဗွဲမပိုတ်သ္ကုတ်ဂှ် ဇၞးအာရ။

“ညးဗြဴသၟတ် ဍောတ်နူပိုဲ ဂတနူဏံ ဂွံညာတ်ကၠောန်အာ မိက်ဂွံထ်ၜးဏာနဒဒှ်အစာံမွဲ၊ မွဲသာ်ပၠန်ဂှ်တှေ် အစောဲလာံ ဆေၚ်ကဵုမၞိဟ်တြုံမှ သ္ပပဓါန်ဂွံ၊ အုပ်ဓုပ်ဍုၚ်ကွာန်ဂွံ သၞောဝ်ဂှ်တှေ် ညးဗြဴပိုဲဂှ် ညးတံ ဟွံပၠောပ်ကၠုၚ်အဝေါၚ်ပုဟ် အၝေဏံဂှ် ကၠာအိုတ်မိက်ဂွံတတ်ထ္ပာ် သွက်ညးဗြဴဂှ်တှေ် နွံမံၚ်ၜိုတ် (၅၀) က္ဍိုပ်ကၠံရ” သာ်ဝွံ ညးဂွံဒုၚ်ရုဲစှ် မိစၠန် ထဝ်ဂှ် ဟီုရ။

တုဲပၠန် စပ်ကဵုပြသၞာက္တဵုဒှ်မံၚ်ပ္ဍဲကွာန်ပြဟ်ဟ်ဏံမ္ဂး ဗီုကဵုကိစ္စပၟတ်တံကီု၊ ဆေၚ်ကဵုကမၠောန်ဖောအ်ဗြေဝ်ကွာန်ကီုတံဂှ် ပံၚ်တောဲကဵု ဂကောံသၟတ်၊ ဂကောံညးဍုၚ်ကွာန်တံတုဲ သောၚ်အာညးသ္ကံမွဲစွံရောၚ်ဂှ်လေဝ် ညးဆက်ဟီုလဝ်ရ။

ဟိုတ်နူမိစၠန်ထဝ် ဂွံဒုၚ်ရုဲစှ်ဏာ ဒၞဲါသ္ကိုပ်အုပ်ဓုပ် သွက်ဂကောံကွာန်ကြေဝ်ဏာသာ်ဝွံတုဲ ကောန်ကွာန်လၟိဟ်ဗွဲမဂၠိုၚ် မိပ်စိုတ်အိုတ်တုဲ ညးချဳဒရာၚ်ပရေၚ်ညးဗြဴမန်တံလေဝ် ဒုၚ်တၠုၚ်ထိုၚ်သးအိုတ်ရ။

ပ္ဍဲကဵုရုဲစှ်သ္ကိုပ်အုပ်ဓုပ်ကွာန်ဏံဂှ် ဗွဲကိုပ်ကၠာ မၞိဟ်နွံပၟိက်ဒုၚ်ရုဲစှ်အုပ်ဓုပ်ကွာန်တံ ဒးဒှ်မံၚ်ညးက္ဍိုပ်စှ်သ္ၚိတုဲ ယဝ်ကိတ် ညဳကဵုစရာဲဍာ်ဒ္ကေဝ် နွံတဴ (၁၁) တၚ် အတိုၚ်ချူဓမံက်လဝ် ပ္ဍဲသၞောဝ်ဥပဒေ သ္ကိုပ်အုပ်ဓုပ်အရာပ်/ကွာန်မ္ဂး ပၠောပ် ဂလာန် ရုဲစှ်မာန်ဖ်အိုတ်ရောၚ် သ္ကိုပ်အုပ်ဓုပ်ပွိုၚ်ဍုၚ်ကျာ်မြဟ် ဥူအံၚ်ထိုက် ဟီုရ။

“အတိုၚ်ညးဂမၠိုၚ် ဂွံဆဵုညာတ်ဂှ်ရ၊ နူကဵုညးကောပ်ကာဲတံ (၅) တၠ ပၠတရဴတုဲ ရုဲစှ်ဏာကဵုမၞိဟ်မွဲတၠ ဗွဲမကိတ်ညဳကဵု ပၟိက်ဆန္ဒမၞိဟ်ဟလိုၚ်ရောၚ်၊ မၞိဟ်တြုံဒှ်ဒှ်၊ မၞိဟ်ဗြဴဒှ်ဒှ် ၝဏံဂှ် ပၟိက်ဟွံဇၞော်ပုဟ်၊ ပၠတရဴဍုၚ်ကွာန်ဇကုတုဲ ညံၚ်ဂွံ ကၠောန်ကဵုခိုဟ်ဟ်မာန်ဂှ် ပၟိက်ဇၞော်ရောၚ်” သာ်ဝွံ ညးဆက်ဟီုရ။

မိစၠန်ထဝ်ဝွံ မဒှ်ညးဒုလျိုၚ်ပရေၚ်ပညာကောန်ဂကူမန် ခရိုၚ်သဓီုမွဲတၠတုဲ ပ္ဍဲကာလလုပ်ဒုၚ်ရုဲစှ်သ္ကိုပ်အုပ်ဓုပ်ကွာန်ဏံ အာတ်မိက်အခေါၚ်ဒေံါဇူ ပွိုၚ်မသုန်သၞာံဂှ် နူကဵုဋ္ဌာနပရေၚ်ပညာမန် ကဵုလဝ်အခေါၚ်တုဲဒှ်ရောၚ် မိစၠန်ထဝ် ဟီုထ်ၜး ရ။

ပ္ဍဲကဵုဂကောံကွာန်ကြေဝ်ဏာဂှ်မ္ဂး ကွာန်ကံဇြဲ၊ ကံဇၞော်၊ ကံဆုကၠတံပါလုပ်ဒက်ပ္တန်လဝ်တုဲ နဒဒှ်ညးဗြဴမွဲတၠ မိစၠန်ထဝ် ဂွံဒုၚ်ရုဲစှ်ဏာ သ္ကိုပ်အုပ်ဓုပ်ကွာန်သာ်ဏံဂှ် အပ္ဍဲကဵုကောန်ဂကူမန်မ္ဂး မဒှ်အလန်ကိုပ်ကၠာအိုတ်ရောၚ် ဂွံတီကေတ်ရ။