ဒဒန်မနောမယ ၜဳဃယၚ် (MNA)
သွက်ဂွံသိုၚ်ဒဒန်ဏံ နူသြန်ဗာတ်ဂျေတ် သၞာံ၂၀၁၅-၂၀၁၆ ဂှ် အလဵုအသဳ ဖျေံကဵုလဝ် သြန် (၃၃၀၀) ပိလ္ၚဳပိကၠံကိုဋ်ဒ္ကေဝ်တုဲ ကၠောန်မံၚ်ရ၊ ၜိုန်ဂှ်လေဝ် ဒဒန်ဂှ် ဟွံစိုပ်ဒတုဲဏီတုဲ အလဵုအသဳတၟိတိုန်မ္ဂး သြန်ထပ်စှေ်ဟာ ဟွံစှေ်ဟာဂှ် တန်တဴ လ္တူဂှ်ရဏောၚ် ဂးရ။
“ဟီုတပ်ပ်တှေ် ဒဒန်ဏံဂှ် ကျာ်ဇၞော်ပိုဲရ ကေတ်လဝ်တာလျိုၚ်၊ ၜိုန်သြန်ဒဒန် ဟွံမွဲကီုလေဝ် ကျာ်ဇၞော်ပိုဲဂှ် နကဵုသြန် နူဒါယကာညးကီု၊ နူကဵုသြန် ဂွံလဝ်ဒါန်ကီု၊ နူကဵုသြန် တၠဒါန်တံ မကဵုလဝ်ဒါန် ကုညးဂှ်ကိီု ဂၠံက်စကာ ကၠောန်မံၚ်ရ။ ရံၚ်ကေတ်တှေ် ကျာ်ဇၞော်ဒှ်မံၚ်ခတှ်ကီုဏောၚ်ထေၚ်ရ။ ဆ္ဂး ခတှ်နွံမူစိဂှ် ကေတ်ဟွံဒး သၟာန်ကျာ်ဇၞော်တုဲမှ တီကၠးဏောၚ်” ဥုကျဝ်လွေန်ဥု ဟီုရ။
ကၠောန်မံၚ်ဒဒန်ဏံ နကဵုဒြဟတ် မၞိဟ်၊ ဒြဟတ်သြန် ကောန်ဒေသ ပွဳပွူဂှ်ကဵု နကဵုသြန်ဗာတ်ဂျေတ် နူအလဵုအသဳတုဲ လၟုဟ်လအ်ကၠုၚ် ပွိုၚ် ၁၁ ဂိတုတုဲရဂှ်လေဝ် ညးတေံ ဂးရ။
“ကွာန်ဗွဲမဂၠိုၚ် နွံမံၚ်ကရပ်ဒေသ ၜဳဃယၚ်ဏံဂှ် ကွာန်မန်သၟးရဂၠိုၚ်၊ လ္ပာ်ဗၟံက်မ္ဂး ကွာန်ကရေၚ် ကအ်လေၚ်၊ကအ်ခိုက်၊ ကွာန်မန် မပ္တံ ကအ်ကျာ်၊က္ဍိုပ်ဒဒန်(တံတားဦး)၊ ကာန္နဳ တံနွံတုဲ ပလိုတ်ၜဳဂှ်မ္ဂး မပ္တံ ပလိုၚ်တၟံ၊ ကအ်ခတဝ်၊ ကျာ်ကဗေၚ်၊ကအ်ဂူ၊ ခအံၚ်ကြေဟ် တံနွံတုဲ ပိုဲတံ တိတ်ဒုၚ်ဒါန် ပ္ဍဲကွာန်တံဂှ် တုဲဒှ်အိုတ်ရ” သာ်ဝွံ နာဲမ္ၚဵု ဗက်ဒုၚ်ဒါန်သြန် သွက်ဒဒန်ဂှ် ဟီုရ။
ဒဒန်ဝွံ နူဌာနက္ဍိုက်ပ် ပရေၚ်ဇၞော်မောဝ်ဒေသ ကွာန်ရး ကေုာံ ဂကောံဒဒန် စၟတ်(၂၀) ပံၚ်တောဲတုဲ ကၠောန်မံၚ်ရ။ ဒဒန်ဏံ ဇမၠိၚ် နွံ၂၇၀ ပေ၊ သမၠဲလၞၚ် နွံ ၃၀ ပေတုဲ ပါ်လဝ်ၜါကရေက်ကီုရ။ ညံၚ်ဂွံဒုၚ်ဒဝ် ဂယိုၚ်ဇြိုၚ် ၜိုတ် ၁၀ တာန် မာန်ဂှ် ဒးကၠောန်ဏောၚ်တုဲ ခရိတ် ၜိုတ် ၉၀၀၀ (ဒ္စိတ်လ္ၚီ) ကိုဋ်ဒ္ကေဝ် အိုတ်ဏောၚ် ဂကောံသိုၚ်ခၞံဂှ် တော်လဝ်ရ။
