က္ဍိုပ်သ္ကိုပ်ဂမၠိုၚ် နူဗော်မန် ၃ ဗော်အပ္ဍဲဍုၚ်ကဵု CSO မန်တံ တောဲတက်သမ္တီလဝ် မွဲစွံ (Banya Aung Moe)
ဗော်ဍုၚ်မန်တၟိ အလန်နဝမ မပ္တိတ်လဝ် နစၟတ်တ္ၚဲ ဇာန်နဝါရဳ ၁၄ ဂှ်ရ။
“ဗော်ပရေၚ်ဍုၚ်ကွာန်မန် နွံပ္ဍဲဍုၚ်တေံ ညံၚ်ဂွံဒှ်မွဲဗော်ဂှ် ဗော်ဍုၚ်မန်တၟိပိုဲ လုပ်ရေၚ်တၠုၚ်အာကီုဏောၚ်။ တုဲကၠုၚ်တေံ မိက်ဂွံကဵုဗော်မန်တံ ညဳသာတုဲ ခမဳသၚ်မန်တံ သ္ပက္ဍိုပ်ပ္ညဳကၠုၚ်ကီုရ။ ဗီုရန်လဝ် ဟွံဒှ်တုဲ ခမဳသၚ်မန်တံ ဗလးထောံတဲရ။ ဒှ်သာ်ဂှ်ရ ကိစ္စဏံ စွံစိုတ် နဒဒှ်ကလောန် ဗော်ဍုၚ်မန်တၟိကီုတုဲ ဗော်တံဏံ ညံၚ်ဂွံညဳသၟဟ်ဂှ် ဂစာန်လွဳအာဏောၚ်” နာဲထဝ်မန် ဥက္ကဌဗော် ဟီုရ။
ပ္ဍဲပေါဲရုဲမာဲ ၂၀၁၅ တုဲကၠုၚ်ဏံဂှ် မန်တံ က္လိဂွံ အမာတ် ၄ တလဓဝ်ရ။ ဟိုတ်နူ ဒှ်ဒၟံၚ် ၃ ဗော်ဂှ် မာဲပြးအာတုဲ ဒးကျကၠုၚ်ပေါဲရုဲမာဲရ။ ဒၟါနူဗော်မန် ဒှ်မံၚ်ၜါပိဗော်ဂှ်ရ ညးဍုၚ်ကွာန်မန်တံ လညာတ်ထုဲအာတုဲ ဟွံမိက်စုတ်မာဲ ဒှ်ကၠုၚ်ရ ။ ဒှ်သာ်ဂှ်ရ ဗော်မန် ညံၚ်ဂွံဒှ်မွဲဗော်ဂှ် ဒးဂစာန်ဏောၚ် ဥက္ကဌ ဗော်ဍုၚ်မန်တၟိ ဟီုရ။
“သွဟ်ပေါဲရုဲမာဲ ၂၀၁၅ ဂှ် ဒှ်သက်သဳ သွက်မန်တံရ။ ဗော်မန် လုပ်ပေါဲရုဲမာဲဂှ် ထေက်ကဵု ဒးဒှ်မွဲဗော်ဓဝ်ရ။ ကိစ္စဏံ ဗီုလဵု ဂွံဓမံက်ရုပ်ရဴရောဂှ် ဗော်ဍုၚ်မန်တၟိပိုဲကီု သီုဗော်ပရေၚ်ဍုၚ်ကွာန်မန် ပ္ဍဲဍုၚ် ကေုာံ ခမဳသၚ်မန်တံ ပံၚ်ကောံ သဳကၠဳအာဏောၚ်၊ အတိုၚ်ဆန္ဒညးဂလိုၚ်ဂှ် ပိုဲဒုၚ်ကေတ်ကီုဏောၚ်” နာဲထဝ်မန် ဥက္ကဌဗော် ဟီုသာ်ဂှ်ရ။
ပ္ဍဲပေါဲရုဲမာဲ ၂၀၁၅ တုဲကၠုၚ်ဏံ နူကဵုဗော်ကောန်ဂကူမန်ဂှ် ညးစၞး ၅၂ တလ၊ နူဗော်ဒဳမဝ်ကရေဇြဳဒေသရးမန်ဂှ် ၃၅ တလ၊ နူဗော်ညးဗြဴ (မန်)ဂှ် ၄ တလ ကေုာံ ညးစၞးပုဂ္ဂလိကမန်ဂမၠိုၚ်ကီု သီုဖၟိုတ် ညးစၞးကောန်ဂကူမန်ပိုဲ လုပ်ပြိုၚ်ကၠုၚ်မာဲ ဗ္ဒါဲ ၁၀၀ တလကီုလေဝ် ကာလသွဟ်တိတ်ကၠုၚ်ဂှ် ဇၞးမာဲ ၄ တလဓဝ်ရ။
ဗော်ဍုၚ်မန်တၟိဝွံ ပပ္တံနူ ဒဳဇြေမ်ဗာ ၂၇ ၊သၞာံ ၂၀၁၅ ဒဵုကဵု ဇာန်နဝါရဳ ၁၄ ၊ ၂၀၁၆ ဂှ် ညးတံကၠောန်သ္ပ သ္ဘၚ်သဳကၠဳဗော်အလန် နဝမ ပ္ဍဲဌာန်ဂအုပ်ဗဟဵု ဗ္ဒိုပ်လုပ်ဍုၚ် မၞုံဒေသကၞောတ်ၜဳရေဝ်၊ တွဵုရးဍုၚ်မန်တုဲ ညးစၞးဗော် ၁၂၂ တလ၊ ညးလ္ၚတ် ၁၈ တလ၊ ညးကဵုကသပ် ၁၀ တလ၊ သိီုဖၟိုတ် တိုန်စိုပ်သ္ဘၚ်သဳကၠဳ ၁၅၀ တလရ သာ်ဝွံ ဓမံက်ထ္ၜးလဝ် ပ္ဍဲလိက်လလောၚ်တရးဂှ်ကီုရ။
