ရပ်ဂွံမၞိဟ် သီုဂဥုဲချေံ မကၠုၚ်နူ ဒကုတ်ရေဝ်သမၠုၚ်ကျာတေံတုဲ ဆက်ဒတောဝ်ဗက်အာပၠန်ဂှ် ရပ်ဂွံ သီုမၞိဟ်သွံ သီုမၞိဟ်ဆက်စပ်တံရဂှ် ဂွံတီကေတ် နူလိက်စၟတ်သမ္တီ အမှုအရာ ရုၚ်ဗၠာဲသၟိၚ် ဍုၚ်ရေဝ်ရ။

ပ္ဍဲဂိတုဖေဖဝ်ဝါရီ ၆ ဖါနူဂယး အဃောရဲဗၠာဲသၟိၚ်တံ စၟဳစၟတ်ဒၟံၚ် ပ္ဍဲဒဒန်ရေဝ် မကၠောံကဵုကွာန်သၞေဟ်ကာတေံဂှ် ကွဳလိုန်ဓါတ် မိနဳလာဥု ကွာန်ခေါဇဴ ပွိုၚ်ဍုၚ်ရေဝ်သမၠုၚ် မစိုပ်ကၠုၚ်အဂှ်ဂှ် ရဲဗၠာဲသၟိၚ်တံ ဂၠိုက်ဂၠာဲစၟဳတ်တုဲ ရပ်ဂွံ ဂဥုဲချေံ ၃ ဓုပ် လၟိဟ်မ (၅၈၉) မ နွံကဵုအက္ခရ်လိက် WY စုတ်လဝ်ကဵုထိုၚ်ပလာဿတေတ် ပ္ဍဲကဵုထိုၚ်ခဝက် အရံၚ်ဍီု မိနဳလာဥုဂှ်တုဲ အတိုၚ်စၟဳစၟတ်သၟာန်သၟုက် မနဳလာဥု ဟီုပ္တိတ်လဝ်ဂှ်ဟေၚ် ဆက်ဒတောဝ်ဗက်တုဲ ထပ် ရပ်ဂွံ မၞိဟ်ဆက်စပ်ကဵု ဂဥုဲၜူမာဲတံပၠန်ရ။

ပ္ဍဲလိက်စၟတ်သမ္တီ အမှုအရာဂှ် “ မိနဳလာဥု ပ္တိတ်စဂှ် ဍေံရာန်နၚ် နူမိဇျှဵုယဳဥု ကွာန်ဆၚ်ဂူ ဍုၚ်ခေါဇဴ ပွိုၚ်ဍုၚ်ရေဝ် သမၠုၚ်ကျာ ဂးတုဲ ပ္ဍဲတ္ၚဲဂှ်ရ ဖါနူဂယး ၜိုတ် ၈ နာဍဳကဝက်ဂှ် ဆက်ဂၠိုက်ဂၠာဲ ပ္ဍဲသ္ၚိမိဇျှဵုယဳဥု အာယုက် (၃၅) ပၠန်တုဲ ဂဥုဲချေံ (၄၆) မ (၄.၆) ဂရာမ် နွံကဵုမလိက် WY ဂွဳလဝ်ကဵု ထိုၚ်ပလာဿတေတ်ဗုဗုဂှ် ဂွံဆဵုကေတ် ပ္ဍဲဇကု မိဇျှဵယဳဥုရ။ တော်ၚုဟ်မးမ္ဂး နွံၜိုတ် (၂၃၀၀၀၀ိ/-) ဂးရ။ ကရောံဂှ် ပၠံၚ်အရၚ်ဂွံဇြောတ်ဂဥုဲ (၃)တၞုၚ် မၞုံဇမၠိၚ် ပိၝောံတဲ ပါၚ်ပၠံၚ် (၂) ဇြေန်တဳမဳတာ၊ ဖုၚ်ဂှ် ၂ မ၊ သြန်သွံလဝ် ဂဥုဲချေံဂှ် ၂၉၀၀၀၀၀ိ/-ဂှ်လေဝ် ရပ်ဂွံ ဂတ မၞိဟ်ဂလိုၚ်ရ” သာ်ဝွံ ဓမံက်ထ္ၜးလဝ်ရ။

သၟာၚ်နူဂှ် သၟတ် ၃ တၠ ဆက်စပ် ပ္ဍဲအရာ သွံရာန်ဂဥုဲချေံဟာ ဟွံသေၚ်တှေ် နိဿဲစကာမံၚ် ဂဥုဲချေံဟာ မွဲမွဲဗီု ဆက်စပ်မာန်ဏောၚ် လဝ်စိုတ်တုဲ ရပ်လဝ်နွံမံၚ်ကီုဂှ်လေဝ် ဂွံဆဵုကေတ် ပ္ဍဲလိက်အမှုအရာ ဂှ်ကီုရ။

ဒှ်သာ်ဂှ်ရ ကုတၠဂဥုဲချေံ မိနဳလာဥု ကဵု မိဇျှဵုယဳဥု ကီု၊ ကုသၟတ် ၃ တလဂှ်ကီု နကဵုဒုဟ်ဂဥုဲၜူမာဲ ကေုာံ ဂဥုဲမာဲ လေပ်ဝိဝိၚ်ကဵုစိုတ်ဂှ်ဟေၚ် ရပ်စပ်စၟဳစၟတ်ဒၟံၚ် နကဵုသၞောဝ်ဥပဒေ ၝောံပိုဒ် ၁၅/၁၉ (က)၊ ၂၀ (က)/၂၁ ဖိုဟ် ရုၚ်ဗၠာဲသၟိၚ်ရေဝ် ဟီုရ။

ဗီုဂှ်ကီု ပ္ဍဲဖေဖဝ်ဝါရဳ ၆ ဂှ်ရ ဗ္တံ ၜိုတ် ၁၀ နာဍဳကဝက်ဂှ်လေဝ် ရဲဗၠာဲသၟိၚ်တံ လုပ်ဂၠိုက်ဂၠာဲ ပ္ဍဲသ္ၚိဆာန်တဳ ကွာန် ဝါဇၞော် လုပ်အဝေါၚ် ပွိုၚ်ကွာန်တံမောံ ဍုၚ်ပါ်လၟိုၚ် ပွိုၚ်ဍုၚ်ရေဝ်သၟဝ်ကျာဂှ် ဂဗဆဵု ထိုၚ်လှုဲ ပၞုက်စွံလဝ် ပ္ဍဲသၟဝ် ကလာပသဲဂှ်တုဲ အခါရ ပံက်ကျောဝ်ရံၚ်ထိုၚ်လှုဲဂှ် ဂွံဆဵုကေတ် ကောန်ကၠံက်စုတ်စထဝ် ၜါမ၊ အရံၚ်ဍာ် မိတ်မွဲမ၊ အရံၚ်သာ်တ္ၚေက်မွဲမ၊ ပ္ဍဲကၠံက်ဍာ်မိတ်ဂှ် ဂဥုဲအရံၚ်ပကဴ နွံကဵုမလိက် WY ဂှ် (၄၀) မ၊ ပ္ဍဲကၠံက် သာ်တ္ၚေက်ဂှ်ပၠန် ဂဥုဲချေံ WY ဂှ် (၁၀) မ၊ အက္ခရ် R ဂှ် (၇) မ၊ သီုဖၟိုတ် မဂဥုဲချေံ (၅၇) မ၊ ကရောံဂှ် သြန် သွံလဝ် ဂဥုဲချေံဟာ နွံပိကိုဋ်ဒကေဝ် ပ္ဍဲကဵုထိုၚ်လှုဲ မၞိဟ်ဗြဴဗြဴဂှ်လေဝ် ရပ်သီဂွံဏာကီု ဂွံတီကေတ် နူရုၚ်ဗၠာဲ သၟိၚ်လၟိုၚ်ရ။
ဒှ်သာ်ဂှ်ရ နကဵုဒုဟ်ဂဥုဲၜူမာဲ ကေုာံ ဂဥုဲမလေပ်ဝိဝိၚ်ကဵုစိုတ်ဂှ်ဟေၚ် ရပ်စပ်စၟဳစၟတ်ဒၟံၚ် ကုဆာန်တဳ နကဵုသၞောဝ် ဥပဒေ ၝောံပိုဒ် ၁၅/၁၉ (က)၊ ၂၀ (က) ဖိုဟ် ရုၚ်ဗၠာဲသၟိၚ်လၟိုၚ် ဟီုရ။